Genesis Chapter 11 - Paipera Tapu 1868 | Te Paipera Tapu 1868

Genesis Chapter 11 - Paipera Tapu 1868

1
A kotahi ano te reo o te whenua katoa, rite tonu ano hoki nga korero.
2
A i a ratou e haere mai ana i te taha ki te rawhiti, na, ka kite ratou i tetahi mania i te whenua o Hinara; a noho ana i reira.
3
Na, ka mea ratou ki tona hoa ki tona hoa, Tena, tatou ka hanga pereki, me ata tahu marire ano hoki. Na, ka meinga e ratou nga pereki hei kohatu, me te uku ano hoki hei moata ma ratou.
4
Na, ka mea ratou, Tena, tatou ka hanga i tetahi pa, me tetahi pourewa, a kia tutuki a runga ki te rangi; kia whai ingoa ai tatou, kei marara atu tatou ki te mata o te whenua katoa.
5
Na, ka heke iho a Ihowa kia kite i te pa, me te pourewa, i hangā nei e nga tamariki a te tangata.
6
A ka mea a Ihowa, Nana, kotahi ano te iwi nei, kotahi ano hoki to ratou reo; a ka timataia nei tenei mahi e ratou: a e kore ratou e taea te pehi, ki te whakaaro ratou kia mahia tetahi mea.
7
Tena, kia heke atu tatou, kia whakapoauau hoki i o ratou reo i reira, kei rongo ia tangata ia tangata ki te reo o tona hoa.
8
Na, whakamararatia atu ana ratou i reira e Ihowa ki runga ki te mata o te whenua katoa: a mahue ake i a ratou te hanga i te pa.
9
Na kona i huaina ai to reira ingoa ko Papera; no te mea i whakapoauautia e Ihowa i reira te reo o te whenua katoa: no reira ano hoki te whakamararatanga a Ihowa i a ratou ki te mata o te whenua katoa.
10
Ko nga whakatupuranga enei o Hema: ka kotahi rau nga tau o Hema, na, ka whanau a Arapahata i te rua o nga tau i muri iho i te waipuke:
11
A e rima rau nga tau i ora ai a Hema i muri iho i te whanautanga o tana tamaiti o Arapahata, a ka whanau ana tamariki me ana tamahine.
12
A ka toru tekau ma rima nga tau i ora ai a Arapahata, na, ka whanau a Haraha:
13
A e wha rau e toru nga tau i ora ai a Arapahata i muri iho i te whanautanga o tana tamaiti o Haraha, a ka whanau ana tamariki me ana tamahine.
14
A ka toru tekau nga tau i ora ai a Haraha, na, ka whanau a Epere:
15
A e wha rau e toru nga tau i ora ai a Haraha i muri iho i te whanautanga o tana tamaiti o Epere, a ka whanau ana tamariki me ana tamahine.
16
A ka toru tekau ma wha nga tau i ora ai a Epere, na, ka whanau a Pereke:
17
A e wha rau e toru tekau nga tau i ora ai a Epere i muri iho i te whanautanga o tana tamaiti o Pereke, a ka whanau ana tamariki me ana tamahine.
18
A ka toru tekau nga tau i ora ai a Pereke, na ka whanau a Reu:
19
A e rua rau e iwa nga tau i ora ai a Pereke i muri iho i te whanautanga o tana tamaiti o Reu, a ka whanau ana tamariki me ana tamahine.
20
A ka toru tekau ma rua nga tau o Reu, na ka whanau a Heruka:
21
A e rua rau ma whitu nga tau i ora ai a Reu i muri iho i te whanautanga o tana tamaiti o Heruka, a ka whanau ana tamariki me ana tamahine.
22
A ka toru tekau nga tau o Heruka, na ka whanau tana tamaiti a Nahora:
23
A e rua rau nga tau i ora ai a Heruka i muri iho i te whanautanga o tana tamaiti a Nahora, a ka whanau ana tamariki me ana tamahine.
24
A e rua tekau ma iwa nga tau i ora ai a Nahora, a ka whanau tana tamaiti a Teraha:
25
A kotahi rau kotahi tekau ma iwa nga tau i ora ai a Nahora i muri iho i te whanautanga o tana tamaiti a Teraha, a ka whanau ana tamariki me ana tamahine.
26
A ka whitu tekau nga tau i ora ai a Teraha, na, ka whanau ana tamariki a Aperama, a Nahora, ratou ko Harana.
27
Na, ko nga whakatupuranga enei o Teraha: whanau ake a Teraha ko Aperama, ko Nahora, ratou ko Harana; a whanau ake ta Harana ko Rota.
28
A i mate a Harana i te oranga ano o tona papa o Teraha i te whenua i whanau ai ia, i Uru o nga Karari.
29
Na, ka tango a Aperama raua ko Nahora i etahi wahine ma raua: te ingoa o te wahine a Aperama ko Harai, a te ingoa o te wahine a Nahora ko Mireka, ko te tamahine ia a Harana, a te papa o Mireka, ko ia ano hoki te papa o Iheka.
30
A he pakoko ano a Harai; kahore ana tamariki.
31
Na, ka tango a Teraha i a Aperama i tana tamaiti, raua ko Rota ko te tamaiti a Harana, ko te tamaiti a tana tama, ratou ko tana hunaonga ko Harai wahine a tana tamaiti a Aperama; whakatika tahi atu ana ratou i Uru o nga Karari, haere ana ki te whenua o Kanaana; na, ka tae mai ratou ki Harana, a noho ana i reira.
32
A e rua rau ma rima tau nga ra o Teraha: na, ka mate a Teraha ki Harana.