- 1
- No hea nga pakanga me nga ngangaretanga i roto i a koutou? he teka ianei no tenei, no o koutou hiahia e whawhai ana i roto i o koutou wahi?
- 2
- E hiahia ana koutou, heoi kahore e whai rawa; e patu ana koutou, e minamina atu ana, a kahore e whiwhi: e ngangare ana, e whawhai ana, heoi kahore e whai rawa, no te mea kahore koutou e inoi.
- 3
- E inoi ana koutou, a kahore e riro mai i a koutou, no te mea e inoi hē ana koutou, kia whakapaua ai ki o koutou hiahia.
- 4
- E nga tāngata puremu, e nga wāhine puremu, kahore ianei koutou e mātau ko te aroha o te ao he hoariritanga ki te Atua? na, te tangata e hiahia ana kia meinga hei hoa aroha mo te ao, ka meinga ia he hoa riri ki te Atua.
- 5
- Ki ta koutou whakaaro he korero noa ranei ta te Karaipiture? Te hiahia o te wairua e noho nei i roto i a tatou, tona tukunga iho he hae.
- 6
- Nui atu ia tana homaitanga i te aroha noa: koia tana e mea nei, Ka pakeke te Atua ki ta te hunga whakapehapeha, na, ka homai e ia he aroha noa ki te hunga ngakau papaku.
- 7
- Na, kia ngohengohe koutou ki ta te Atua. Kia pakeke koutou ki te rewera, a ka oma atu ia i a koutou.
- 8
- Whakatata atu ki te Atua, a ka whakatata mai ia ki a koutou. Horoia o koutou ringaringa, e te hunga hara: meinga o koutou ngakau kia hē-kore, e te hunga ngakau rua.
- 9
- Kia pouri koutou, kia puta te aue, te tangi: kia puta ke to koutou kata hei aue, to koutou hari hei ahua whakapoururu.
- 10
- Whakaititia koutou ki te aroaro o te Ariki, a māna koutou e whakateitei ake.
- 11
- Kāti te ngautuara tetahi ki tetahi, e aku teina. Te tangata e ngautuara ana ki tona teina, e whakahe ana hoki i tona teina, e ngautuara ana ia ki te ture, e whakahe ana i te ture: a ki te whakahe koe i te ture, ehara koe i te kai mahi i te ture, engari he kai whakawa.
- 12
- Kotahi tonu te kai whakatakoto ture, kei a ia te kaha hei whakaora, hei whakangaro: ko wai ra koe e whakahe na i tera atu?
- 13
- Tena, e te hunga e mea nei, Hei aianei, hei apopo ka haere matou ki te pa ra, a ka noho ki reira, kia kotahi tau, ka hohoko, ka whiwhi ki te taonga:
- 14
- Kahore na hoki koutou e mātau ki nga mea o apopo: he aha hoki to koutou oranga? He kohu ra, he iti nei te wa e puta mai ai, na, kua memeha atu.
- 15
- Tē mea ra koutou, Ki te pai te Ariki, a ka ora matou, ka mea i tenei mea i tera mea ranei.
- 16
- Tenei ia koutou te whakamanamana nei ki ā koutou kupu whakaputa: e kino ana taua whakamanamana katoa.
- 17
- Na, te tangata e mātau ana ki te mea i te pai, a kahore e meatia e ia, he hara tera nona.
Address: 
Phone: 
Email: