- 1
- A he nanakia te mate-kai o te whenua.
- 2
- A i te paunga rawatanga o te witi i maua mai e ratou i Ihipa, na, ka mea mai to ratou papa ki a ratou, Hoki atu ki te hoko i tetahi kai ma tatou.
- 3
- A ka korero atu a Hura ki a ia, ka mea, I tino whakatupato taua tangata i a matou, i mea, E kore koutou e kite i toku mata ki te kahore to koutou teina i a koutou.
- 4
- Ki te tukua e koe to matou teina hei hoa mo matou, ka haere matou ki raro ki te hoko kai mau:
- 5
- A ki te kahore e tukua e koe, e kore matou e haere ki raro: no te mea i ki mai taua tangata ki a matou, E kore koutou e kite i toku mata ki te kahore to koutou teina i a koutou.
- 6
- Na, ka mea mai a Iharaira, Na te aha koutou i ngarahu kino ai ki a au, i whakaatu ai ki taua tangata he teina ano to koutou?
- 7
- A ka mea ratou, I tino ui taua tangata ki a matou aha noa, ki o matou whanaunga hoki, i mea mai, E ora ana ano ranei to koutou papa? tena ano ranei tetahi atu teina o koutou? a rite tonu ki enei kupu to matou i korero ai ki a ia: tera ranei matou e ata mohio ka ki mai ia, Kawea mai to koutou teina ki raro nei?
- 8
- Na, ka mea atu a Hura ki tona papa ki a Iharaira, Tukua te tamaiti ki a au, a ka whakatika matou, ka haere; kia ora ai tatou, kei mate tahi hoki matou me koe, me a matou potiki.
- 9
- Ko ahau hei utu mona; me rapu ia e koe i toku ringaringa: ki te kahore ahau e kawe mai i a ia ki a koe, e whakatu hoki i a ia ki tou aroaro, na, hei whakaheanga ahau mau i nga ra katoa:
- 10
- Me i kahore hoki matou i roa nei, kua rua enei hokinga mai o matou inaianei.
- 11
- Katahi ka mea mai a Iharaira to ratou papa ki a ratou, Ki te mea ra he penei te hanga, ko tenei to koutou e mea ai; maua atu etahi o nga hua papai o te whenua i roto i a koutou oko, kawea atu hoki he hakari ki raro ki taua tangata, tetahi wahi pama, me tetahi wahi honi, etahi paihe, me tetahi maira, etahi naiti, me etahi aramona:
- 12
- Kia takirua hoki nga hiriwa e maua atu i roto i o koutou ringaringa; me te moni i whakahokia mai i te waha o a koutou pēke, me whakahoki atu ano tena i roto i o koutou ringaringa; he he noa ano pea tena mea:
- 13
- Kawea atu ano hoki to koutou teina, a whakatika, hoki atu ano ki taua tangata:
- 14
- A ma te Atua kaha rawa e tuku mai ki a koutou kia arohaina mai e taua tangata, kia tonoa mai ano hoki e ia tera tuakana o koutou, raua ko Peniamine. Ko au hoki, ki te whakapania ahau, ka whakapania ahau.
- 15
- Na, ka mau aua tangata ki taua hakari, a e rua nga moni i maua atu e ratou i roto i o ratou ringaringa, me Peniamine hoki; a whakatika ana, haere ana ki raro ki Ihipa, a ka tu ki te aroaro o Hohepa.
- 16
- A ka kitea a Peniamine e Hohepa i roto i a ratou, na, ka mea atu ia ki te kai tohutohu o tona whare, Kawea ena tangata ki te whare, patua he kai, takā hoki; ka kai tahi hoki matou ko ena tangata ina tu te ra.
- 17
- Na, ka meatia e taua tangata ta Hohepa i ki ai; a ka kawea aua tangata e taua tangata ki te whare o Hohepa.
- 18
- Na, ka wehi aua tangata, mo ratou i kawea ki te whare o Hohepa; a mea ratou, Mo te moni i whakahokia i roto i a tatou pēke i te haerenga tuatahi tatou i kawea mai ai; kia whai take mai ai ia ki a tatou, mo tana rere mai ki a tatou ki te tango i a tatou hei pononga, me a tatou kaihe hoki.
- 19
- Na, ka whakatata mai ratou ki te kai tohutohu o te whare o Hohepa, a ka korero ki a ia i te kuwaha o te whare,
- 20
- Ka mea, E te ariki, i haere mai ano matou i mua ki te hoko kai;
- 21
- A to matou taenga atu ki te whare tira, ta matou whakatuwheratanga hoki i a matou pēke, na, ko te moni a tenei tangata a tenei tangata i te waha o tana pēke, ta matou moni, rite tonu hoki te taimaha: a kua whakahokia mai nei taua mea e matou i roto i o matou ringaringa.
- 22
- Kua kawea mai ano hoki e matou i roto i o matou ringaringa tetahi atu moni hei hoko kai: kahore matou e mohio na wai ranei i maka a matou moni ki roto ki a matou pēke.
- 23
- A ka mea atu ia, Kia tau te rangimarie ki a koutou, kaua e wehi: ai to koutou Atua, na te Atua hoki o to koutou papa i homai te taonga ki a koutou ki roto ki a koutou pēke: i tae mai ano ta koutou moni ki a au. A ka kawea mai e ia a Himeona ki a ratou.
- 24
- Na, ka kawe taua tangata i aua tangata ki te whare o Hohepa, a ka hoatu e ia he wai hei horoi mo o ratou waewae; a i hoatu ano e ia he kai ma a ratou kaihe.
- 25
- Na, ka takā e ratou te hakari mo te taenga mai o Hohepa i te awatea: i rongo hoki ratou me kai taro ratou ki reira.
- 26
- A i te taenga mai o Hohepa ki te whare, na, ka kawea mai e ratou ki a ia te hakari a o ratou ringaringa ki te whare, a ka piko iho ki a ia ki te whenua.
- 27
- Na, ka ui mai ia ki a ratou ki te pai, a ka mea, E pai ana ranei to koutou papa, te koroheke i korerotia mai ra e koutou? E ora ana ano ranei ia?
- 28
- A ka mea ratou ki a ia, E pai ana ano to pononga to matou papa, e ora ana ano ia. Na, ka tuohu ratou, ka piko iho.
- 29
- Na, ka maranga ake ona kanohi, ka kite ia i a Peniamine i tona teina i te tamaiti a tona whaea, a ka mea mai, Ko to koutou teina tenei, ko te mea nohinohi i korerotia mai ra e koutou ki a au? A i mea ano ia, Kia aroha te Atua ki a koe, e taku tamaiti.
- 30
- Na, ka hohoro a Hohepa; he tokonga ake hoki no tona puku aroha ki tona teina: a ka rapua e ia tetahi wahi hei tangihanga; a haere ana ia ki te ruma i roto, ki reira tangi ai.
- 31
- Na, ka horoi ia i tona mata, a ka puta mai ki waho, a ka whakamanawanui, a ka mea, Whakatakotoria he taro.
- 32
- Na, ka whakatakotoria e ratou mana ki a ia anake, a ma ratou ki a ratou anake, a ma nga Ihipiana, i kai tahi me ia, ki a ratou anake: no te mea hoki e kore e ahei i nga Ihipiana te kai taro tahi me nga Hiperu; he mea whakarihariha hoki tena ki nga Ihipiana.
- 33
- Na, ka noho ratou ki tona aroaro, to mua rite tonu ano ki tona muanga, to muri rite tonu ano ki tona muringa: a miharo ana aua tangata ki tetahi ki tetahi.
- 34
- Na, ka tuwhaina atu e ia etahi o nga wahi i tona aroaro ma ratou: a he nui rawa te wahi i a Peniamine; me i takirimatia te wahi a tetahi o ratou kua rite ki tana. Na, ka inu ratou, a ka koa tahi me ia.
Address: 
Phone: 
Email: