- 1
- I puta mai ano te kupu a Ihowa ki a au i te iwa o nga tau, i te tekau o nga marama, i te tekau o nga ra o te marama, i mea,
- 2
- E te tama a te tangata, tuhituhia e koe te ingoa o tenei ra, o tenei tino ra: ko te tino ra tenei i anga nui atu ai te Kingi o Papurona ki Hiruharama.
- 3
- Korerotia hoki tetahi kupu whakarite ki te whare whakakeke, mea atu ki a ratou, Ko te kupu tenei a te Ariki a Ihowa; Whakaekea te kohua, whakaekea, ringitia ano hoki he wai ki roto.
- 4
- Kohikohia ano hoki ona wahi ki roto, nga wahi pai katoa, te huha, te peke whakakīa ki nga wheua pai rawa.
- 5
- Tikina te hipi pai rawa, me haupu ano nga wheua ki raro i a ia, kia nui te koropuputanga, kia kohuatia ano hoki e ratou ona wheua ki roto.
- 6
- Na, ko te kupu tenei a te Ariki a Ihowa, Aue te mate mo te pa toto, mo te kohua, kei roto nei i a ia tona huka, kihai nei tona huka i riro atu i roto i a ia! whakaputaina mai ki waho tenei wahi ona, tenei wahi ona; kaua tetahi rota ona e makā.
- 7
- No te mea kei roto i a ia ana toto, kua waiho e ia ki runga ki te tihi o te kamaka; kihai i ringitia e ia ki runga ki te whenua, kihai i hipokina ki te puehu;
- 8
- He mea kia puta ake ai te weriweri ki te rapu utu; kua waiho e ahau ana toto ki runga ki te tihi o te kamaka, kei hipokina.
- 9
- No reira tenei kupu a te Ariki a Ihowa, Aue te mate mo te pa toto! ka whakanuia ano e ahau tona puranga wahie.
- 10
- Purangatia te wahie, whakaungia te ahi, kia poto rawa nga kiko; meatia marietia ki te kinaki kakara, kia wera ano hoki nga wheua.
- 11
- Ka tu kau, whakaturia ki runga ki ona ngarahu, kia mahana ai tona parahi, kia wera ai, kia rewa ai tona poke i roto, kia poto ai te huka.
- 12
- Ka hoha i te mamahi, heoi kihai tona huka nui i riro atu i roto i a ia: ma te ahi ano tona huka.
- 13
- Kei roto i to poke to tikanga puremu: na, mea noa ahau i a koe kia ma, a kihai koe i ma; mo reira e kore to poke e whakamakia a muri ake nei, kia meinga ra ano e ahau taku riri kia tau iho ki runga ki a koe.
- 14
- Naku na Ihowa te kupu: ka rite, ka mahia ano e ahau, e kore taku e taka, e kore ano ahau e manawapa, e kore ano hoki ahau e ripeneta; ka rite ki o ara, ka rite ano hoki ki o mahi ta ratou whakarite whakawa mou, e ai ta te Ariki ta Ihowa.
- 15
- I puta mai ano te kupu a Ihowa ki a au; i mea,
- 16
- E te tama a te tangata, ka tangohia mai e ahau i tou taha ta o kanohi i hiahia atu ai, ka whakapangia ki te mate: kaua ano ia e uhungatia, kaua ano e tangihia, kaua ano o roimata e puta.
- 17
- Kati te tangi, kauaka he uhunga tupapaku; herea to tupare ki runga i a koe, hungia ano hoki ou hu ki o waewae, kaua ano o ngutu e araia, kaua ano e kainga te taro tangata.
- 18
- Na, i korero ahau ki te iwi i te ata; a i te ahiahi ka mate toku hoa wahine: na, i te ata ka meatia e ahau te mea i whakahaua mai ki a au.
- 19
- Na, ko te meatanga mai a te iwi ki a au, E kore ianei e korerotia mai e koe ki a matou, he aha mo matou ena mea e meatia na e koe?
- 20
- Ano ra hoki ko ahau ki a ratou, I puta mai te kupu a Ihowa ki a au, i mea,
- 21
- Mea atu ki te whare o Iharaira, Ko te kupu tenei a te Ariki a Ihowa; Tenei au te whakapoke nei i taku wahi tapu, i to koutou kaha whakaharahara, i ta o koutou kanohi e hiahia nei, i te mea e manawapatia ana e to koutou wairua: na, a koutou tamariki, a koutou tamahine, i mahue nei ki a koutou, ka hinga ratou i te hoari.
- 22
- A ta koutou e mea ai ka rite ki taku i mea nei: e kore o koutou ngutu e araia, e kore ano koutou e kai i te taro tangata.
- 23
- E mau ano o koutou tupare ki o koutou māhunga, o koutou hu ano hoki ki o koutou waewae; e kore koutou e uhunga, e kore e tangi; engari ka memeha atu koutou i runga i ā koutou he, ka koingo ano hoki ki tetahi, ki tetahi.
- 24
- A ka ai a Ehekiere hei tohu ki a koutou: ka rite ki nga mea katoa i mea ai ia ta koutou e mea ai: ka pa mai tenei, ka mohio koutou ko te Ariki ahau, ko Ihowa.
- 25
- Na, ko koe, e te tama a te tangata, he teka ianei i te ra e tangohia atu ai e ahau to ratou kaha, to ratou koa whakakororia, ta o ratou kanohi e hiahia ai, ta o ratou ngakau e okaka tonu ai, a ratou tamariki, a ratou tamahine,
- 26
- I taua rangi ano ka haere mai te mea i mawhiti ki a koe kia rongo ai o taringa?
- 27
- I taua rangi ano ka puaki to mangai ki te tangata i mawhiti, a ka korero koe, kore ake ou wahangu, ka ai hoki koe hei tohu ki a ratou; a ka mohio ratou ko Ihowa ahau.
Address: 
Phone: 
Email: