Habakkuk Chapter 3 - Paipera Tapu 1868 | Te Paipera Tapu 1868

Habakkuk Chapter 3 - Paipera Tapu 1868

1
He inoi na Hapakuku poropiti, ko Hikionoto te waiata.
2
E Ihowa, kua rongo ahau i to rongo, wehi ana ahau: E Ihowa, kia ora to mahi i waenganui o nga tau, kia mātauria i waenganui o nga tau; i te mea e riri ana mahara ki te tohu tangata.
3
I haere mai te Atua i Temana, te Mea Tapu i Maunga Parana. Hera. Hei hipoki tona kororia mo nga rangi; kī tonu te whenua i te whakamoemiti ki a ia.
4
Tona kanapatanga rite tonu ki to te māramatanga, he haona ona no roto ano no tona ringa: i reira ano te hunanga o tona kaha.
5
I mua i a ia te mate uruta e haere ana, i puta mai ano nga waro mura i ona waewae.
6
Tu ana ia, a whangāngā ana e ia te whenua, i titiro ia, a titaritaria ana e ia nga iwi, rererere ana nga maunga o namata, piko ana nga pukepuke o mua: ona ara he mea mau tonu.
7
I kitea e ahau nga teneti o Kuhana i raro i te he, wiri ana nga pāpa arai o te whenua o Miriana.
8
I whakatakariri ranei a Ihowa ki nga awa? ki nga awa ranei to riri? ki te moana ranei to riri? i haere ai koe i runga i o hoiho, i o hariata whakaora?
9
Takoto kau rawa i a koe to kopere, na nga oati hoki ki nga hapu, na to kupu. Hera. Wahia ana e koe nga awa o te whenua.
10
Te kitenga o nga maunga i a koe, wiri ana, ngawha tonu atu te waipuke, puaki ana te reo o te rire, ara ana ona ringa ki runga.
11
Tu ana te ra me te marama i to raua kāinga, haere ana ratou i te māramatanga o o pere, i te wherikotanga o to tao kanapa.
12
Haereerea ana e koe te whenua i runga i te whakatakariri, patua-a-wititia ana e koe nga iwi i runga i te riri.
13
Puta mai ana koe ki te whakaora i to iwi, ae ra, ki te whakaora, korua ano ko tau i whakawahi ai; pakaru ana i a koe te upoko o te whare o te hunga kino, takoto kau ana te turanga, a taea noatia iho te kaki. Hera.
14
Werohia ana e koe te upoko o ona pa koraha ki ona tokotoko: ano he paroro ratou e aki mai ana ki te titaritari i a au, to ratou koanga ngakau he kai puku i te rawa-kore.
15
Haere ano koe i waenga moana, o hoiho ano hoki, i te haupuranga o nga wai nui.
16
Taku rongonga, wiri ana toku kopu, oraora ana oku ngutu i te reo: ngoto ana te pirau ki roto ki oku wheua, a wiri ana a roto i a au, he mea ia e whai okiokinga ai ahau i te ra o te raru: i te haerenga ake ki te iwi ki te kai whakaeke mo ratou.
17
Ahakoa kore te piki e kopuku, kore nga waina te whai hua; a ka he te mahi oriwa, kahore ano hoki nga māra e whai kai, nga hipi poto ake i roto i nga taiepa, kahore hoki he kau i roto i nga taiepa kau:
18
Ka koa ano ahau ki a Ihowa, ka whakamanamana ki te Atua o toku whakaoranga.
19
Ko Ihowa, ko toku Ariki, toku kaha, ka meinga ano e ia oku waewae kia rite ki o te hāta, ka meinga ano ahau e ia kia takahi i runga i oku wahi tiketike. Ki te tino kai waiata i runga i aku mea whakatangi.