- 1
- Te poropititanga mo Ihipa. Tenei a Ihowa te rere mai nei i runga i te kapua tere, tae tonu atu ki Ihipa, a ka oho ano nga whakapakoko o Ihipa i tona aroaro, ngohe noa iho te ngakau o Ihipa i waenganui ona.
- 2
- Ka whakaangahia ano e ahau nga Ihipiana ki nga Ihipiana, a ka whawhai ratou ki tona teina, ki tona tuakana, ki tona hoa, ki tona hoa, te pa ki te pa, te kingitanga ki te kingitanga.
- 3
- Ka kahore noa iho ano hoki te wairua o Ihipa i waenganui i a ia, ka pau ano i a au ana whakaaro: a ka rapua e ratou he tikanga i nga whakapakoko, i nga tohunga whakamarie, i te hunga he atua maori nei o ratou, i nga matakite.
- 4
- Ka tukua putia atu ano hoki e ahau nga Ihipiana ki te ringaringa o te rangatira pakeke; he kingi kaha ano te kingi mo ratou, e ai ta te Ariki, ta Ihowa o nga mano.
- 5
- Ka kore haere ano nga wai o te moana, ka maroke ano hoki, ka mimiti te awa.
- 6
- Pirau rawa nga awa; mimiti kau, maroke iho nga manga i waiho nei hei taiepa, mate ake nga kakaho me nga raupo.
- 7
- Nga otaota i te taha o nga manga, i nga puaha o nga manga, me nga mea katoa i whakatokia ki te taha o nga manga, ka maroke, aia noatia atu, kore noa iho.
- 8
- Ka tangi ano nga kai hi ika, ka aue te hunga katoa e maka ana i te matau ki te awa, ka pouri ano nga kai whewhera o nga kupenga ki runga ki nga wai.
- 9
- Numinumi kau ano hoki nga kai mahi o te muka pai, ratou ko nga kai whatu o nga mea ma.
- 10
- Ona turanga, mongamonga noa, nga kai mahi katoa o nga awa, o nga roto ika.
- 11
- He pono he wairangi nga rangatira o Toana, he poauau nga whakaaro o nga kai whakatakoto whakaaro mohio a Parao. He pehea ra ta koutou ki atu ki a Parao, He tama ahau na te hunga whakaaro nui, he tama na nga kingi onamata?
- 12
- Kei hea ratou? kei hea o tangata whakaaro nui? ma ratou ano e whakaatu ki a koe, ma ratou e mohio ta Ihowa o nga mano i whakatakoto ai mo Ihipa.
- 13
- Kua whakakuaretia nga rangatira o Toana, kua tinihangatia nga rangatira o Nopo; pohehe iho a Ihipa i a ratou, ko ratou na ano nga okiokinga o nga iwi o reira.
- 14
- Kua oti i a Ihowa te wairua whanoke te konatu ki waenganui o reira, a ka whakapohehetia e ratou a Ihipa i ana mahi katoa, koia ano kei te tangata haurangi e kotiti ke ana, e ruaki ana,
- 15
- Ka kahore noa iho ano hoki he mahi ma Ihipa, hei mahinga ma te upoko, ma te hiawero, ma te manga, ma te wiwi.
- 16
- I taua rangi ano ka rite a Ihipa ki nga wahine: ka wehi, ka pawera i te mea ka rūrū te ringaringa o Ihowa o nga mano; ka rūrū hoki tona ringa ki runga ki tera wahi.
- 17
- A ka ai te whenua o Hura hei whakawehi mo Ihipa. Nga tangata katoa e whakahua ana i a ia, ka wehi i roto i a ratou, i te whakaaro hoki a Ihowa o nga mano e whakatakotoria nei e ia mo reira.
- 18
- I taua rangi e rima nga pa i te whenua o Ihipa, to ratou reo ko te reo o Kanaana; ko Ihowa, o nga mano ta ratou e oati ai; ko tetahi e karangatia, Ko te pa o te whakangaromanga.
- 19
- I taua rangi ka tu te aata a Ihowa i waenganui o te whenua o Ihipa, me te pou ano i te taha o to reira rohe, he mea ki a Ihowa.
- 20
- A hei tohu ano tera, hei kai whakaatu mo Ihowa o nga mano i te whenua o Ihipa: ka karanga hoki ratou ki a Ihowa, he mea na nga kai tukino, a ka ungā mai e ia he kai whakaora ki a ratou, tona nui na; a mana ratou e whakaora.
- 21
- A ka mohiotia a Ihowa e Ihipa, ka mohiotia hoki a Ihowa e nga Ihipiana i taua rangi, ka mahia ano hoki e ratou te patunga tapu me te whakahere; ka puaki ano hoki ta ratou kupu taurangi ki a Ihowa, a ka mana ano i a ratou.
- 22
- Ka whiua ano hoki a Ihipa e Ihowa, ka whiua, ka rongoatia ano e ia: a ka hoki mai ratou ki a Ihowa, ka tahuri ano ia ki ta ratou inoi, ka rongoa i a ratou.
- 23
- I taua rangi ka takoto he huarahi i Ihipa ki Ahiria, a ka tae atu te Ahiriana ki Ihipa, te Ihipiana ano hoki ki Ahiria, a ka mahi ngatahi te Ihipiana raua ko te Ahiriana.
- 24
- I taua rangi ano hei tuatoru a Iharaira mo Ihipa, mo Ahiria, hei manakitanga i waenganui o te whenua,
- 25
- E manaakitia ano ratou e Ihowa o nga mano, e ki ia, Kia manaakitia a Ihipa toku iwi, a Ahiria te mahi a oku ringaringa, a Iharaira ano hoki toku kāinga tupu.
Address: 
Phone: 
Email: