- 1
- I puta mai ano te kupu a Ihowa ki a au, i mea,
- 2
- E te tama a te tangata, anga atu to mata ki Koko ki te whenua o Makoko, ki te tino rangatira o Meheke, o Tupara, poropititia hoki he hē mona;
- 3
- Mea atu hoki, Ko te kupu tenei a te Ariki a Ihowa; Nana, hei hoa riri tenei ahau mou, e Koko, e te tino rangatira o Meheke, o Tupara:
- 4
- Ka whakatahuritia ano koe e ahau, ka makā ano nga matau e ahau ki o kauae, ka whakaputaina ano koe e ahau ki waho, me to ope katoa, nga hoiho, me nga kai eke hoiho ratou katoa, he pai rawa nei o ratou kakahu, he whakaminenga nui, he puapua, he whakangungu rakau a ratou, e rahurahu katoa ana ratou i te hoari.
- 5
- Hei hoa mo ratou a Pahia, a Etiopia, a Putu; rite katoa ratou i te whakangungu rakau, i te potae whawhai:
- 6
- A Komere, me ona ropu katoa, te whare o Tokarama o nga taha ki te nota, ratou ko ona ope katoa: koutou tahi ko nga iwi maha.
- 7
- Kia rite, kia rite nga mea māu, e koe, me to whakaminenga katoa kua whakamine mai nei ki a koe, ko koe ano hoki hei kai tiaki mo ratou.
- 8
- Ka maha nga rangi ka tikina atu koe, ka tirohia: i nga tau whakamutunga ka tae koe ki te whenua i whakahokia mai i te hoari, i kohikohia mai i roto i nga iwi maha, tatau ai ki nga maunga o Iharaira kua waiho noa ake nei hei ururua, i te mea ka oti te whakaputa mai i roto i nga iwi, a e noho humarie ana ratou katoa.
- 9
- To whakaekenga mai, to haerenga mai, rite tonu ki te paroro; ka rite koe ki te kapua e taupoki ana i te whenua, a koe, me o ropu katoa, koutou tahi ko nga iwi maha.
- 10
- Ko te kupu tenei a te Ariki a Ihowa; Na, i taua rangi ka puta ake nga mea ki roto ki to ngakau, ka whakaaroa ano hoki e koe he whakaaro hē:
- 11
- A ka mea koe, Ka haere atu ahau ki te whenua i nga pa taiepa-kore; ka tae atu ahau ki te hunga e ata noho ana, e noho humarie ana, ratou katoa i a ratou e noho mai nei kahore he taiepa, kahore hoki o ratou tutaki, kahore he keti,
- 12
- Ki te pahua i nga taonga, ki te tango i nga mea parakete; tahuri tonu atu to ringa ki nga wahi ururua kua nohoia, ki te iwi ano hoki kua oti te kohikohi mai i roto i nga tauiwi, a kua whiwhi ki nga kararehe, ki nga taonga, a e noho ana i waenganui o te whenua.
- 13
- Ka mea a Hepa, a Rerana, ratou ko nga kai hokohoko o Tarahihi, me nga kuao raiona katoa ano o reira ki a koe, Kua tae mai ranei koe ki te pahua taonga? Kua whakaminea ranei e koe to whakaminenga ki te tango i nga mea parakete, ki te mau atu i te hiriwa, i te koura, ki te tango atu i nga kararehe, i nga taonga, ki te pahua i nga taonga maha?
- 14
- Mo reira poropiti atu, e te tama a te tangata, mea atu ki a Koko, Ko te kupu tenei a te Ariki a Ihowa, I te rangi e noho humarie ai toku iwi a Iharaira, e kore ianei e mohiotia e koe?
- 15
- Tera ano koe ka haere mai i to wahi i nga taha o te nota, koutou tahi ano ko nga iwi maha, ratou katoa i runga i nga hoiho, he whakaminenga nui, he ope nui.
- 16
- Ka whakaekea ano hoki e koe toku iwi a Iharaira, me te mea he kapua e taupoki ana i te whenua; ka oti tena i nga rangi whakamutunga; ka kawea atu ano koe e ahau ki toku whenua, kia mohio ai nga tauiwi ki a au, ina ka whakatapua ahau i runga i a koe i ta ratou tirohanga ano, e Koko.
- 17
- Ko te kupu tenei a te Ariki a Ihowa; Ko koe ranei tena i korerotia e ahau, ara, e aku pononga, e nga poropiti o Iharaira, i nga ra o namata? i poropititia hoki e ratou i aua rangi, (he maha nga tau,) taku kawenga atu i a koe ki a ratou.
- 18
- Na, i taua rangi, i te rangi e haere mai ai a Koko ki te whenua o Iharaira, e ai ta te Ariki ta Ihowa; ka puta ake ano toku weriweri ki toku mata.
- 19
- Kua korero hoki ahau i runga i toku hae, i runga i te ahi a taku riri, He pono i taua rangi ka nui te ru ki te whenua o Iharaira.
- 20
- A ka wiri nga ika o te moana ki toku aroaro, nga manu ano o te rangi, nga kirehe o te parae, nga mea ngokingoki katoa e ngokingoki ana i runga i te whenua, me nga tangata katoa ano hoki i runga i te mata o te whenua, ka turakina iho ano hoki nga maunga, ka hinga nga pikitanga, ka hinga ano hoki nga taiepa katoa ki te whenua.
- 21
- Ka karangatia ano e ahau he hoari hei patu mona, puta noa i oku maunga katoa, e ai ta te Ariki ta Ihowa; te hoari a te tangata ka anga atu ki tona hoa.
- 22
- Taku mea ano hei totohe ki a ia, he mate uruta, he toto; ka uaina iho ano e ahau he ua, he waipuke, he whatu nui, he ahi, he whanariki, ki runga ki a ia, ki runga ki ana ropu, ki runga ano ki nga iwi maha e whai ana i a ia.
- 23
- Na, ka whakanui ahau i a au, ka whakatapu ano ahau i a au; ka mohiotia ano hoki ahau i te tirohanga mai a nga iwi maha, a ka mohio ratou ko Ihowa ahau.
Address: 
Phone: 
Email: