- 1
- Whakatata mai, e nga iwi, kia rongo ai koutou, kia whai taringa mai koutou, e nga iwi: kia rongo te whenua, me nga mea e hua ana i runga, te ao, me nga mea katoa e puta mai ana i roto i a ia.
- 2
- Kei runga hoki i nga iwi katoa te riri a Ihowa, tona weriweri kei runga i a ratou ope katoa: whakangaromia rawatia ana ratou e ia, tukua atu ana ratou e ia kia patua.
- 3
- Ka akiritia atu ano hoki o ratou tupapaku i patua, puta ake ana to ratou piro i o ratou tinana, rewa iho nga maunga i o ratou toto.
- 4
- Na, ka memeha nga ope katoa o te rangi, nga rangi, koia ano kei te pukapuka e pokaia ana: o ratou ope katoa ka taka ki raro, koia ano kei te rau waina ka marere nei, kei te piki e marere mai ana i runga i te rakau piki.
- 5
- Taku hoari hoki i te rangi ka nui tana inumanga: nana, ka tae iho ki runga ki a Eroma, ki runga hoki i te iwi i kangā e ahau, ki te whakarite whakawa.
- 6
- Ki tonu te hoari a Ihowa i te toto; kua momona i te ngako, i te toto o nga reme, o nga koati, i te ngako o nga whatukuhu o nga hipi toa; he patunga tapu hoki ta Ihowa i Potora, he parekura nui i te whenua o Eroma.
- 7
- Ka haere tahi mai ano hoki i roto i a ratou nga unikanga, nga puru, ratou ko nga mea nui, ka makuku ano hoki to ratou whenua i te toto, ka momona ano to ratou puehu i te ngako.
- 8
- Ko te ra hoki ia o ta Ihowa rapu utu, ko te tau whakahokinga utu mo ta Hiona totohe.
- 9
- A ka puta ke ona awa hei kapia, tona puehu hei whanariki; na, tona whenua, he kapia e ka ana!
- 10
- E kore e tineia i te po, i te ao, ka kake tona paowa, ake ake ake: i tera whakatupuranga, i tera whakatupuranga he ururua kau; e kore tetahi tangata e tika na reira, a ake tonu atu.
- 11
- Ka riro ano a reira hei kāinga mo te kawau, mo te matuku; ka noho ano te ruru raua ko te raweni ki reira, ka whakamarokia ano hoki e ia te taura o te tikanga-kore ki runga, me nga kohatu ano o te kore noa iho.
- 12
- Ona metararahi kahore tetahi i reira, hei karangatanga atu ma ratou kia whakakingitia, ona rangatira katoa ano hoki ka kore noa iho.
- 13
- Ka tupu ake ano hoki nga tataramoa i ona whare kingi, nga ongaonga me nga tumatakuru i ona pa kaha, a ka waiho hei nohoanga mo nga tarakona, hei marae mo nga ruru.
- 14
- Nga kuri mohoao ano hoki o te koraha ka tutaki ki o te motu, ka karanga te mea ahua koati ki tona hoa; ka takoto ano te mea haere po ki reira, ka kitea ano hoki he okiokinga mona ki reira.
- 15
- Ka hangā ano tona kohanga e te ruru ki reira, whanau iho, pehi tonu atu i nga hua, whakamine mai ano ki raro i tona taumarumarunga iho: ka huihui ano ki reira nga whatura, ratou ko tana tane, ko tana tane.
- 16
- Rapua i roto i ta Ihowa pukapuka, korerotia hoki, e kore tetahi o enei e ngaro atu, e kore tetahi o enei e hapa i te tane mana; na toku mangai nei hoki te whakahau, ko tona wairua ano hoki to ratou kai whakamine mai.
- 17
- Nana hoki i maka te rota mo ta ratou, na tona ringa ano i wehewehe taua wahi mo ratou, mea rawa ki te aho: hei kāinga a reira mo ratou, a ake ake, ka nohoia a reira e ratou i tena whakatupuranga, i tena whakatupuranga.
Address: 
Phone: 
Email: