Hosea Chapter 1 - Paipera Tapu 1868 | Te Paipera Tapu 1868

Hosea Chapter 1 - Paipera Tapu 1868

1
Te kupu a Ihowa i puta mai ki a Hohea tama a Peeri i nga ra o enei kingi o Hura, o Utiia, o Iotama, o Ahata, o Hetekia, i nga ra ano o Ieropoama tama a Ioaha kingi o Iharaira.
2
Te timatanga o te kupu a Ihowa, he mea korero na Hohea. I mea ano a Ihowa ki a Hohea, Haere, tangohia mai tetahi wahine mau, he mea puremu, etahi tamariki ano hoki, he mea na te puremu: he nui hoki te puremutanga i puremu ai te whenua i te mea ka whakarerea nei a Ihowa.
3
Na, haere ana ia, tikina atu ana e ia a Komere tamahine a Ripiraima. Na, kua hapu tera, kua whanau ta raua tamaiti.
4
Na ko te meatanga mai a Ihowa ki a ia, Huaina tona ingoa, Ko Ietereere; no te mea tenei ake ka rapu utu ahau mo te toto o Ietereere i te whare o Iehu, ka whakamutua ano e ahau te kingitanga o te whare o Iharaira.
5
I taua rangi ano ka whati i a au te kopere a Iharaira ki te raorao o Ietereere.
6
Na, kua hapu ano ia, whanau ake he tamahine. A ka mea mai te Atua ki a ia, Huaina tona ingoa, Ko Ro-ruhama: no te mea e kore e atawhaitia e ahau te whare o Iharaira a muri ake nei; engari ka taweke rawa atu ratou i a au.
7
Engari te whare o Hura ka atawhaitia ratou e ahau, ka meinga ano e ahau a Ihowa to ratou Atua hei whakaora i a ratou; e kore e meinga e ahau te kopere, te hoari, te whawhai, nga hoiho, nga kai eke hoiho ranei hei whakaora i a ratou.
8
A ka whakamutua e ia ta Ro-ruhama kai u, ka hapu ia, a whanau ake he tamaiti.
9
Na, ko te meatanga ake a te Atua, Huaina tona ingoa Ko Ro-ami: ehara hoki koutou i te iwi noku, ehara ano hoki ahau i te Atua no koutou.
10
Ka rite ano ia te tokomahatanga o nga tamariki a Iharaira ki te onepu o te moana e kore nei e mehuatia, e kore e taua; na, i te wahi i korerotia ai ki a ratou, Ehara koutou i te iwi noku, ko reira ano te kupu ki a ratou, He tamariki na te Atua ora.
11
Ko reira ano nga tamariki a Hura ratou ko nga tamariki a Iharaira huihui ngatahi ai, whakarite ai hoki i te upoko kotahi mo ratou, ka haere mai ano ratou i te whenua: no te mea he nui te ra o Ietereere.