Hebrews Chapter 6 - Paipera Tapu 1868 | Te Paipera Tapu 1868

Hebrews Chapter 6 - Paipera Tapu 1868

1
Na, kia mahue atu ki muri nga timatanga o ta te Karaiti akoranga, hoake tatou ki te tino tikanga; kaua e tuaruatia te whakatākoto i te turanga, ara, i te ripenetanga ki nga mahi mate, i te whakapono hoki ki te Atua,
2
I te whakaakoranga ki nga iriiringa, i te whakapanga o nga ringaringa, i te aranga o nga tāngata mate, i te whakawakanga mutunga kore.
3
A ka meatia ano tenei e tatou ki te tukua e te Atua.
4
Te hunga hoki kua oti te whakamarama, kua pa ki te mea i homai i runga i te rangi, kua whiwhi ano ki te Wairua Tapu,
5
A kua kitea te pai o ta te Atua kupu, me nga mea kaha o te ao meake nei puta;
6
Ki te taka atu ratou, e kore ratou e taea te whakahou ake ki te ripeneta; ka ripekatia houtia hoki te Tama a te Atua e ratou nei ano, a ka meinga kia tawaia nuitia.
7
Te whenua hoki e inu nei i te ua e honohono nei te heke ki runga ki a ia, a e mea ana i te otaota pai kia tupu ake ma te hunga i mahia ai, ka whiwhi ki ta te Atua manaakitanga:
8
Tena ko te whenua i tupu ai nga tataramoa, nga tumatakuru, ka whakakinoa, ka tata ki te kanganga; tona whakamutunga he tahunga.
9
Na, ahakoa penei noa ta matou korero, e u ana ano ta matou whakaaro, e aku hoa aroha, ki nga mea i a koutou he pai ke atu, he mea ano hoki mo te ora.
10
E kore hoki te Atua e hē, e wareware ki ta koutou mahi, ki te uaua o to koutou aroha, i whakakitea mai e koutou ki tona ingoa, i a koutou i atawhai i te hunga tapu, a ka atawhai nei ano.
11
Otiia e hiahia ana matou kia whakakitea taua uaua na ano e tenei e tenei o koutou, kia taea ra ano te unga rawatanga o te whakaaro i tumanako ai koutou, ā te mutunga ra ano:
12
Kia kaua koutou e puhoi, engari kia rite ta koutou ki ta te hunga i whakapono i whakamanawanui, a riro mai ana i a ratou nga mea i whakaaria mai.
13
I te Atua hoki e whakaari mea ana ki a Aperahama, a kahore ana mea nui atu hei oatitanga, ka oatitia a ia ake ano,
14
I mea ia, Ina ka manaakitia rawatia koe e ahau, ka whakanuia rawatia ano hoki koe.
15
Na, whakamanawanui ana ia, a riro ana i a ia te kupu whakaari.
16
Ko te mea nui ake hoki ta nga tāngata e waiho ai hei oati: a ki a ratou hei mutunga mo nga whakahokihoki kupu katoa te oati whakau.
17
No reira hoki, i te Atua e tino pai rawa ana kia whakakitea ki te hunga mo ratou nei aua mea i korerotia ra, te mau o tana whakaaro, whakaurua mai ana e ia he oati;
18
Na, ka rua nga mea pumau, he mea hoki e kore ai e ahei kia korero teka te Atua, a ma enei ka kaha ai he whakamarietanga mo o tatou ngakau mo o te hunga kua kahaki mai nei i a tatou, kua pupuri i te mea i takoto mai nei i te aroaro, e tumanakohia atu nei e tatou:
19
Hei punga ano tenei ma tatou mo te wairua, he mea mau tonu, u tonu, tae tonu atu ano hoki ki roto i te arai;
20
Ki te wahi kua tapoko atu nei a Ihu ki reira, hei matamua mo tatou, i a ia i meinga hei tohunga nui mo a mua tonu atu, i runga i to Merekihereke ritenga.