- 1
- I puta mai ano te kupu a Ihowa ki a au; i mea,
- 2
- Na, e te tama a te tangata, ko te kupu tenei a te Ariki a Ihowa ki te oneone o Iharaira; He whakamutunga! kua tae mai te whakamutunga ki nga pito e wha o te whenua.
- 3
- Ko anaianei te whakamutunga mou, ka ungā atu ano e ahau taku riri ki runga ki a koe; ka rite ano ki o huarahi taku whakarite i te whakawa mou, ka tukua ano e ahau o mea whakarihariha katoa ki runga ki a koe.
- 4
- E kore ano toku kanohi e manawapa ki a koe, e kore ano ahau e tohu: engari ka hoatu e ahau te utu o ou ara ki a koe; ka mau ano hoki o mea whakarihariha ki roto i a koe, a ka mohio koutou ko Ihowa ahau.
- 5
- Ko te kupu tenei a te Ariki a Ihowa; He kino! he kino kotahi! nana, te haere mai nei.
- 6
- Kua tae mai te whakamutunga! kua tae mai te whakamutunga! e whanga mai ana ki a koe; nana, kua tae mai.
- 7
- Kua tae mai te puaotanga ki a koe, e te tangata o te whenua, kua tae mai te wa, kua tata te ra o te raruraru, ehara ano i te parikarangaranga no nga maunga.
- 8
- Akuanei ka tata te ringitia atu e ahau taku weriweri ki runga ki a koe, ka whakapaua atu ano e ahau taku riri ki a koe; ka rite ano ki o huarahi taku whakarite i te whakawa mou, ka hoatu ano e ahau he utu ki a koe mo o mea whakarihariha katoa.
- 9
- E kore ano toku kanohi e manawapa, e kore ano hoki ahau e tohu; ka rite ki o huarahi taku e hoatu ai ki a koe, ka mau ano o mea whakarihariha ki waenganui i a koe, a ka mohio koutou ko ahau, ko Ihowa, te kai whiu.
- 10
- Nana, te ra, nana, kua tae mai, kua puta te ata, kua puawai te tokotoko, kua kopuku te whakapehapeha.
- 11
- Kua neke ake te mahi nanakia, kua waiho hei tokotoko mo te kino: e kore e toe tetahi o ratou, tetahi o to ratou mano, tetahi ranei o o ratou mea nge nui; e kore ano ratou e tangihia.
- 12
- Kua tae mai te wa, kua tata te ra; kaua te kai hoko e koa; kaua ano hoki te tangata nana te mea i hokoa e pouri: no te mea ka pa te riri ki runga ki tona mano katoa.
- 13
- No te mea ahakoa i te ora ratou e kore te tangata i te utu e hoki atu ki te mea i hokona; mo ona mano katoa hoki te whakakitenga mai; e kore ratou e hoki, e kore ano tetahi e whai kaha i runga i tona he i a ia nei i te ora.
- 14
- Kua whakatangihia e ratou te tētere, kia takatu ai te katoa; heoi kahore he tangata e haere ana ki te whawhai; no te mea kei runga taku riri i ona mano katoa.
- 15
- I waho ko te hoari, i roto ko te mate uruta, ko te hemo-kai. Te tangata i te parae ka mate i te hoari; te tangata i te pa ka pau i te hemo-kai, i te mate uruta.
- 16
- Nga morehu o ratou, ka mawhiti, ka noho ki runga ki nga maunga, ka rite ratou ki nga kukupa o nga awaawa, tumutumu katoa ratou i runga i tona he, i tona he.
- 17
- Ngoi-kore katoa nga ringaringa, nga turi katoa kei te wai te rite.
- 18
- Ka whitikiria ano hoki e ratou te kakahu taratara ki a ratou, ka taupokina ano hoki ratou e te wehi, he whakama kei nga mata katoa, i runga i o ratou māhunga katoa ko te pakira.
- 19
- Ka makā e ratou ta ratou hiriwa ki nga huarahi, ka waiho ano hoki ta ratou koura hei mea poke; e kore ta ratou hiriwa, ta ratou koura, e tau hei whakaora i a ratou i te ra o ta Ihowa whakatakariri; e kore e makona o ratou wairua i ta ratou, e kore ano e ki o ratou puku; no te mea ko te tūtukitanga waewae ia i he ai ratou.
- 20
- Na, te ataahua o tona whakapaipai, he mea whakatu nana ki runga ki te kororia: heoi hangā ana e ratou nga ahua o a ratou mea anuanu, o a ratou mea whakarihariha, ki taua mea: no reira meinga iho e ahau taua mea hei mea poke ki a ratou.
- 21
- Ka tukua atu ano hoki e ahau hei taonga parakete ki te ringaringa o nga tangata ke, ki nga tangata kino ano hoki o te whenua, hei taonga pārau, a ka whakapokea e ratou.
- 22
- Ka tahuri atu ano hoki toku mata i a ratou, a ka whakapokea e ratou toku wahi ngaro; ka tae mai ano hoki nga kai wawahi ki reira whakapoke ai.
- 23
- Hangā he mekameka: kua ki hoki te whenua i nga he toto; kī tonu hoki te pa i te mahi nanakia.
- 24
- Ka kawea mai ano e ahau nga tauiwi kino rawa, a ka riro o ratou whare i a ratou: ka mutu ano i a au te whakapehapeha o te hunga kaha, ka whakapokea ano hoki o ratou wahi tapu.
- 25
- Kei te haere mai te whakangaromanga; ka rapua ano hoki e ratou te rangimarie; heoi kahore noa iho.
- 26
- Ka tae mai te aitua ki runga ki te aitua, te rongo ki runga ki te rongo; a ka rapua e ratou ta te poropiti whakakitenga; heoi ka whakakahoretia he ture ma te tohunga, he whakaaro ma nga kaumatua.
- 27
- Ka tangi ano te kingi, ko te whakangaromanga ano hoki te kakahu mo nga rangatira, ka ohooho ano nga ringaringa o te iwi o te whenua; ka rite ki o ratou ara taku e mea ai ki a ratou, kei a ratou ritenga ano hoki he ritenga mo taku whakawa i a ratou; a ka mohio ratou ko ahau a Ihowa.
Address: 
Phone: 
Email: