Genesis Chapter 48 - Paipera Tapu 1868 | Te Paipera Tapu 1868

Genesis Chapter 48 - Paipera Tapu 1868

1
A muri iho i enei mea, na ka korerotia mai ki a Hohepa, Nana, e mate ana to papa: na, ka tango ia i ana tamariki tokorua, i a Manahe raua ko Eperaima, hei hoa mona.
2
A ka korerotia atu ki a Hakopa, ka meatia atu, Na, ko Hohepa ko to tamaiti tenei te haere mai nei ki a koe: na, whakakaha ake a Iharaira i a ia, a ka noho ki runga i te moenga.
3
Na, ka mea mai a Hakopa ki a Hohepa, I puta mai te Atua Kaha rawa ki a au i Rutu i te whenua o Kanaana, a i manaaki i a au,
4
I mea mai ano hoki ki a au, Na, ka meinga koe e ahau kia hua, a ka whakanui i a koe, ka meinga hoki koe e ahau hei huinga iwi; a ka hoatu e ahau tenei whenua ki ou uri i muri i a koe hei kāinga pumau.
5
Na, o tamariki tokorua, a Eperaima raua ko Manahe, i whanau nei mau ki te whenua o Ihipa i mua ake o taku taenga mai ki a koe ki Ihipa, maku ena; ka riro mai raua i a au, ka pera ano me Reupena raua ko Himeona.
6
A, to whanau e whanau mau i muri iho i a raua, mau ena; ka karangatia ki a ratou te ingoa o o ratou tuakana i to ratou kāinga pumau.
7
Ko au hoki, i taku haerenga mai i Parana, ka mate a Rahera ki toku taha, ki te whenua o Kanaana, ki te ara, i te mea he nohinohi te wahi e haere ai ki Eparata: a tanumia ana e ahau ki reira ki te ara ki Eparata, ara, ki Pete-rehema.
8
A ka kite a Iharaira i nga tamariki a Hohepa, na, ka mea atu, Ko wai enei?
9
A ka mea mai a Hohepa ki tona papa, Ko aku tamariki enei i homai e te Atua ki a au i konei. A ka mea atu ia, Nekehia mai nei ki a au, kia manaaki ai ahau i a raua.
10
A he atarua nga kanohi o Iharaira, na te koroheke hoki, kihai ia i ahei te kite atu. Na, ka whakatata mai ia i a raua ki a ia; a ka kihi ia i a raua, ka awhi hoki i a raua.
11
Na, ka mea atu a Iharaira ki a Hohepa, Kihai ahau i mea ka kite ahau i tou mata: a kua whakakitea mai nei ano hoki e te Atua ou uri ki a au.
12
Na, ka nekehia atu raua e Hohepa i roto i ona turi, a ka piko iho tona mata ki te whenua.
13
Na, ka puritia atu raua e Hohepa, a Eperaima e tona ringa matau ki te maui o Iharaira, me Manahe e tona maui ki te matau o Iharaira, a ka whakatata atu ia i a raua ki a ia.
14
Na, ka torona mai tona ringa matau e Iharaira, a whakatakotoria atu ana e ia ki runga ki te matenga o Eperaima, ko ia ano hoki te teina, me tona ringa maui hoki ki runga ki te mātenga o Manahe, he ata whakatakoto hoki nana i ona ringa; ko Manahe hoki te matamua.
15
Na, ka manaaki ia i a Hohepa, a ka mea, Ma te Atua, i haereere nei oku mātua a Aperahama raua ko Ihaka ki tona aroaro, ma te Atua, nana nei ahau i whangai i a au i ora nei, a, taea noatia tenei ra,
16
Ma te Anahera nana nei ahau i whakaora i roto i nga he katoa, e manaaki enei tamariki; a kia karangatia toku ingoa ki a raua, me te ingoa hoki o oku mātua, o Aperahama raua ko Ihaka; a kia tino nui haere raua i waenganui i te whenua.
17
A te kitenga o Hohepa kua whakatakotoria e tona papa tona matau runga ki te mātenga o Eperaima, na, ka kino ki tana titiro iho: a ka puritia ake e ia te ringaringa o tona papa, kia nekehia atu e ia i te mātenga o Eperaima ki runga ki te mātenga o Manahe.
18
A ka mea a Hohepa ki tona papa, Kaua e pena, e toku papa; ko te tuakana hoki tenei: whakatakotoria to matau ki runga ki tona mātenga.
19
Na, ka whakakahore tona papa, a ka mea, E mohio ana ahau, e taku tamaiti e mohio ana ahau: ka whakatupu iwi ano tenei, ka nui ano hoki ia: otiia ka nui atu tona teina i a ia, a ka waiho ona uri hei iwi maha.
20
Na, ka manaaki ia i a raua i taua rangi, a ka mea, Ko koe ta Iharaira manaakitanga, a ka korerotia, Kia meinga koe e te Atua kia rite ki a Eperaima, kia rite hoki ki a Manahe: na, ka maka e ia a Eperaima ki mua i a Manahe.
21
Na, ka mea mai a Iharaira ki a Hohepa, Ka mate tenei ahau: a ka tata mai te Atua ki a koutou, ka whakahoki atu hoki i a koutou ki te whenua o o koutou mātua.
22
Na, kotahi te wahi ka hoatu nei e ahau mou, e hira ake ai tou i to ou tuakana, ko taku hoki i tango ai i nga Amori ki taku hoari ki taku kopere.