- 1
- Na, ko te tino tenei o nga mea kua korerotia nei: He tohunga pera to tatou nei, kua noho ano ki matau o te torona o te Nui i nga rangi;
- 2
- He minita mo nga mea tapu, mo te tapenakara pono, tona kai whakaara nei ko te Ariki, ehara i te tangata.
- 3
- Nga tohunga nui katoa hoki, he mea whakarite hei tapae atu i nga whakahere i nga patunga tapu: na konei hoki i tika ai kia whai mea ano tenei tangata hei tapaenga atu māna.
- 4
- Me he mea hoki i runga ia i te whenua, kahore ona tohungatanga, tenei hoki nga tohunga hei tapae atu i nga whakahere i runga i ta te ture:
- 5
- Ta ratou mahi he ritenga he atarangi no nga mea i te rangi, he pera ano me te mea i tohutohungia ki a Mohi, i a ia meake hanga i te tapenakara: i mea hoki ia, Kia mahara kia hangā e koe nga mea katoa kia rite ki te tauira i whakakitea ki a koe i runga i te maunga.
- 6
- Tena ko tenei he nui ke te mahi minita kua riro nei i a ia, he pai rawa hoki te kawenata ko tona takawaenga nei ko ia, he pai rawa ano hoki nga kupu whakaari, i whakatakotoria ai taua kawenata.
- 7
- Me he mea hoki kihai i whai hē taua kawenata o mua, e kore e rapua he wahi mo te mea tuarua.
- 8
- I a ia hoki e whakahe ana, i mea ia ki a ratou, Nana, tenei ake ko nga ra, e ai ta te Ariki, e whakaritea ai e ahau he kawenata hou ki te whare o Iharaira, ki te whare ano hoki o Hura:
- 9
- E kore e rite ki te kawenata i whakaritea e ahau ki o ratou mātua, i te ra i mau ai ahau ki o ratou ringaringa i arahi mai ai i a ratou i te whenua o Ihipa; kihai nei hoki ratou i u ki taku kawenata, a kore ake oku whakaaro ki a ratou, e ai ta te Ariki.
- 10
- Ko te kawenata hoki tenei e whakarite ai ahau ki te whare o Iharaira i muri iho i aua ra, e ai ta te Ariki; ka hoatu e ahau aku ture ki o ratou hinengaro, ka tuhituhia ano hoki ki o ratou ngakau: a ko ahau hei Atua mo ratou, ko ratou hoki hei iwi moku:
- 11
- E kore ano hoki ratou e whakaako i tona hoa i tona hoa, i tona teina i tona tuakana, e mea, Kia mātau koe ki te Ariki: e mātau katoa hoki ratou ki ahau, te nohinohi o ratou, te nui ano hoki o ratou.
- 12
- Ka mahi tohu hoki ahau ki a ratou hē, e kore ano hoki e maharatia e ahau a ratou hara, a ratou kino a mua ake nei.
- 13
- I a ia i mea, He kawenata hou, kua whakatawhitotia e ia te tuatahi. Na, te mea kua tawhitotia kua koroheketia, ka tata te memeha.
Address: 
Phone: 
Email: