Ezekiel Chapter 31 - Paipera Tapu 1868 | Te Paipera Tapu 1868

Ezekiel Chapter 31 - Paipera Tapu 1868

1
I te tekau ma tahi o nga tau, i te toru o nga marama, i te tuatahi o nga ra o te marama, ka puta mai te kupu a Ihowa ki a au; i mea ia,
2
E te tama a te tangata, mea atu ki a Parao kingi o Ihipa, ratou ko ana mano tini; I a koe e nui na ko wai to rite?
3
Nana, he hita te Ahiriana i Repanona, he pai nga manga, pururu tonu, marumaru tonu, roa rawa, purero rawa; i roto ano tona kouru i nga manga pururu.
4
Nui tonu ia, na te wai hoki, roa tonu, he mea na te wai hohonu, i rere hoki ona awa i tetahi taha o ona mahuri, i tetahi taha; i tukua atu ano ana awa ririki ki nga rakau katoa o te parae.
5
No reira roa rawa ia, purero rawa ki runga ake i nga rakau katoa o te parae, kua maha ano ona peka, kua roa ona manga, he maha hoki no nga wai, i a ia e kokiri ake ana.
6
I hangā o ratou ohanga e nga manu katoa o te rangi ki ona peka, i whanau ano hoki nga kirehe katoa o te parae ki raro i ona manga, i noho ano nga iwi nui katoa ki raro i tona taumarumarunga iho.
7
Na, ataahua tonu ia, i a ia i nui ra, i te roa hoki o ona manga, i te taha hoki o nga wai nui tona pakiaka.
8
Kihai ia i ngaro i nga hita o to te Atua kāri; kihai nga kauri i rite ki ona peka, kihai ano nga hetenati i rite ki ona manga; kahore he rakau o te kāri a te Atua hei rite mona; i a ia i ataahua tonu ra.
9
I meinga ia e ahau kia ataahua tonu i te maha o ona manga: a hae mai ana nga rakau katoa o Erena, i te kāri a te Atua ki a ia.
10
Na, ko te kupu tenei a te Ariki a Ihowa; Na, kua tiketike na koe, kua roa, a kokiri atu ana tona kouru ki roto ki nga manga pururu, a, neke ake ana tona ngakau i a ia i tiketike ra;
11
Mo reira ka tukua atu ia e ahau ki te ringaringa o te mea kaha o nga tauiwi; ka nui ta tera mahi ki a ia; he kino nona i peia ai ia e ahau.
12
Heoi hatepea atu ana ia e nga tautangata, e nga mea nanakia o nga iwi, whakarerea iho; kua taka ona rārā ki runga ki nga maunga, ki nga awaawa katoa; kua whatiwhatīa ano hoki ona manga ki te taha o nga awa katoa o te whenua; kua heke mai ano nga iwi katoa o te whenua i tona taumarumarunga iho, whakarerea ake e ratou.
13
Kei runga i a ia, ina hinga, he kāinga mo nga manu katoa o te rangi, ka noho ano hoki nga kirehe katoa o te parae ki runga ki ona manga;
14
He mea kei neke ake, kei purero ki runga tetahi o nga rakau i te taha o nga wai, kei kokiri ake ano hoki o ratou kouru ki roto ki nga manga pururu, kei tu hoki, kei teitei nga rakau katoa e inu wai ana: kua tukua atu nei hoki ratou katoa ki te mate, ki nga wahi o raro rawa o te whenua, ki roto ki nga tamariki a te tangata, ki te hunga e heke atu ana ki te rua.
15
Ko te kupu tenei a te Ariki a Ihowa; I te ra i heke atu ai ia ki te rua i meinga ia e a hau kia tangihia; he whakaaro ki a ia i hipokina ai e ahau te rire, i puritia ai ona awa; nga wai nui mau rawa: a meinga ana e ahau a Repanona kia tangi ki a ia, nga rakau katoa ano hoki o te parae ngohe kau ki a ia.
16
Ru ana nga iwi i te haruru o tona hinganga, i taku makanga atu i a ia ki raro ki te reinga, ratou tahi ano ko te hunga e heke atu ana ki te rua: nga rakau katoa ano hoki o Erena, nga mea whiriwhiri, nga mea papai o Repanona, nga mea katoa e inu ana i te wai, ka whai whakamarietanga ratou i nga wahi o raro rawa o te whenua.
17
I heke atu ano ratou hei hoa mona ki te reinga, ki te hunga kua patua ki te hoari; ratou ko te hunga i waiho nei hei ringa mona, i noho nei i raro i tona taumarumarunga iho i waenganui o nga tauiwi.
18
Ko wai hei rite mou, te kororia, te nui, i roto i nga rakau o Erena? heoi ka makā ngatahitia koutou ko nga rakau o Erena ki nga wahi o raro rawa o te whenua: ka takoto koe i roto i te hunga kokoti-kore, i roto i te hunga i patua ki te hoari. Ko Parao tenei, ratou ko ana mano tini katoa, e ai ta te Ariki ta Ihowa.