Jeremiah Chapter 19 - Paipera Tapu 1868 | Te Paipera Tapu 1868

Jeremiah Chapter 19 - Paipera Tapu 1868

1
Ko te kupu tenei a Ihowa, Tikina tetahi pounamu oneone a te kai hanga rihi, tikina atu ano etahi o nga kaumatua o te iwi, me etahi kaumatua o nga tohunga;
2
Ka haere atu ki te raorao o te tama a Hinomo, ki tera i te tomokanga ki te kuwaha i te taha ki te rawhiti, me karanga ano e koe ki reira nga kupu e korerotia e ahau ki a koe,
3
Me ki atu, Whakarongo ki te kupu a Ihowa, e nga kingi o Hura, e te hunga e noho ana i Hiruharama, Ko te kupu tenei a Ihowa o nga mano, Atua o Iharaira; Tenei au te kawe mai nei i te kino ki tenei wahi; nga tangata katoa e rongo ana, paorooro ana o ratou taringa.
4
Kua whakarere nei ratou i a au, kua whakatangataketia e ratou tenei wahi, kua tahu whakakakara ki konei ki nga atua ke kihai nei i mohiotia e ratou, e o ratou mātua, e nga kingi o Hura; a whakakīa ana e ratou tenei wahi ki te toto o te hunga hara-kore;
5
Kua hangā nei ano e ratou nga wahi tiketike o Paara, tahuna ake e ratou a ratou tamariki ki te ahi hei tahunga tinana ki a Paara, he mea kihai i whakahaua atu e ahau, kihai i korerotia e ahau, kihai ano i puta ake i roto i toku ngakau.
6
Mo reira, tenei nga ra te haere mai nei, e ai ta Ihowa, e kore ai tenei wahi e karangatia, Ko Topete, Ko te raorao o te tama a Hinomo; engari Ko te raorao o te parekura.
7
Ka he ano hoki i a au te whakaaro a Hura raua ko Hiruharama ki tenei wahi, ka meinga ano ratou kia hinga i te hoari i te aroaro o o ratou hoa riri, i te ringa ano o te hunga e whai ana kia whakamatea ratou, ka hoatu ano hoki e ahau o ratou tinana hei kai ma te manu o te rangi, ma te kararehe o te whenua.
8
Ka meinga ano tenei pa hei ururua, hei whakahīanga mai: nga tangata katoa e haere ana i konei ka miharo, ka whakahī atu ki ona patunga katoa.
9
Ka meinga ano ratou e ahau kia kai i nga kikokiko o a ratou tamariki, i nga kikokiko ano hoki o a ratou tamahine, ka kainga ano e ratou nga kikokiko o tona hoa tata, o tona hoa tata, i te whakapaenga, i te kopaninga, e kopania ai ratou e o ratou hoa riri, e te hunga ano hoki e whai ana kia whakamatea ratou.
10
Katahi ka wahia e koe te pounamu i te tirohanga mai a nga tangata ka haere tahi atu na koutou.
11
Me ki atu ano e koe ki a ratou, Ko te kupu tenei a Ihowa o nga mano, Ka penei taku wawahi i tenei iwi, i tenei pa, ka rite ki te wahanga o te oko a te kai hanga rihi e kore rawa nei e taea te honohono: ka tanumia ano hoki ratou ki Topete, a kia kore ra ano he wahi hei tanumanga.
12
Ko taku tenei e mea ai ki tenei wahi, e ai ta Ihowa, ki ona tangata ano hoki, kia meinga ra ano tenei pa kia rite ki Topete.
13
Ka whakapokea ano hoki nga whare o Hiruharama, me nga whare o nga kingi o Hura, ka rite ki tenei wahi, ki Topete; he mea mo nga whare katoa i tahu whakakakara ai ratou i runga i nga tuanui ki te ope katoa o te rangi, i ringitia ai ano e ratou nga ringihanga ki nga atua ke.
14
Katahi ka haere mai a Heremaia i Topete i te wahi i ungā atu ai ia e Ihowa ki te poropiti, a tu ana i te marae o te whare o Ihowa; na, ko tana kianga atu ki te iwi katoa,
15
Ko te kupu tenei a Ihowa o nga mano, Atua o Iharaira, Nana, ka kawea mai e ahau ki runga ki tenei pa, ki ona pa katoa ano hoki, te kino katoa i korerotia e ahau mo konei, mo ratou i whakapakeke i o ratou kaki, a kihai i whakarongo ki aku kupu.