Genesis Chapter 15 - Paipera Tapu 1868 | Te Paipera Tapu 1868

Genesis Chapter 15 - Paipera Tapu 1868

1
Muri iho i enei mea ka puta moemoea mai te kupu a Ihowa ki a Aperama, a ka mea, Kaua e wehi, e Aperama: ko ahau tou whakangungu rakau, me tou utu nui whakaharahara.
2
Na, ka mea a Aperama, E te Ariki e Ihowa, ko te aha e homai e koe ki a au i ahau ka riro urikore nei, a kei tenei Erietera o Ramahiku nga tikanga o toku whare?
3
A i mea ano a Aperama, Titiro hoki, kahore nei i homai e koe he uri ki a au: a, akuanei, kei tetahi tamaiti o toku whare te mahuetanga iho o oku taonga.
4
Na, ka puta mai ano te kupu a Ihowa ki a ia, ka mea, E kore e mahue iho o taonga ma tenei; engari ka mahue iho ma tetahi e puta mai i roto i ou whekau.
5
Na, ka kawea ia e ia ki waho, a ka mea mai, Tena tirohia atu te rangi, taua hoki nga whetu, ki te taea ena e koe te tatau: a ka mea mai ia ki a ia, Ka penei tou uri.
6
A i whakapono atu ia ki a Ihowa, a ka whakairia mai ki a ia hei tika.
7
A i mea mai ano ia ki a ia, Ko ahau a Ihowa i kawe mai nei i a koe i Uru o nga Karari, kia hoatu ki a koe tenei whenua hei kāinga pumau.
8
Ano ra ko ia, E te Ariki, e Ihowa, ma te aha ka mohio ai ahau ka riro mai tenei i a au?
9
Na, ka mea mai ia ki a ia, Tikina atu tetahi kau maku, hei te tau-toru, me tetahi koati uha, hei te tau-toru, me tetahi hipi toa hei te tau-toru, me tetahi kukupa, me tetahi pi kukupa.
10
Na, tikina ana e ia aua mea katoa, a tapahia ana i waenganui, a whakatakotoria ana nga wahi kia rite mai ki a raua whakawahi: ko nga manu ia kihai i tapahia e ia.
11
A ka rere iho nga manu ki nga tinana, ka aia atu ratou e Aperama.
12
A i te rerenga o te ra, ka au te moe o Aperama; na, ko te ihiihi me te pouri kerekere e tau iho ana ki a ia.
13
A ka mea mai ia ki a Aperama, Kia tino mohio koe ka noho manene tou uri ki te tahi whenua ehara nei i a ratou, a ka mahi ki a ratou; a e wha rau nga tau e whakatupuria kinotia ai ratou;
14
A ka whakawakia ano hoki e ahau te iwi e whakamahia ai ratou: a muri iho ka puta mai ratou me nga taonga maha.
15
Ko koe ia ka haere marie atu ki ou mātua; ka pai to koroheketanga a tanumia noatia koe.
16
Kei te wha ia o nga whakatupuranga ka hoki mai ratou ki konei: no te mea kahore ano kia tutuki noa te hara o nga Amori.
17
A i te rerenga o te ra, no ka pouri, na, ko te oumu paowa, me te rama e ka ana, e tika ana i waenganui o aua porohanga.
18
I taua rangi ano ka whakaritea e Ihowa he kawenata ki a Aperama, a ka mea, Ka hoatu e ahau tenei whenua ki tou uri, o te awa o Ihipa mai ra ano, a, tae noa ki te awa nui, ki te awa ki Uparati:
19
Nga Keni, nga Keniti, nga Karamoni,
20
Nga Hiti, nga Perihi, nga Repaima.
21
Nga Amori, nga Kanaani, nga Kirikahi, me nga Iepuhi.