- 1
- I te whitu o nga marama, i te rua tekau ma tahi o nga ra o te marama, ka puta mai te kupu a Ihowa, he mea whakapuaki mai na Hakai poropiti; i ki ia,
- 2
- Tena, korero atu ki a Terupapere tama a Hearatiere kawana o Hura, raua ko te tino tohunga ko Hohua tama a Iohereke, ki nga morehu ano hoki o te iwi, mea atu,
- 3
- Ko wai te morehu i roto i a koutou i kite i tenei whare i tona kororia tuatahi? e pehea ana hoki ki to koutou titiro inaianei? he teka ianei ki ta koutou titiro me te mea he kahore noa iho, ina whakaritea ki tera?
- 4
- Na, kia kaha aianei, e Terupapere, e ai ta Ihowa, kia kaha ano hoki, e te tino tohunga, e Hohua tama a Iohereke, kia kaha ano hoki, e te iwi katoa o te whenua, e ai ta Ihowa, e mahi; ko ahau hoki hei hoa mo koutou, e ai ta Ihowa o nga mano.
- 5
- Ka rite ki te kupu i whakaritea e ahau ki a koutou i to koutou haerenga mai i Ihipa; kei te tu hoki toku wairua i roto i a koutou; kaua e wehi.
- 6
- No te mea ko te kupu tenei a Ihowa o nga mano, Kia kotahi ake ano, he wahi iti nei, a ka whakaoioia e ahau te rangi me te whenua, te moana, me te wahi maroke.
- 7
- Ka whakaoioia ano hoki e ahau nga iwi katoa, a ka haere mai ta nga iwi katoa i matenui ai; ka whakakīa ano hoki e ahau tenei whare ki te kororia, e ai ta Ihowa o nga mano.
- 8
- Naku te hiriwa, naku hoki te koura, e ai ta Ihowa o nga mana.
- 9
- Tera te kororia o tenei whare o muri nei ka nui atu i to tera i mua, e ai ta Ihowa o nga mano: ka hoatu ano e ahau te rongo mau i tenei wahi, e ai ta Ihowa o nga mano.
- 10
- I te rua tekau ma wha o nga ra o te iwa o nga marama, i te rua o nga tau o Tariuha, ka puta mai te kupu a Ihowa, he mea whakapuaki mai na Hakai poropiti, i mea ia,
- 11
- Ko te kupu tenei a Ihowa o nga mano, Tena ra uia te ture ki nga tohunga, mea atu,
- 12
- Ki te maua e tetahi tangata he kikokiko tapu i te pito o tona kakahu, a ka pa taua pito ona ki tetahi taro, ki tetahi mea ranei e kohuatia ana, ki te waina, ki te hinu, ki tetahi kai ranei, e tapu ranei? Na ka whakahokia mai e nga tohunga a ka mea, Kahore.
- 13
- Katahi a Hakai ka mea atu, Ki te pa tetahi tangata i poke i te tupapaku ki tetahi o enei, e poke ranei? Na, ka whakahokia mai e nga tohunga; a ka mea, E poke ano.
- 14
- Na ka oho mai a Hakai, a ka mea, He pena ano enei tangata, he pena ano tenei iwi i toku aroaro, e ai ta Ihowa, he pena ano nga mahi katoa a o ratou ringaringa; nga mea katoa e whakaherea ana e ratou, e poke ana.
- 15
- Na, tena ra, whakaaroa aianei i tenei ra, i era atu ano hoki, i te mea kahore ano i whakatakotoria tetahi kohatu ki runga ki tetahi kohatu i te temepara o Ihowa:
- 16
- Timataia i nga ra i haere ai te tangata ki te puranga e rua tekau nei ona mehua, a kotahi tekau nei ano: i te wa i haere ai tetahi ki te poka waina ki te utu mai i etahi oko e rima tekau, i roto i te takotoranga waina, a e rua tekau nei ano.
- 17
- I patua koutou e ahau, nga mahi katoa a o koutou ringaringa, ki te ngingiotanga, ki te kokatanga o te kai, ki te whatu, a kihai ano koutou i tahuri mai ki a au, e ai ta Ihowa.
- 18
- Whakaaroa tenei rangi era atu ano hoki, timataia i te rua tekau ma wha o te iwa o nga marama, i te ra i whakatakotoria ai te turanga o te temepara o Ihowa, whakaaroa.
- 19
- Kei te whare witi ano ranei te purapura? ina, kahore ano te waina, te piki, te pamekaranete, te oriwa, kia hua noa; ka timata i tenei rangi taku manaaki i a koutou.
- 20
- I tuaruatia ano te putanga mai o te kupu a Ihowa ki a Hakai i te rua tekau ma wha o nga ra o te marama; i mea ia,
- 21
- Korero atu ki a Terupapere kawana o Hura, mea atu, Ka whakaoioia e ahau te rangi me te whenua.
- 22
- Ka hurihia ake ano e ahau te torona o nga kingitanga, ka ngaro ano i a au te kaha o nga kingitanga o nga tauiwi; ka hurihia ake ano e ahau te hariata, me ona kai eke; ka riro iho ano hoki nga hoiho me o ratou kai eke, ratou katoa i te hoari a tona tuakana, a tona teina.
- 23
- I taua rangi, e ai ta Ihowa o nga mano, ka mau au ki a koe, e taku pononga, e Terupapere, tama a Hearatiere, e ai ta Ihowa, a ka meinga koe e ahau hei hīri: no te mea kua oti koe te whiriwhiri e ahau, e ai ta Ihowa o nga mano.
Address: 
Phone: 
Email: