- 1
- Na, ka tirohia mai a Hara e Ihowa, ka peratia me tana i korero ai, rite tonu ki tana kupu ta Ihowa i mea ai ki a Hara.
- 2
- Na, ka hapu a Hara, a ka whanau ta raua tamaiti ko Aperahama i tona koroheketanga, i te wa ano i whakaritea e te Atua ki a ia.
- 3
- Na, huaina iho e Aperahama ko Ihaka hei ingoa mo tana tamaiti i whanau nei mana, i whanau nei ma raua ko Hara.
- 4
- A ka waru ona ra, na, ka kotia e Aperahama a Ihaka tana tamaiti, ka peratia me ta te Atua i whakahau mai ai ki a ia.
- 5
- A kotahi rau nga tau o Aperahama, i te whanautanga o tana tamaiti o Ihaka.
- 6
- Na, ka mea a Hara, Kua meinga nei ahau e te Atua kia kata, a ka kata tahi matou ko nga tangata katoa e rongo mai ana.
- 7
- A i mea ano ia, Ko wai o mua hei mea ki a Aperahama, tera e whakangote tamariki a Hara? kua whanau nei hoki ta maua tamaiti, i a ia kua koroheketia.
- 8
- Na, ka tupu te tamaiti, a ka whakamutua tana kai u: a ka tukua e Aperahama tetahi hakari nui i te ra i whakamutua ai te ngote a Ihaka.
- 9
- A, ka kitea e Hara te tamaiti a Hakara a te wahine o Ihipa, i whanau nei i a raua ko Aperahama, e kata ana.
- 10
- Na ka mea atu ia ki a Aperahama, Peia atu tenei pononga me tana tamaiti: e kore hoki te tamaiti a tenei wahine pononga e tu tahi me taku tamaiti me Ihaka i nga whakarerenga iho.
- 11
- A he mea he rawa taua mea ki te titiro a Aperahama, ko tana tamaiti hoki ia.
- 12
- Na, ka mea mai te Atua ki a Aperahama, Kei kino tena ki to titiro, kaua e whakaaro ki te tamaiti, raua ko to pononga wahine; whakarongo atu ki tona reo i nga mea katoa i korero ai a Hara ki a koe; ta te mea kei a Ihaka te karangatanga mo to uri.
- 13
- Na, te tamaiti ano hoki a te pononga wahine, ka meinga ia e ahau hei iwi, no te mea he uri ia nou.
- 14
- Na, ka maranga wawe a Aperahama i te ata, a ka mau ki tetahi taro, me tetahi tahā wai, a hoatu ana e ia ki a Hakara, whakawahā ana ki tona pokohiwi, me te tamaiti hoki, a tonoa atu ana: na ka haere ia, a ka kopikopiko i te koraha o Peere-hepa.
- 15
- A, te potonga o te wai i roto i te tahā, na, whakarerea iho e ia te tamaiti i raro i tetahi rakau iti.
- 16
- Na, ka haere ia, a ka noho mai i tawhiti, me te aronui mai ano ki a ia, he pera te matara me te taunga pere: i mea hoki ia, Kei kite ahau i te matenga o te tamaiti. Na, ka noho ia me te aronui mai ano ki a ia, a ka puaki tona reo, ka tangi.
- 17
- A i rongo mai te Atua ki te reo a te tamaiti; a ka karanga iho te anahera a te Atua ki a Hakara i runga i te rangi, a ka mea ki a ia, He aha kei a koe, e Hakara? kaua e wehi; kua rongo hoki te Atua ki te reo o te tamaiti i a ia e takoto ra.
- 18
- Whakatika, hapainga ake te tamaiti, puritia hoki ki to ringa; no te mea ka meinga ia e ahau hei iwi nui.
- 19
- Na ka whakatirohia e te Atua ona kanohi, a ka kitea e ia tetahi puna wai: na, ka haere atu ia, a ka whakakiia e ia te tahā ki te wai, a whakainumia ana te tamaiti.
- 20
- A i noho ano te Atua ki te tamaiti; a ka tupu ia, ka noho hoki ki te koraha, a ka nui tona mohio ki te kopere.
- 21
- Na, ka noho ia ki te koraha o Parana: a ka tikina atu e tona whaea tetahi wahine mana i te whenua o Ihipa.
- 22
- A, i taua wa ano ka korero mai a Apimereke, raua ko Pikorā ko te rangatira o tana ope, ki a Aperahama, ka mea, Kei a koe nei te Atua i nga mea katoa e mea ai koe:
- 23
- Na, tena, oatitia mai te Atua ki a au i konei e kore koe e teka ki a au, ki aku tamariki hoki, me oku uri: engari ka rite ki te aroha whakaputaina atu e ahau ki a koe to mahi ki a au, ki te whenua ano hoki i noho nei koe.
- 24
- Na, ka mea atu a Aperahama, Ka oati ahau.
- 25
- Na, ka whakawa a Aperahama i a Apimereke mo tetahi puna wai i tangohia e nga tangata o Apimereke.
- 26
- Na, ka mea mai a Apimereke, Kahore ahau e mohio na wai ranei tenei mahi: kihai ano hoki i korerotia mai e koe ki a au, heoi ano hoki aku rongonga ko tenei inaianei.
- 27
- Na, ka mau a Aperahama ki etahi hipi me etahi kau, a ka hoatu e ia ki a Apimereke; a ka whakarite kawenata raua.
- 28
- Na, ka wehea e Aperahama ki tahaki e whitu nga reme uha o nga hipi.
- 29
- A ka mea mai a Apimereke ki a Aperahama, Hei aha enei reme e whitu i wehea nei e koe ki tahaki?
- 30
- A ka mea atu ia, Me tango hoki e koe enei reme e whitu i toku ringa, kia ai enei mea hei whakaatu maku, naku i keri tenei poka.
- 31
- No reira i huaina ai e ia taua wahi ko Peere-hepa; no raua hoki i oati ki reira.
- 32
- Heoi whakaritea ana e raua te kawenata i Peere-hepa: a, ka whakatika a Apimereke, raua ko Pikora ko te rangatira o tana ope, a hoki ana ki te whenua o nga Pirihitini.
- 33
- Na, ka whakatokia e ia he ngahere ki Peere-hepa, a ka karanga i reira ki te ingoa o Ihowa o te Atua ora tonu.
- 34
- A he maha nga ra i noho ai a Aperahama ki te whenua o nga Pirihitini.
Address: 
Phone: 
Email: