- 1
- Aue, me i haehae koe i nga rangi, me i heke iho, me i rere a wai nga maunga i tou aroaro!
- 2
- Kia rite ki te ngiha o te ahi whakarewa, koropupu ana nga wai i te ahi; kia mohiotia ai tou ingoa e ou hoa riri, kia wiri ai nga iwi i to aroaro!
- 3
- I to meatanga i nga mea wehi kihai nei i whakaaroa e matou, i heke iho koe, rere a wai ana nga maunga i to aroaro.
- 4
- Kahore hoki kia rangona noatia i mua, kihai i mohiotia e te taringa, kihai hoki te kanohi i kite, e te Atua, ko koe anake, i nga mea kua oti i a ia mo te tangata e tatari ana ki a ia.
- 5
- Tau, he whakatau ki te tangata e koa ana, a e mahi ana i te tika, ki te hunga kei o ara nei ratou, a e mahara ana ki a koe. Nana, i riri na koe, he hara hoki no matou ki aua ara, no mua ra ano; heoi kua whakaorangia nei matou.
- 6
- Matou katoa ia kei te mea poke te rite, a matou tika katoa me te mea he kakahu rukenga, kua memenge nei matou katoa ano he rau rakau; kei te hau te rite o a matou kino e kahaki nei i a matou.
- 7
- Kahore hoki he tangata e karanga ana ki to ingoa, e whakaoho ana i a ia kia hopukia atu koe e ia: kua hunā nei hoki e koe to mata ki a matou, a ka riro matou i o matou he ki te kore.
- 8
- Na, inaianei, e Ihowa, ko koe to matou pāpā, ko matou te paru, ko koe to matou kai pokepoke, he mahi hoki matou katoa na to ringaringa.
- 9
- Kaua, e Ihowa, e whakanuia rawatia te riri, kaua hoki e mahara tonu ki te kino. Nana, titiro mai ra, he iwi matou katoa nou.
- 10
- He koraha kau o pa tapu, he koraha a Hiona, kua ururuatia a Hiruharama.
- 11
- To matou whare tapu, to matou mea whakakororia, te wahi i whakamoemiti ai o matou mātua ki a koe, kua waiho hei kāinga ma te ahi, moti iho a matou mea matenui katoa.
- 12
- Ka whakamanawanui ranei koe, e Ihowa, ki enei mea, ka whakarongo puku ranei koe, ka nui rawa ranei to whakatupukino i a matou?
Address: 
Phone: 
Email: