- 1
- Ko te kupu tenei a Ihowa ki a au, Tikina, kia riro mai i a koe tetahi whitiki rinena mou, ka whitiki ai ki to hope; kaua hoki e tukua ki te wai.
- 2
- Na, kua riro mai i a au tetahi whitiki, ta Ihowa i ki ai, whitikiria iho e ahau ki toku hope.
- 3
- Na, ko te rua o nga putanga mai o te kupu a Ihowa ki a au; i mea ia,
- 4
- E mau ki te whitiki i riro mai na i a koe, ki tera i tou hope, ka whakatika, ka haere ki Uparati, ka huna atu ki roto ki tetahi rua i te kamaka.
- 5
- Na haere ana ahau, hunā atu ana taua mea e ahau ki Uparati, pera tonu ahau me ta Ihowa i whakahau ai ki a au.
- 6
- A ka maha nga rangi ka taka, ka ki mai a Ihowa ki a au, Whakatika, haere ki Uparati, tikina atu i reira te whitiki i whakahau ai ahau ki a koe kia hunā ki reira.
- 7
- Na ko taku haerenga atu ki Uparati, kei te keri ahau, tangohia mai ana e ahau te whitiki i te wahi i hunā atu ai e ahau: na, kua kino te whitiki, kihai i pai mo tetahi mea.
- 8
- Na ko te putanga mai o te kupu a Ihowa ki a au; i mea ia,
- 9
- Ko te kupu tenei a Ihowa, Ka pena ano taku whakakinonga i te whakapehapeha o Hura, i te whakapehapeha nui ano hoki o Hiruharama.
- 10
- Tenei iwi kino e kore nei e pai ki te whakarongo ki aku kupu, a e haere ana i runga i nga tikanga pakeke a o ratou ngakau, e whai ana i nga atua ke, e mahi ana, e koropiko atu ana ki a ratou, ka rite ratou ki tenei whitiki e kore nei e pai mo tetahi mea.
- 11
- I piri hoki te whitiki ki te hope o te tangata, pena tonu taku meatanga i te whare katoa o Iharaira me te whare katoa ano o Hura kia piri ki a au, e ai ta Ihowa, kia waiho ai ratou hei iwi moku, hei ingoa, hei whakamoemititanga, hei kororia; heoi kihai ratou i rongo.
- 12
- Na, me korero atu e koe tenei kupu ki a ratou, Ko te kupu tenei a Ihowa a te Atua o Iharaira, Ka whakakīa katoatia nga pounamu ki te waina: a e mea ano ratou ki a koe, Kihai ianei matou i tino mohio ka whakakīa katoatia nga pounamu ki te waina?
- 13
- Ko reira koe mea atu ai ki a ratou, Ko te kupu tenei a Ihowa, Tenei au te whakaki nei i nga tangata katoa o tenei whenua, ara, nga kingi e noho ana i runga i te torona o Rawiri, ratou ko nga tohunga, ko nga poropiti, ko nga tangata katoa ano o Hiruharama, ki te haurangitanga.
- 14
- Ka akina atu ano ratou e ahau tetahi ki tetahi, nga mātua ngatahi ano ko nga tamariki, e ai ta Ihowa, e kore e tohungia e ahau, e kore e manawapatia, e kore e arohaina; engari ka whakangaromia ratou.
- 15
- Whakarongo, tahuri mai hoki nga taringa; kaua e whakapehapeha; na Ihowa hoki te kupu.
- 16
- Whakakororiatia to koutou Atua a Ihowa i te mea kiano ia i whakapouri noa, i te mea ano hoki kiano o koutou waewae i tūtuki i runga i nga maunga pouri; a, i a koutou e tatari atu nei ki te māramatanga, kua puta ke i a ia ko te atarangi o te mate, meinga iho e ia kia pouri kerekere.
- 17
- Tena ko tenei e kore koutou e rongo, ka tangi toku wairua i nga wahi ngaro ki to koutou whakapehapeha: nui atu ano te tangi o toku kanohi, tarere iho ano nga roimata; no te mea ka whakarautia te kahui a Ihowa.
- 18
- Mea atu ki te kingi raua ko te kuini, Whakaititia korua, e noho: no te mea ka riro iho o korua whakapaipai māhunga, te karauna o to korua kororia.
- 19
- Ka tutakina nga pa o te tonga, kahore he kai whakatuwhera, ka whakarautia katoatia atu a Hura, poto rawa ki te whakarau.
- 20
- E ara o koutou kanohi, tirohia atu te hunga e haere mai ana i te nota: kei hea te kahui i hoatu ki a koe? to kahui ataahua na?
- 21
- Ka pehea to kupu ina whiu ia i a koe? nau hoki ratou i whakaako hei ariki, hei rangatira mou. E kore ianei koe e mau pu i te mamae, ano he wahine e whakawhanau ana?
- 22
- Na, ki te mea koe i roto i tou ngakau, He aha enei mea i pa mai ai ki a au? Na te nui o to kino i hurahia ai te remu o tou, i whakatupuria kinotia ai o rekereke.
- 23
- E taea ranei e te Etiopiana te whakaputa ke tona kiri, e te reparo ranei tona kotingotingo? e kore ano e taea te mahi pai e koutou kua taunga nei ki te mahi kino.
- 24
- Ka titaritaria ano ratou e ahau, ano he papapa e rere ana i runga i te hau o te koraha.
- 25
- Ko te rota tena mau, ko te wahi i ruritia atu e ahau mou, e ai ta Ihowa; mou i wareware ki a au, i whakawhirinaki atu ki te teka.
- 26
- Ka humenea ake ano hoki e ahau o remu ki runga ki to mata, a ka kitea atu to mea e whakama ai koe.
- 27
- O puremutanga, to tangi a hoiho, te whakaaroaronga ki to moepuku, o mea whakarihariha i runga i nga pukepuke, i te parae, kua kitea e ahau. Aue te mate mou, e Hiruharama! e kore ianei koe e purea? ahea rawa ra ano?
Address: 
Phone: 
Email: