- 1
- I whakakite mai a Ihowa ki a au, na, e rua nga kete piki i whakaturia ki mua i te temepara o Ihowa i muri iho i ta Nepukararetara kingi o Papurona whakaraunga atu i a Hekonia tama a Iehoiakimi kingi o Hura, ratou ko nga rangatira o Hura, ko nga kamura, ko nga parakemete i Hiruharama, i tana kawenga atu i a ratou ki Papurona.
- 2
- Pai rawa nga piki o tetahi kete, rite tonu ki nga piki matamua: na, nga piki o tetahi kete, kino rawa, e kore hoki e kainga i te kino.
- 3
- Na, ko te meatanga mai a Ihowa ki a au, He aha te mea e kitea ana e koe, e Heremaia? Ano ra ko ahau, He piki; nga piki pai, pai whakaharahara; me nga mea kino, kino whakaharahara, e kore e kainga i te kino.
- 4
- Na, ko te putanga mai o te kupu a Ihowa ki a au; i mea ia,
- 5
- Ko te kupu tenei a Ihowa Atua o Iharaira, Ka rite ki enei piki pai taku mohiotanga atu ki te hunga o Hura i whakaraua atu nei, enei i ungā atu nei e ahau i tenei wahi ki te whenua o nga Karari, hei pai mo ratou.
- 6
- Ka matatau tonu atu ano hoki oku kanohi ki a ratou mo te pai, ka whakahokia mai ano hoki ratou e ahau ki tenei whenua; ka hangā ano ratou e ahau, e kore ano e wahia iho; ka whakatokia ratou e ahau, e kore ano hoki e hutia atu.
- 7
- Ka hoatu ano e ahau ki a ratou he ngakau mohio ki a au, ara, ko Ihowa ahau; ka waiho ano ratou hei iwi moku, ko ahau hoki hei Atua mo ratou: no te mea ka whakapaua o ratou ngakau ki te hoki mai ki a au.
- 8
- Na, nga piki kino, e kore nei e kainga i te kino; he pono ko te kupu tenei a Ihowa, Ka pena ano taku hoatutanga i a Terekia kingi o Hura, ratou ko ona rangatira, ko nga morehu ano hoki o Hiruharama e mahue ki tenei whenua, e noho ana hoki i te whenua o Ihipa:
- 9
- Ka hoatu ano ratou e ahau kia kawea ki nga kingitanga katoa o te whenua, hei he mo ratou; hei ingoa kino ano hoki, hei whakatauki, hei taunutanga, hei kanga, i nga wahi katoa e peia atu ai ratou e ahau.
- 10
- Ka ungā atu ano hoki e ahau te hoari ki a ratou, te hemo-kai, te mate uruta, kia poto atu ra ano ratou i runga i te whenua i hoatu e ahau ki a ratou ko o ratou mātua.
Address: 
Phone: 
Email: