Hosea Chapter 13 - Paipera Tapu 1868 | Te Paipera Tapu 1868

Hosea Chapter 13 - Paipera Tapu 1868

1
I Te mea e korero wiri ana a Eperaima, ka whakaneke ake ia i a ia i roto i a Iharaira; na, i tona heanga i a Paara, ka mate.
2
Na, inaianei kua neke ake to ratou hara, kua hangā ano hoki e ratou ta ratou hiriwa hei whakapakoko whakarewa ma ratou, me etahi whakapakoko ano e rite ana ki ta ratou i mātau ai, taua mea katoa he mahi na nga kai mahi: e korerotia ana aua mea e ratou, Me kihi nga kuao kau e nga tangata e mea patunga tapu ana.
3
Mo reira ka rite ratou ki te kapua o te ata, ki te tomairangi ano o te ata kua kore, ka rite ki te papapa e aia atu ana e te paroro i te patunga witi, ki te paowa ano hoki o roto o te timera.
4
Ko ahau ano ia a Ihowa ko tou Atua o te whenua mai ra ano o Ihipa, kaua ano koe e mohio ki tetahi atua ko ahau anake, kahore atu hoki he kai whakaora, ko ahau anake.
5
I mohiotia koe e ahau i te koraha, i te whenua kahore rawa nei he wai.
6
To ratou makonatanga rite tonu ki te wahi i kai ai ratou; i makona ratou, a whakakake ana o ratou ngakau; wareware tonu iho ratou ki a au.
7
Na, taku ki a ratou ka rite ki ta te raiona, taku titiro ki a ratou ka rite ki ta te reparo i te ara.
8
Taku tutakitanga ki a ratou ka rite ki ta te pea kua tangohia nei ana kuao, ka haea ano hoki e ahau te taupa o o ratou ngakau, taku kainga ano hoki i a ratou i reira ka rite ki ta te raiona, ka haehaea ratou e te kirehe o te parae.
9
E Iharaira, nau ano koe i ngaro ai; otiia kei a au he awhina mou.
10
Ko ahau hei kingi mou. Kei hea atu hei whakaora i a koe i roto i o pa katoa, i o kai whakarite whakawa ano hoki, i era i ki ra koe, Homai he kingi me etahi rangatira ki a au.
11
I a au e riri ana i hoatu e ahau he kingi ki a koe, a tangohia atu ana ia e ahau i a au e whakatakariri ana.
12
Te he o Eperaima takai rawa; tona hara huna rawa.
13
Ka pa mai ki a ia nga mamae o te wahine e whakamamae ana: he tamaiti whakaaro-kore ia; he hē hoki tana whakaroa ki te wahi e pakaru mai ai nga tamariki.
14
Ka hokona ratou e ahau kei riro ma te po, ka utua ratou e ahau kei mate. E te mate, ko ahau hei mate mou; E te urupa, maku koe e ngaro ai: ka hunā atu te ripeneta i aku kanohi.
15
Ahakoa i whai hua ia i roto i ona tuakana, i ona teina, ka puta mai te hau he marangai, ka pa mai ta Ihowa hau i te koraha, a ka maroke tona matapuna, ka mimiti tona manawawhenua: ka pahuatia e ia nga taonga o nga oko katoa e matenuitia ana.
16
Ka ururuatia a Hamaria, mona i whakakake ki tona Atua, ka hinga ratou i te hoari, ka taia iho a ratou tamariki, ka haehaea ano hoki a ratou wahine e hapu ana.