Genesis Chapter 6 - Paipera Tapu 1868 | Te Paipera Tapu 1868

Genesis Chapter 6 - Paipera Tapu 1868

1
A ka timata te tangata te tini haere ki runga ki te mata o te whenua, a ka whanau a ratou tamahine.
2
Na, te kitenga o nga tamariki a te Atua i nga tamahine a te tangata, e ataahua ana; ka tango i a ratou i pai ai o ratou katoa, hei wahine ma ratou.
3
Na, ka mea a Ihowa, E kore toku wairua e whakawa tonu i te tangata, he kikokiko nei hoki ia: na, kia kotahi rau kia rua tekau tau ona ra.
4
Na, he roroa nga tangata o te whenua i aua ra, i muri iho ano hoki, i te haerenga o nga tamariki a te Atua ki nga tamahine a te tangata, a ka whanau a ratou tamariki; ko ratou nga tangata marohirohi o mua, nga mea whai ingoa hoki.
5
A, te kitenga o te Atua kua nui te kino o te tangata i runga i te whenua, a he kino kau i nga ra katoa nga tokonga katoatanga ake o nga whakaaro a tona ngakau,
6
Na, ka puta ke te whakaaro a Ihowa i hangā ai e ia te tangata ki runga ki te whenua, a ka pouri a roto o tona ngakau.
7
Na, ka mea a Ihowa, Ka whakangaromia atu e ahau i te mata o te whenua te tangata i hangā e ahau; te tangata, te kirehe, te mea ngoki, me nga manu o te rangi; kua puta ke hoki taku whakaaro i hangā ai ratou.
8
Ko Noa ia, i manakohia mai e Ihowa.
9
Ko nga whakatupuranga enei o Noa: he tangata tika a Noa, he whakaaro tapatahi i ona whakatupuranga, a i haereere tahi a Noa i te Atua.
10
A whanau ake nga tamariki a Noa, tokotoru, ko Hema, ko Hama, ko Iapeta.
11
A ki ta Ihowa titiro kua he te whenua, kua ki hoki te whenua i te tutu.
12
A ka titiro mai te Atua ki te whenua, na, kua he; i he hoki te ara o nga kikokiko katoa o runga o te whenua.
13
Na, ka mea te Atua ki a Noa, Kua tae mai te mutunga o nga kikokiko katoa ki toku aroaro; no te mea e ki ana te whenua i te tutu i a ratou; na, ka whakangaro tenei ahau i a ratou tahi ko te whenua.
14
Hangā tetahi aaka mau, ki te kopera he rakau; me hanga e koe etahi ruma ki roto i te aaka, ka pani ai i roto i waho ki te ware.
15
A kia penei to hanganga i taua mea: Kia toru rau whatianga te roa o te aaka, kia rima tekau whatianga tona whanui, kia toru tekau whatianga tona teitei.
16
Me hanga e koe he matapihi mo te aaka, kia kotahi ano hoki te whatianga e whakaotia ai e koe a runga; a me whakanoho te tatau o te aaka ki tona taha; me hanga e koe to raro papanga ruma, te tuarua, me te tuatoru.
17
Ko au hoki, tenei ahau te tuku atu nei i te waipuke ki runga ki te whenua, hei whakangaro i nga kikokiko katoa e whai manawa ora ana i raro i te rangi; a ka mate nga mea katoa i runga i te whenua.
18
Otiia ka whakamanā ano e ahau taku kawenata ki a koe; a me haere koe ki roto ki te aaka, koutou tahi ko au tama, ko to wahine, ko nga wahine ano hoki a o tama.
19
Me etahi ano hoki o nga mea ora katoa o nga kikokiko katoa, kia rua o ia ahua o ia ahua e kawea o koe ki roto ki te aaka, kia ora tahi ai me koe; hei te tane hei te uha.
20
Etahi o nga manu o ia ahua o ia ahua, o nga kararehe ano hoki o ia ahua o ia ahua, o nga mea ngokingoki katoa o te whenua o ia ahua o ia ahua, kia takirua o te katoa e haere mai ki a koe, kia ora ai.
21
Tangohia mai ano hoki mau etahi o nga kai katoa e kainga ana, me amene mai hoki ki a koe; a hei kai tena mau, ma ratou hoki.
22
Na, ka meatia e Noa; rite tonu ki nga mea katoa i whakahaua mai e te Atua ki a ia tana i mea ai.