Ezekiel Chapter 43 - Paipera Tapu 1868 | Te Paipera Tapu 1868

Ezekiel Chapter 43 - Paipera Tapu 1868

1
Muri iho ka kawea atu ahau e ia ki te kuwaha, ki te kuwaha e anga ana ki te rawhiti.
2
Na, ko te kororia o te Atua o Iharaira e puta mai ana i te ara ki te rawhiti, tona reo rite tonu ki te haruru o nga wai maha: mārama tonu te whenua i tona kororia.
3
Tona rite kei te ahua o te whakaputanga Atua i kitea e ahau, rite tonu ki te whakaputanga Atua i kitea e ahau i a au e haere ana ki te whakangaro i te pa, rite tonu ano hoki nga whakaputanga mai ki nga whakaputanga i kitea e ahau ki te awa ki Kepara: a takoto tapapa atu ana ahau.
4
Na, kua tae te kororia o Ihowa ki roto ki te whare; i tika na te ara o te kuwaha e anga ana ki te rawhiti.
5
Katahi ahau ka hapainga ake e te Wairua, kawea ana ahau e ia ki to roto marae. Na kua kī te whare i te kororia o Ihowa.
6
I rongo ano ahau i a ia e korero mai ana ki a au i roto i te whare: tu tonu ano hoki te tangata i toku taha.
7
Na, ko tana meatanga mai ki a au; E te tama a te tangata, Ko te wahi tenei i toku torona, ko te wahi ano i nga kapu o oku waewae, ko te wahi e noho nei ahau i waenganui o nga tamariki a Iharaira, a, ake, ake, e kore ano toku ingoa tapu e whakapokea i muri nei e te whare o Iharaira, e ratou, e o ratou kingi, ki a ratou puremutanga, ki nga tinana ranei o o ratou kingi i runga i o ratou wahi tiketike.
8
I ta ratou whakanohoanga i ā ratou paepae ki te taha o aku paepae, i ā ratou pou ano hoki ki te taha o aku pou, a ko te taiepa anake hei wehe i a au, i a ratou, i whakapokea e ratou toku ingoa tapu ki ā ratou mea whakarihariha i mahia nei e ratou; a pau ake ratou i a au, i a au e riri ana.
9
Na, kia wehea atu e ratou a ratou mahi puremu me nga tinana o o ratou kingi, kia matara atu ena i a au, a ka noho ahau ki waenganui i a ratou, a ake ake ake.
10
Na, e te tama a te tangata, whakakitea atu e koe te whare ki te whare o Iharaira, kia whakama ai ratou ki o ratou he; kia whanganga ano te tauira e ratou.
11
A, ki te whakama ratou ki nga mea katoa i mea ai ratou, whakakitea atu ki a ratou te ahua o te whare, tona tikanga, ona putanga atu, ona tapokoranga ki roto, ona ahua katoa, ona ritenga katoa ano hoki, me ona ahua katoa, me ona ture katoa, tuhituhia ano hoki ki to ratou aroaro, kia mau ai i a ratou tona ahua katoa me ona ritenga katoa, kia mahia ai ano hoki e ratou.
12
Ko te ture tenei o te whare; Kia tapu rawa nga taha katoa i runga i te tihi o te maunga, a tawhio noa. Nana, ko te ture tenei o te whare.
13
Ko nga roa ano enei o te aata, ara, nga whatianga: He tino whatianga, he whatianga ringaringa ano kei roto i te whatianga kotahi; na, a raro he whatianga, te whanui he whatianga, tona taha i tona niao he whanganga ringaringa a tawhio noa: ko te wahi o runga rawa tenei o te aata.
14
Na, te turanga i runga i te whenua, haere ake ki to raro papa, e rua nga whatianga, te whanui kotahi te whatianga; to te papa i raro tae noa ki te papa nui e wha nga whatianga, te whanui kotahi te whatianga.
15
Na, e wha nga whatianga o te aata; kia wha ano nga haona i te aata, he mea e anga ana whakarunga.
16
Kia tekau ma rua nga whatianga te roa o te aata, kia tekau ma rua te whanui, he taha-wha i ona taha e wha.
17
Na, te papa, kia tekau ma wha nga whatianga te roa, kia tekau ma wha ano te whanui o ona taha e wha: te niao i tona taha hei te hawhe whatianga; tona turanga, kia kotahi te whatianga, a tawhio noa: kia anga ano hoki tona pikitanga ki te rawhiti.
18
I ki mai ano ia ki a au, E te tama a te tangata, Ko te kupu tenei a te Ariki a Ihowa, Ko nga tikanga tenei o te aata i te ra e hangā ai hei whakaekenga atu mo te tahunga tinana, hei tāuhiuhinga atu ano hoki mo te toto.
19
Me hoatu ano e koe he puru, he kuao, hei whakahere hara ki nga tohunga, ki nga Riwaiti, ki nga uri o Haroko, e whakatata mai ana ki a au minita ai, e ai ta te Ariki ta Ihowa.
20
Me tango ano e koe tetahi wahi o ona toto, ka pani atu ki ona haona e wha, ki nga koki e wha ano hoki o te papa, ki te taha ano hoki a tawhio noa: na ka purea taua aata e koe, ka meinga kia ma.
21
Me tiki ano e koe te puru, te whakahere hara, a me tahu e ia ki te wahi o te whare i whakaritea i waho o te wahi tapu.
22
Na, i te rua o nga ra me whakahere he puru, he kuao koati, he mea koha-kore, hei whakahere hara, a ka purea te aata, ka peratia me ta ratou purenga ki te kau.
23
Ka oti te pure e koe, me whakahere e koe he kuao kau, he mea koha-kore, me tetahi hipi toa o te kahui, ki te mea koha-kore.
24
Me whakahere e koe ki te aroaro o Ihowa, me maka ano e nga tohunga he tote ki runga, ka whakaeke atu ai hei tahunga tinana ki a Ihowa.
25
E whitu nga rangi e meatia mai ai e koe he hipi hei whakahere hara i tenei ra, i tenei ra, me mea mai ano e ratou he kuao puru, me tetahi hipi toa o te kahui, he mea koha-kore.
26
E whitu nga ra e tahia ai e ratou te poke o te aata, e purea ai; me whakatohunga ano ratou i a ratou ano.
27
A ka poto enei ra, na, i te waru o nga ra, i o muri iho ano hoki, ka mahia e nga tohunga a koutou tahunga tinana ki runga ki te aata, me a koutou whakamarietanga ano: a ka manako ahau ki a koutou, e ai ta te Ariki ta Ihowa.