Genesis Chapter 41 - Paipera Tapu 1868 | Te Paipera Tapu 1868

Genesis Chapter 41 - Paipera Tapu 1868

1
A ka tino taka nga tau e rua, na, ka moe a Parao: Na, i te tu ia i te taha o te awa.
2
Na, ko te putanga ake o nga kau e whitu i roto i te awa, he ahua pai, e whai kiko ana; a ka kai ratou i roto i nga wiwi.
3
Na, ko te putanga ake ano o etahi kau e whitu i muri i a ratou i roto i te awa, he ahua kino, he kiko-kore; a tu ana ratou i te taha o era kau i te pareparenga o te awa.
4
Na, ka kainga e nga kau ahua kino, kiko-kore, nga kau ahua pai e whitu, nga mea momona. A ka ara ake a Parao.
5
A ka parangia ano ia, na, ko te rua o ana moe: na, ko te putanga ake o nga puku witi e whitu, kotahi ano hoki te kakau, he mea whai kiko, he pai.
6
Na, ko nga puku e whitu e tupu ake ana i muri i era atu, he mea kiko-kore, he mea ngingio i te marangai.
7
A horomia ake nga puku whai kiko e whitu, nga mea whai kai, e nga puku kiko-kore e whitu. A, te aranga ake o Parao, na, he moe!
8
A i te ata, na, ka pororaru tona wairua; a ka tono tangata ki te karanga i nga tohunga maori katoa o Ihipa, me nga mea mohio katoa o reira: korerotia atu ana tana moe e Parao ki a ratou; otiia kihai i taea e tetahi te whakaatu i te tikanga o aua moe ki a Parao.
9
Na, ka korero mai te tino kai riringi waina ki a Parao, a ka mea, Katahi ahau ka mahara ki oku he.
10
I riri mai a Parao ki ana pononga, a i tuku i a au kia puritia ki roto ki te whare o te rangatira o nga kai tiaki, ahau me te tino kai hanga taro.
11
Na, ka moe maua i tetahi moe, kotahi hoki te po, ahau, a ia hoki; i moe maua, ahau, a ia, me te tikanga ano o a maua moe.
12
A i reira ano i a maua te tahi tamaiti Hiperu, he pononga na te rangatira o nga kai tiaki; a ka korerotia atu e maua ki a ia, a whakaaturia mai ana e ia te tikanga o a maua moe ki a maua; rite tonu tana whakaaturanga ki ta tera moe, ki taku.
13
A tika tonu tana i whakaatu mai ai ki a maua; ko ahau i whakahokia e ia ki taku mahi, ko tera i taronatia.
14
Na, ka tono tangata mai a Parao, hei karanga i a Hohepa, a ka hohoro ratou te kawe mai i a ia i roto i te whare herehere: na, ka heu ia i a ia, a ka tango ke mai i etahi kakahu mona, a haere mai ana ki a Parao.
15
A ka mea mai a Parao ki a Hohepa, I moe ahau i tetahi moe, a kahore he tangata hei whakaatu i tona tikanga: a kua tae mai to rongo ki a au, e korerotia ana e mohio ana koe ki te moe, ki te whakaatu hoki i tona tikanga.
16
Na, ka whakahokia atu e Hohepa ki a Parao, a ka mea, Ehara i a au: ma te Atua e whakahoki atu te kupu pai ki a Parao.
17
Na, ka mea mai a Parao ki a Hohepa, I a au e moe ana, na, e tu ana ahau i te pareparenga o te awa:
18
Na, ko te putanga ake o nga kau e whitu i roto i te awa, he mea whai kiko, he ahua pai; a i te kai ratou i roto i nga wiwi:
19
Na, ko te putanga ake ano o etahi atu kau e whitu i muri i era, he hiroki, he ahua kino noa iho, he kiko-kore, kahore ahau i kite i to ratou rite te kino, i te whenua katoa o Ihipa;
20
Na, ka kainga nga kau e whitu o mua, nga mea momona, e nga kau hiroki e nga mea kino;
21
A to ratou toremitanga ki roto i a ratou, e kore e mohiotia kua toremi ratou ki roto i a ratou; he kino tonu hoki to ratou ahua, he pera me to te timatanga. Na, ka ara ahau.
22
A i kite ano ahau i a au e moe ana, a ko nga puku witi e whitu e tupu ake ana i te kakau kotahi, he mea whai kai, he mea pai:
23
Na, ko nga puku e whitu, nga mea taramore, nga mea kiko-kore, i ngingio nei i te marangai, e tupu ake ana i muri i aua puku;
24
A horomia ake nga puku papai e whitu e nga puku kiko-kore: na, ka korerotia e ahau ki nga tohunga maori; a kahore tetahi tangata hei whakaatu mai i tona tikanga ki a au.
25
Na, ko te meatanga mai a Hohepa ki a Parao, Te moe a Parao kotahi tonu: e whakaaturia mai ana e te Atua ki a Parao nga mea e meatia ana e ia.
26
Ko aua kau pai e whitu, e whitu nga tau; a, aua puku pai e whitu, e whitu nga tau: kotahi ano te moe.
27
A, aua kau hiroki e whitu, aua mea kino i puta ake ra i muri i a ratou, e whitu nga tau ena; ko aua puku witi e whitu hoki, aua mea i ngingio i te marangai, e whitu nga tau mate-kai ena.
28
Ko te mea tenei i korerotia atu nei e ahau ki a Parao: Ko ta te Atua e mea ai e whakakitea mai ana e ia ki a Parao.
29
Nana, e whitu nga tau e haere mai nei e nui ai te hua o te whenua katoa o Ihipa;
30
A e whitu nga tau mate-kai e ara ake i muri iho i era; a ka wareware katoa te hua i te whenua o Ihipa; a ka ngaro te whenua i te mate-kai;
31
A e kore taua hua e mohiotia e te whenua, i taua mate-kai hoki o muri iho; no te mea he tino nanakia.
32
A i tuaruatia ai te moe a Parao; he mea pumau hoki na te Atua, a ka hohoro ano te meatia e te Atua.
33
Na, kia tirohia iho e Parao tetahi tangata mohio, whai whakaaro, a kia tukua atu e ia nga tikanga o te whenua o Ihipa ki a ia.
34
Kia meatia tenei e Parao, kia whakaritea ano hoki e ia etahi kai tirotiro mo te whenua, a kia tangohia ano e ia te rima o nga wahi o te whenua o Ihipa i nga tau hua e whitu.
35
A kia kohia e ratou nga kai katoa o enei tau pai e haere ake nei, kia rongoatia hoki e ratou he witi ki raro i te ringa o Parao, kia tohungia ano hoki he kai e ratou i roto i nga pa.
36
Na, ka rongoatia taua kai ma te whenua, mo nga tau mate-kai e whitu e puta mai ana ki te whenua o Ihipa; a e kore e ngaro te whenua i te mate-kai.
37
A he pai taua mea ki te titiro iho a Parao, ki te titiro ano hoki a ona tangata katoa.
38
Na, ka mea mai a Parao ki ana tangata, E kitea ranei e tatou tetahi tangata penei, tetahi tangata kei a ia nei te wairua o te Atua?
39
A ka mea mai a Parao ki a Hohepa, Na, kua whakakitea nei e te Atua enei mea katoa ki a koe, a kahore he tangata hei rite mou, te mohio, te whai whakaaro:
40
Ko koe hei rangatira mo toku whare, a ma to kupu taku iwi katoa e tohutohu; ko te torona anake te mea e nui ake ai ahau i a koe.
41
A ka mea mai a Parao ki a Hohepa, Titiro, kua waiho nei koe e ahau hei rangatira mo te whenua katoa o Ihipa.
42
Na, ka tangohia e Parao tona mowhiti i tona ringaringa, a kuhua ana e ia ki te ringaringa o Hohepa, i whakakakahuria hoki ia e ia ki nga kakahu rinena ma, a whakaheia atu ana he hei koura ki tona kaki;
43
A i whakaekea ano ia e ia ki runga ki te rua o ana hariata; a ka karangatia ano e ratou i mua i a ia, Kia piko te turi: na, ka waiho ia e ia hei rangatira, mo te whenua katoa o Ihipa.
44
A i mea mai ano a Parao ki a Hohepa, Ko Parao ahau, a ki te kahore koe, e kore e ara ake te ringaringa, te waewae ranei, o tetahi tangata i te whenua katoa o Ihipa.
45
Na, ka huaina e Parao te ingoa o Hohepa Ko Tawhanata-paneaha; a i homai ano e ia hei wahine mana a Ahenata tamahine a Poti-whera tohunga o Ono. Na, ka haere atu a Hohepa, a puta noa i te whenua o Ihipa.
46
A e toru tekau nga tau o Hohepa i tona turanga ai i te aroaro o Parao o te kingi o Ihipa. Na, ka puta mai a Hohepa i te aroaro o Parao, a ka haere, a puta noa i te whenua katoa o Ihipa.
47
A i nga tau hua e whitu, me te mea he aohanga na te ringa te hua o te whenua.
48
Na, ka kohia e ia nga kai katoa o nga tau e whitu i puta ake ki te whenua o Ihipa, a rongoatia atu ana te kai ki roto ki nga pa: ko te kai o te mara i tetahi taha i tetahi taha o te pa, i rongoatia atu e ia ki roto ki taua pa ano.
49
Heoi amitia mai ana e Hohepa he witi, me te mea ko te onepu o te moana, he hira whakaharahara; a whakarerea noatia iho e ia te tatau; kahore hoki i taea te tatau.
50
Na, ka whanau nga tamariki tokorua a Hohepa, i te mea kahore ano kia puta noa mai nga tau mate-kai, i whanau hoki i a raua ko Ahenata tamahine a Poti-whera tohunga o Ono.
51
A i huaina e Hohepa te ingoa o te matamua ko Manahe: No te mea kua meinga ahau e te Atua kia wareware ki taku mamahi katoa, ki te whare katoa ano hoki o toku papa.
52
A i huaina e ia te ingoa o te tuarua ko Eperaima: Moku hoki i meinga e te Atua kia hua ki te whenua o toku tangihanga.
53
Na, ka taka nga tau hua e whitu i puta mai ra ki te whenua o Ihipa.
54
A ka timata nga tau mate-kai e whitu te puta mai, ka pera hoki me to Hohepa i korero ai: a i nga whenua katoa te mate-kai; ko te whenua katoa ia o Ihipa i whai taro.
55
A ka mate te whenua katoa o Ihipa i te kai, na, ka tangi atu te iwi ki a Parao ki te taro ma ratou: a ka mea mai a Parao ki nga Ihipiana katoa, Haere ki a Hohepa; me mea e koutou tana e mea ai ki a koutou.
56
A i runga i te mata katoa o te whenua te mate-kai: a ka wahia e Hohepa nga toa katoa, a hokona ana e ia ki nga Ihipiana; a he nanakia te mate-kai i te whenua o Ihipa.
57
A ka haere mai nga whenua katoa ki Ihipa ki a Hohepa ki te hoko witi; no te mea he nanakia rawa te mate-kai o nga whenua katoa.