- 1
- Ki to mangai te tētere. Ka rite ia ki te ekara, ina whakaekea e ia te whare o Ihowa, mo ratou i whakataka i taku kawenata, i takahi i taku ture.
- 2
- Tera a Iharaira ka karanga mai ki a au, E toku Atua, e mohio ana matou ki a koe.
- 3
- Kua akiritia atu te pai e Iharaira: ka whaia ia e te hoa riri.
- 4
- Ta ratou whakarite kingi ehara i te mea naku, ta ratou whakarite rangatira ehara i te mea i mohiotia e ahau: kua hangā e ratou ta ratou hiriwa, ta ratou koura, hei whakapakoko ma ratou, he mea e hatepea atu ai ratou.
- 5
- Kua akiritia atu koe, e Hamaria, e to kuao kau; kua mura taku riri ki a ratou: kia pehea ake te roa o koutou kahore nei e tae ki te hara-kore?
- 6
- Na Iharaira nei hoki taua kuao na, he mea hanga na te kai mahi; na, ehara ia i te Atua: engari ka pākarukarua te kuao o Hamaria.
- 7
- Na, ta ratou i whakato ai ko te hau, ta ratou e kokoti ai ko te paroro: kahore ona kakau: e kore te kopuku e whai paraoa: ki te whai paraoa ano, ka horomia ake e nga tautangata.
- 8
- Kua horomia a Iharaira: akuanei ka rite ratou i roto i nga tauiwi ki te oko kihai i manakohia.
- 9
- Kua riro hoki ratou ki Ahiria, he kaihe mohoao, he moke ko ia anake: kua utua e Eperaima etahi hei aroha mai.
- 10
- Na, ahakoa utu noa ratou i roto i nga iwi, ka kohikohia ano ratou e ahau aianei, a ka tangi ratou, he wahi iti nei, i te pikaunga a te kingi o nga rangatira.
- 11
- Kua whakamahā nei nga aata a Eperaima hei mea hara, na, ka waiho nga aata hei hara mona.
- 12
- Tuhituhia atu ana e ahau ki a ia nga mea nui a taku ture, a kua kīa nei he mea ke.
- 13
- E patu kikokiko ana ratou hei patunga tapu, hei whakahere ki a au, kainga ake e ratou, heoi kahore e manakohia e Ihowa; akuanei ia mahara ai ki to ratou he, whiu ai i o ratou hara: ka hoki ano ratou ki Ihipa.
- 14
- Kua wareware hoki a Iharaira ki tona kai hanga, a hangā ana e ia etahi temepara; kua whakamahā ano hoki nga pa taiepa e Hura: otiia ka tukua atu he ahi e ahau ki ona pa hei kai i ona whare kingi.
Address: 
Phone: 
Email: