Isaiah Chapter 25 - Paipera Tapu 1868 | Te Paipera Tapu 1868

Isaiah Chapter 25 - Paipera Tapu 1868

1
E Ihowa, ko koe toku Atua, ka whakanuia koe e ahau, ka whakamoemititia e ahau tou ingoa, he mahi whakamiharo hoki āu; o whakaaro i whakatakotoria i mua noa atu, pono kau, tika kau.
2
Kua meinga hoki e koe te pa hei puranga; te pa kaha, wahia iho, te whare kingi o nga tangata ke kore iho tera pa; e kore e hangā, a ake ake ake.
3
No reira, ka whakakororiatia koe e te iwi kaha, ka wehi te pa o te iwi nanakia i a koe.
4
Hei kaha hoki koe mo te ware, hei kaha mo te rawa-kore i tona heanga, hei whakaruru kei mate i te tupuhi, hei whakahauhau mo te werawera, ina rite te hau o te hunga nanakia ki te tupuhi e aki mai ana ki te taiepa.
5
Ka rite ki te mahana i te wahi maroke te ngangau o nga tangata he, ka whakahokia iho nei e koe, ae ra, ki te mahana i nga wa e whakamarumarua ana e te kapua: ka whakahokia iho ki raro te peka o te hunga nanakia.
6
A ka tukua ano e Ihowa o nga mano he hakari ma nga iwi katoa ki runga ki tenei maunga, he mea momona, he waina nganga hei hakari, he mea momona, ki tonu i te hinu wheua, he waina nganga, tatari rawa.
7
Ka whakakahoretia ano hoki e ia i runga i tenei maunga a waho o te hipoki kua oti nei te hipoki ki nga iwi katoa, me te taupoki ano kua oti nei te taupoki ki nga tauiwi katoa.
8
Ka horomia e ia te mate i runga i te wikitoria, ka horoia atu ano hoki e te Ariki e Ihowa nga roimata o nga kanohi katoa, ka whakakahoretia atu ano e ia te whakahaweatanga ki tona iwi puta noa i te ao: na Ihowa nei hoki te kupu.
9
Ko te kupu ano tenei i taua rangi, Nana, ko to tatou Atua tenei, i tatari atu nei tatou ki a ia, a ka ora ano tatou i a ia: ko Ihowa tenei, i tatari tatou ki a ia, ka hari tatou, ka koa ki tana whakaoranga.
10
No te mea ka okioki te ringaringa o Ihowa ki runga ki tenei maunga, a ka takatakahia a Moapa ki raro i a ia, ka peratia me te kakau witi e takatakahia ana i te puranga paru.
11
Ka wherahia ano hoki ona ringa i roto i a ratou, ka pera ano ia me te kai kaukau e whewhera ana ina kaukau; ka whakahokia iho ano hoki e ia to ratou whakapehapeha, me nga taonga parakete o o ratou ringaringa.
12
Na, te pa kaha, te pourewa tiketike, ou taiepa, ka whakaititia iho e ia, takoto rawa, pa rawa ki te whenua, ae ra, ki te puehu.