- 1
- Na, poropiti atu, e te tama a te tangata, ki nga maunga o Iharaira, mea atu, E nga maunga o Iharaira, whakarongo ki te kupu a Ihowa.
- 2
- Ko te kupu tenei a te Ariki a Ihowa; Na, kua mea nei te hoa riri ki a koutou, Ha, kua riro mai ano hoki mo tatou nga pukepuke onamata.
- 3
- Mo reira, poropiti atu, mea atu, Ko te kupu tenei a te Ariki a Ihowa; Na, kua meinga na koutou kia tu kau, a horomia ana koutou i tetahi taha, i tetahi taha, i riro ai koutou ma nga toenga o nga iwi, i hapainga ake ai e nga ngutu o nga arero kapetau, i korerotia kinotia ai koutou e te iwi.
- 4
- Mo reira, e nga maunga o Iharaira, whakarongo ki te kupu a te Ariki a Ihowa; Ko te kupu tenei a te Ariki a Ihowa, ki nga maunga, ki nga pukepuke, ki nga awa, ki nga awaawa, ki nga ururua kua takoto kau, ki nga pa kua mahue, kua riro nei hei pahuatanga, hei katanga mai ma nga toenga o nga iwi i tetahi taha, i tetahi taha;
- 5
- Na, ko te kupu tenei a te Ariki a Ihowa, He pono he ahi taku hae i a au i korero i te he mo nga toenga o nga iwi, mo Irumea katoa ano hoki; mo ta ratou meatanga i toku whenua hei kāinga mo ratou, pau katoa hoki o ratou ngakau ki te koa, kino tonu te hinengaro, he meatanga hoki kia peia atu, kia waiho hei taonga pārau.
- 6
- Na, poropititia te whenua o Iharaira, ki atu ki nga maunga, ki nga pukepuke, ki nga awa, ki nga awaawa, Ko te kupu tenei a te Ariki a Ihowa; Nana, kua korero ahau i runga i taku hae, i taku weriweri, no te mea e wahā ana e koutou te whakama o nga tauiwi.
- 7
- Na, ko te kupu tenei a te Ariki a Ihowa; Kua ara toku ringa, He pono, nga iwi i tetahi taha o koutou i tetahi taha, ka wahā e ratou to ratou whakama.
- 8
- Ko koutou ia, e nga maunga o Iharaira, ka wana o koutou manga, ka whai hua ano hoki koutou ma toku iwi ma Iharaira; ka tata hoki ratou te puta.
- 9
- No te mea, na, ka aro atu ahau ki a koutou, ka tahuri atu ano ahau ki a koutou, a ka ngakia koutou, ka whakatōkia.
- 10
- Ka whakatokomahatia ano e ahau nga tangata ki a koutou, te whare katoa o Iharaira, ratou katoa, a ka nohoia nga pa, ka hangā ano hoki nga wahi kua ururuatia.
- 11
- Ka whakatokomahatia ano e ahau nga tangata ki a koutou, me nga kararehe ano, a ka tini ratou, ka hua, ka meinga ano koutou e ahau kia nohoia, kia pera me to mua, pai atu hoki i to o koutou timatanga taku e mea ai ki a koutou: a ka mohio koutou ko Ihowa ahau.
- 12
- Ka meinga ano koutou e ahau kia haereerea e te tangata, e taku iwi, e Iharaira; ka riro ano koe i a ratou, ka waiho ano koe hei kāinga tupu mo ratou, a heoi ano matenga o a ratou tamariki i a koe.
- 13
- Ko te kupu tenei a te Ariki a Ihowa; Na, kua korerotia nei koutou, He kai tangata koe, e te whenua, e whakamate ana i nga tamariki a o iwi;
- 14
- Na, e kore koe e kai tangata a muri ake nei, e kore ano e hinga i a koe o iwi a muri nei, e ai ta te Ariki ta Ihowa.
- 15
- E kore ahau e mea kia rangona i roto i a koe te whakama o nga iwi a muri nei, e kore ano e wahā e koe i nga wa i muri te tawai a nga iwi, e kore ano o iwi e hinga i a koe, a ake ake ake, e ai ta te Ariki ta Ihowa.
- 16
- A i puta mai ano te kupu a Ihowa ki a au, i mea,
- 17
- E te tama a te tangata, i te nohoanga o te whare o Iharaira i to ratou oneone, i whakapokea a reira e ratou ki ta ratou ara, ki ā ratou mahi: to ratou ara i toku aroaro rite tonu ki te poke o te wahine e paheke ana.
- 18
- Na, ringitia ana e ahau taku weriweri ki runga ki a ratou, mo te toto hoki i ringitia e ratou ki runga ki te whenua, mo a ratou whakapakoko ano hoki i whakapokea ai a reira e ratou.
- 19
- A whakamararatia atu ana ratou e ahau ki roto ki nga iwi, titaritaria atu ana ki nga whenua; rite tonu ki to ratou ara, ki ā ratou mahi taku whakarite whakawa mo ratou.
- 20
- A to ratou taenga atu ki nga iwi i haere atu ai ratou, na, whakanoatia ana e ratou toku ingoa tapu, i a ratou i ki mai ra ki a ratou, Ko te iwi tenei a Ihowa, i haere mai ano ratou i tona whenua.
- 21
- Heoi i whai whakaaro ahau ki toku ingoa tapu i whakanoatia nei e te whare o Iharaira i roto i nga tauiwi i haere atu ai ratou.
- 22
- Mo reira, ki atu ki te whare o Iharaira; Ko te kupu tenei a te Ariki a Ihowa; Ehara i te mea he whakaaro ki a koutou i mea ai ahau i tenei, e te whare o Iharaira; engari ki toku ingoa tapu i whakanoatia nei e koutou i roto i nga tauiwi i haere atu ai koutou.
- 23
- Ka whakatapua ano e ahau toku ingoa nui i whakanoatia nei i roto i nga tauiwi, ta koutou ra i whakanoa i roto i a ratou; a ka mohio nga tauiwi ko Ihowa ahau; e ai ta te Ariki ta Ihowa, ina whakatapua ahau i roto i a koutou i to koutou aroaro.
- 24
- Ka tangohia mai hoki koutou e ahau i roto i nga tauiwi, ka whakaminea mai ano koutou i nga whenua katoa, ka kawea mai ano koutou e ahau ki to koutou oneone.
- 25
- Ka tāuhiuhia atu ano koutou e ahau ki te wai ma, a ka ma koutou: ka whakamākia koutou e ahau, a kore iho o koutou poke katoa, a koutou whakapakoko katoa.
- 26
- Ka hoatu ano e ahau he ngakau hou ki a koutou, ka hoatu ano e ahau he wairua hou ki roto ki a koutou; ka tangohia atu ano hoki e ahau te ngakau kohatu i roto i o koutou kikokiko, a ka hoatu he ngakau kikokiko ki a koutou.
- 27
- Ka hoatu ano hoki e ahau toku wairua ki roto ki a koutou, a ka meinga koutou e ahau kia haere i runga i aku tikanga, ka puritia ano hoki e koutou aku whakariteritenga, ka mahia.
- 28
- A ka noho koutou ki te whenua i hoatu e ahau ki o koutou mātua, ko koutou ano hoki hei iwi moku, a ko ahau hei Atua mo koutou.
- 29
- Ka whakaorangia ano koutou e ahau i o koutou poke katoa: ka karangatia atu ano hoki e ahau te witi, ka whakamahā, e kore ano te hemo-kai e tukua atu e ahau ki a koutou.
- 30
- Ka whakamahā ano e ahau nga hua o te rakau me nga mau ano o te mara, e kore ai koutou e pangia e te tawai hemo-kai a muri ake nei i roto i nga tauiwi.
- 31
- Katahi koutou ka mahara ki o koutou ara kino, ki ā koutou mahi kahore nei e pai, a ki ta koutou titiro ake he mea anuanu koutou mo a koutou kino, mo a koutou mea whakarihariha.
- 32
- Ehara i te mea he whakaaro ki a koutou i mea ai ahau i tenei, e ai ta te Ariki ta Ihowa, kia mohio mai koutou: kia whakama koutou, kia numinumi kau ki ā koutou ara, e te whare o Iharaira.
- 33
- Ko te kupu tenei a te Ariki a Ihowa; I te rangi e whakamākia atu ai e ahau a koutou he katoa, ka whakanohoia ano koutou e ahau ki nga pa, a ka hangā nga wahi kua ururuatia.
- 34
- Na, te whenua i takoto kau ka ngakia; i mua hoki he ururua ki te titiro mai a te hunga katoa e tika ana na reira.
- 35
- A ka korerotia, Tenei whenua i takoto kau ra, kua rite ki te kāri o Erena; nga pa ano hoki kua ururuatia ra, era i takoto kau ra, nga mea pakaru, kua oti te taiepa, e nohoia ana.
- 36
- A ka mohio nga iwi kua mahue i tetahi taha o koutou, i tetahi taha, e hangā ana e ahau e Ihowa nga wahi kua pakaru, e whakatōkia ana e ahau nga wahi e takoto kau ana: naku na Ihowa te kupu, maku ano e mahi.
- 37
- Ko te kupu tenei a te Ariki a Ihowa; Tenei ake ka uia mai tenei ki a au e te whare o Iharaira, kia meatia ki a ratou; ka whakatokomahatia ratou e ahau me te mea he kahui te tangata.
- 38
- Ka rite ki te kahui tapu, ki te kahui o Hiruharama i ana hakari nui; ka pena ano nga pa kua ururuatia, ka kapi i nga kahui tangata, a ka mohio ratou ko Ihowa ahau.
Address: 
Phone: 
Email: