- 1
- Na, ko taku kupu tenei, I te mea he tamariki nei ano te tangata mona te kāinga, kahore ia e rereke i te pononga, ahakoa ko te rangatira ia o nga mea katoa;
- 2
- Engari e meatia ana e nga kai tohutohu e nga kai titiro, kia taea ra ano te wa i whakaritea e te pāpā.
- 3
- Whaihoki ko tatou, i te mea he tamariki, he pononga tatou na nga mea timatanga o te ao:
- 4
- Tena ka tutuki te taima, ka tonoa mai e te Atua tana Tama, he whanau na te wahine, hei mahi i ta te ture,
- 5
- Hei hoko i te hunga i raro i te ture, kia whiwhi ai tatou ki te whakatamarikitanga.
- 6
- A no te mea he tamariki nei koutou, kua tonoa mai e te Atua te Wairua o tana Tama ki roto ki o koutou ngakau, e karanga ana, E Apa, e Pa.
- 7
- Na, mutu ake tou ponongatanga, engari he tamaiti koe; a ki te mea he tamaiti, mou hoki nga mea a te Atua i roto i a te Kairaiti.
- 8
- Heoi i reira i te mea kihai koutou i mātau ki te Atua, he pononga koutou na nga mea ehara nei i te atua tupu.
- 9
- Inaianei ia i te mea ka mātau koutou ki te Atua, engari ano ka matauria e te Atua, he aha koutou ka tahuri ai ano ki aua mea ngoikore, ki aua mea rawakore, ki nga mea timatanga, e hoki nei ano to koutou hiahia kia waiho koutou hei pononga ma aua mea?
- 10
- E mau ana koutou ki nga ra, ki nga marama, ki nga wa, ki nga tau.
- 11
- E manawapa ana ahau ki a koutou, kei kore he hua mo taku i mahi ai i roto i a koutou.
- 12
- E aku teina, ko taku tohe tenei ki a koutou, kia rite koutou ki a au; e rite ana hoki ahau ki a koutou: kahore a koutou hē ki a au.
- 13
- E mātau ana koutou he mea na te ngoikore o toku kikokiko, taku kauwhau i te rongo pai kia koutou i mua.
- 14
- Heoi kihai koutou i whakahawea i whakakino ki taku whakamatautauranga i toku kikokiko: na, tahuri mai ana koutou ki a au, ano he anahera na te Atua, me te mea ano ko Ihu Karaiti.
- 15
- He haringa pehea ra tera o koutou? He kai whakaatu hoki ahau mo ta koutou, me i taea kua hikarohia e koutou o koutou kanohi, a kua homai ki a au.
- 16
- Koia, kua hoariritia ranei ahau ki a koutou, moku i korero i te pono ki a koutou?
- 17
- E matenui ana ratou kia koutou, otiia ehara i te pai: engari e mea ana ratou kia tutakina atu koutou, kia matenui ai koutou ki a ratou.
- 18
- He mea pai ia te matenui i runga i te pai i nga wa katoa, kauaka ano hoki i toku nohoanga anake ki a koutou.
- 19
- E aku tamariki, ka rua nei oku mamaetanga mo koutou, ano he wahine e whanau ana, kia whai ahua ra ano a te Karaiti i roto i a koutou.
- 20
- He hiahia toku kia tae atu ki a koutou aianei, kia puta ke ano toku reo; no te mea e ruarua ana ahau ki a koutou.
- 21
- Ki mai ki a au, e te hunga e hiahia ana kia noho i raro i te ture, kahore ianei koutou e rongo ki ta te ture?
- 22
- Kua oti hoki te tuhituhi, tokorua nga tamariki a Aperahama, kotahi na te pononga, kotahi na te wahine rangatira.
- 23
- Ta te pononga, no te kikokiko tona whanautanga; a, ta te wahine rangatira he mea korero mai i mua.
- 24
- Na, he mea whakarite aua mea: ko nga kawenata e rua hoki enei; kotahi no maunga Hina, a whanau ake ana hei taurekareka, ko Akara tenei.
- 25
- Ko tenei Akara hoki ko maunga Hina i Arapia, a e rite ana ki Hiruharama onaianei, he pononga nei hoki ia ratou ko ana tamariki.
- 26
- Tena ko Hiruharama i runga he mea here-kore, ko te whaea ia o tatou katoa.
- 27
- Kua oti hoki te tuhituhi, Kia hari, e te pākoko kahore nei e whanau; hamama, karanga, e te mea kahore nei kia whakamamae; he tini hoki nga tamariki a te mea mahue i a te mea whai tāne.
- 28
- Na, tatou nei, e aku teina, a rite ana ki a Ihaka, he tamariki na te kupu whakaari.
- 29
- A, e rite ana ano ki to mua, tera no te kikokiko nei tona whanautanga whakatoia ana e ia te tamaiti no te Wairua nei tona; e pera ana ano inaianei.
- 30
- Heoi e pehea ana ta te Karaipiture? Peia atu te wahine pononga raua ko tana tama: e kore hoki te tama a te wahine pononga raua ko te tama a te wahine rangatira e whiwhi tahi ki te taonga.
- 31
- Na, ehara tatou, e aku teina, i te tamariki na te wahine pononga, engari na te wahine rangatira.
Address: 
Phone: 
Email: