- 1
- A i kawea a Hohepa ki raro ki Ihipa a ka hokona e Potiwhara e tetahi o nga tangata nui a Parao, he rangatira ia no nga kai tiaki, he Ihipiana, i roto i nga ringaringa o nga Ihimeeri o nga kai kawe i a ia ki reira.
- 2
- A i a Hohepa a Ihowa, a he tangata whai mana ia; a i noho ano ia i roto i te whare o tona ariki o te Ihipiana.
- 3
- A i kite tona ariki kei a ia a Ihowa, a pono tonu i a Ihowa nga mahi katoa a tona ringa.
- 4
- Na, ka manakohia mai a Hohepa e ia, a ka mahi ia ki a ia: a ka waiho ia hei kai tirotiro mo tona whare, a ka homai e ia ana mea katoa ki tona ringaringa.
- 5
- A i a ia ka waiho nei hei kai tirotiro mo tona whare, mo ana mea katoa, na, ka manaakitia e Ihowa te whare o te Ihipiana he whakaaro hoki ki a Hohepa; a i runga i ana mea katoa te manaakitanga a Ihowa, i te whare, i te mara hoki.
- 6
- A i waiho ano e ia i te ringaringa o Hohepa ana mea katoa; kihai ano hoki i mohiotia e ia tetahi o ana mea, heoi ano ko te taro i kai ai ia. A he ahua pai to Hohepa, he pai hoki ia ki te titiro atu.
- 7
- A i muri iho i enei mea, na, ka anga mai nga kanohi o te wahine a tona ariki ki a Hohepa; a ka mea ia, Kia takoto taua.
- 8
- A ka whakakahore ia, ka mea hoki ki te wahine a tona ariki, Na, e kore toku ariki e mohio ko te aha kei a au i roto i te whare, kua homai nei hoki e ia ana mea katoa ki toku ringaringa;
- 9
- Kahore tetahi i roto i tenei whare e nui ana i a au; kahore ano hoki i kaiponuhia mai e ia tetahi mea ki a au, ko koe anake, no te mea ko tana wahine koe: na, me pehea e mahi ai ahau i tenei kino nui, e hara ai ki te Atua?
- 10
- Heoi, korero noa ia ki a Hohepa i tenei ra i tenei ra, a kihai ia i rongo ki a ia, kia takoto tahi raua, kia noho tahi raua.
- 11
- Na, i taua wa ano ka haere mai a Hohepa ki te whare ki te mahi i tana mahi; a kahore te tahi o nga tangata o te whare i reira i roto i te whare.
- 12
- Na, ka hopukia ia e ia ka mau ki tona kakahu, a ka mea mai, Takoto taua: na, ka whakarerea atu e ia tona kakahu ki tona ringa, a rere ana, puta ana ki waho.
- 13
- A, tona kitenga kua whakarerea e ia tona kakahu i roto i tona ringa, a kua rere ki waho,
- 14
- Na, ka karanga atu ia ki nga tangata o tona whare, a ka korero ki a ratou, ka mea, Titiro, kua kawea mai e ia tetahi Hiperu hei maminga i a tatou; i haere mai ia ki a au kia takoto maua, a he rahi toku reo ki te hamama atu:
- 15
- A ka rongo ia he rahi toku reo ki te hamama atu, na, ka whakarerea e ia tona kakahu ki a au, a rere ana, puta ana ki waho.
- 16
- Na, ka waiho e ia tona kakahu ki tona taha, kia hoki mai ra ano tona ariki ki tona whare.
- 17
- A ka korero atu ia ki a ia, ko aua kupu ra ano, ka mea, I haere mai ki a au taua pononga Hiperu, i kawea mai nei e koe ki a matou, ki te maminga i a au:
- 18
- A ka rahi toku reo ki te hamama, na, ka whakarere ia i tona kakahu ki a au, a rere ana ki waho.
- 19
- A ka rongo tona ariki i nga kupu a tana wahine, i korero ai ia ki a ia, i mea ai, Ko nga mea enei i mea ai to pononga ki a au; na, ka mura tana riri.
- 20
- Na, ka mau te ariki o Hohepa ki a ia, a makā ana ia ki te whare herehere, ki te wahi i herea ai nga herehere a te kingi: a noho ana ia i reira i te whare herehere.
- 21
- A i a Hohepa a Ihowa, a ka whakaputaina mai e ia he aroha ki a ia, a i tuku mai ia ki a ia kia manakohia e te rangatira o te whare herehere.
- 22
- A i tukua mai e te rangatira o te whare herehere ki te ringaringa o Hohepa nga herehere katoa i roto i te whare herehere: a ko ia ano te kai mahi o nga mea katoa i meatia e ratou i reira.
- 23
- Kihai te rangatira o te whare herehere i titiro ki tetahi o nga mea i tona ringa; no te mea i a ia a Ihowa, a i mea ano a Ihowa kia pono nga mea i mea ai ia.
Address: 
Phone: 
Email: