- 1
- Nana, ka kingi te kingi i runga i te tika ka whakahaere tikanga ano nga rangatira i runga i te whakarite whakawa.
- 2
- A ka ai te tangata hei kuhunga atu ina pa te hau, hei piringa kei mate i te tupuhi, ka rite ki nga awa wai i te wahi maroke, ki te ata o te kohatu nui i te whenua ngaunga ra.
- 3
- E kore ano hoki nga kanohi o te hunga e kite ana e ataruatia, ka whakarongo mai ano nga taringa o te hunga e rongo ana.
- 4
- Ka matauria ano te matauranga e te ngakau o te hunga porangi, te arero nanunanu ano hoki ka hohoro tona reo te mārama.
- 5
- E kore te wairangi e karangatia i muri he ohaoha, e kore ano te kaiponu e kiia he atawhai.
- 6
- No te mea he wairangi nga korero a te wairangi, ka mahi ano hoki tona ngakau i te kino, ka mahi tinihanga; he mea puta ke tana korero ki a Ihowa, whakarawa-koretia iho e ia te wairua o te mea mate-kai, moti ake i a ia he wai mo te hunga mate-wai.
- 7
- Nga mea mahi ano hoki a te kaiponu he kino: e whakatakotoria ana e ia nga whakaaro kino, nga korero teka e he ai te hunga iti, i te mea e tika ana ano nga korero a te rawa-kore.
- 8
- He ohaoha ia nga whakaaro a te ohaoha; ma nga mea ohaoha ano ia ka u ai.
- 9
- Whakatika, e nga wahine e noho humarie ana; whakarongo mai ki toku reo, e nga tamahine wehi-kore; kia whai taringa mai koutou ki aku kupu.
- 10
- He maha nga rangi, nga tau e raruraru ai koutou, e nga wahine wehi-kore: no te mea ka kore te whawhaki waina, e kore te kohikohinga e tae mai.
- 11
- E wiri, e nga wahine e noho humarie ana; pokaikaha noa iho, e te hunga wehi-kore; whakarerea nga kakahu, noho tahanga, whitikiria he kakahu taratara ki nga hope.
- 12
- Ka tangi ratou ki nga u, ki nga mara e minaminatia ana, ki te waina hua.
- 13
- Ka puta ake te tataramoa me te tumatakuru ki runga ki te oneone o toku iwi, ina, ki runga ki nga whare koa katoa o te pa koa:
- 14
- No te mea ka mahue nga whare kingi, ka whakarerea te pa tokomaha: te puke me te pourewa ka waiho hei ana, a ake ake ake, hei mea e koa ai nga kaihe mohoao, hei wahi kai ma nga kahui.
- 15
- Kia ringitia mai ra ano i runga te wairua ki a tatou, kia meinga ra ano te koraha hei mara whai hua, kia kiia ano hoki te mara whai hua he ngahere.
- 16
- Ko reira ano te whakarite whakawa noho ai ki te koraha, a hei kāinga te mara hua mo te tika.
- 17
- Te mahi ano hoki a te tika he rongo mau; te whakaotinga ano o te tika he ata noho, he ngakau u, a ake ake ake.
- 18
- Ka noho ano toku iwi i te nohoanga o te rongo mau, i nga kāinga ano hoki e u ai te ngakau, i nga okiokinga humarie.
- 19
- Ina tarere iho te whatu ki runga ki te ngahere, a ka papaku iho te pa i te wahi papaku.
- 20
- Ano te hari o koutou, o te hunga e whakato ana ki te taha o nga wai katoa, e tuku atu ano hoki i nga waewae o te kau o te kaihe ki reira!