- 1
- Te kupu i puta mai ki a Heremaia, he mea na Ihowa, i te tekau o nga tau o Terekia kingi o Hura, ara, i te tekau ma waru o nga tau o Nepukararetara.
- 2
- I taua wa hoki e whakapaea ana a Hiruharama e te taua a te kingi o Papurona; kua oti ano hoki a Heremaia poropiti te tutaki atu ki roto ki te marae o te whare herehere i te whare o te kingi o Hura.
- 3
- Na Terekia hoki, na te kingi o Hura, ia i tutaki atu; i mea ia, He aha koe i poropiti ai, i ki ai, Ko te kupu tenei a Ihowa, Nana, ka hoatu e ahau tenei pa ki te ringaringa o te kingi o Papurona, a ka horo i a ia.
- 4
- A Terekia ano hoki kingi o Hura, e kore ia e mawhiti atu i te ringaringa o nga Karari; no te mea ka tukua putia atu ia ki te ringaringa o te kingi o Papurona, a ka korero ano ia ki a ia he mangai, he mangai, e kite ano hoki ona kanohi i ona kanohi.
- 5
- Ka arahina ano hoki e ia a Terekia ki Papurona, a ki reira ia noho ai, kia tirotiro ra ano ahau i a ia, e ai ta Ihowa: ahakoa whawhai koutou ki nga Karari, e kore ta koutou e taea.
- 6
- Na, ko te kianga ake a Heremaia, I puta mai te kupu a Ihowa ki a au; i mea ia,
- 7
- Tera e tae mai ki a koe a Hanameere tama a Harumu a tou matua kēkē, a ka mea, Mau e hoko taku mara i Anatoto; kei a koe na hoki te tikanga mo te hoko kia hoki ai, mau e hoko.
- 8
- Na, ka haere mai ki a au a Hanameere tama a toku matua kēkē, ka pera ano me ta Ihowa i ki ai, ki te marae o te whare herehere, a ka mea ki a au, Tena, hokona e koe taku mara i Anatoto i te whenua o Peniamine; kei a koe hoki te tikanga o taua wahi, mau ano e hoko kia hoki atu ai; hokona mau. Na, mohio tonu iho ahau, he mea tena na Ihowa.
- 9
- Katahi ka hokona e ahau te mara a Hanameere tama a toku matua kēkē, tera i Anatoto, paunatia ana e ahau te moni mana, tekau ma whitu nga hekere hiriwa.
- 10
- Tuhituhi rawa ki te pukapuka e ahau, hiri rawa, whakarite rawa nga kai titiro, paunatia iho e ahau te hiriwa ki te pauna.
- 11
- Katahi ahau ka mau ki te pukapuka o te hokonga, ki te mea hiri i rite nei ki ta te ture, ki ta nga tikanga, ki te mea ano hoki e takoto kau ana.
- 12
- A hoatu ana e ahau te pukapuka o te hokonga ki a Paruku tama a Neria, tama a Maaheia i te tirohanga mai ano a Hanameere tama a toku matua kēkē, i te tirohanga mai ano a nga kai titiro, i tuhituhia ai te pukapuka o te hokonga, i te tirohanga ano a nga Hurai katoa, e noho ana i te marae o te whare herehere.
- 13
- Na, ko taku whakahaunga atu ki a Paruku i te tirohanga mai a ratou katoa; i mea ahau,
- 14
- Ko te kupu tenei a Ihowa o nga mano, Atua o Iharaira, Maua atu enei pukapuka, tenei pukapuka o te hokonga, te mea hiri, tenei pukapuka ano hoki e takoto kau ana, whaowhina ki te oko oneone, kia maha ai nga ra e mau ai.
- 15
- No te mea ko te kupu tenei a Ihowa o nga mano, Atua o Iharaira, Tera ano ka hokohokona nga whare, nga mara, me nga mara waina ano hoki ki tenei whenua.
- 16
- Katahi ahau ka inoi atu ki a Ihowa i muri iho i taku hoatutanga i te pukapuka o te hokonga ki a Paruku tama a Neria; i mea ahau,
- 17
- Aue, e te Ariki, e Ihowa, nana, nau i hanga te rangi me te whenua, he kaha nui nou, he ringa kua oti te whakamaro, kahore he mea e pakeke ki a koe.
- 18
- He mahi aroha tau ki nga mano, e utua ana e koe te kino o nga mātua ki roto ki te uma o a ratou tamariki i muri i a ratou: tona ingoa, Ko te Atua nui, ko te Marohirohi, ko Ihowa o nga mano,
- 19
- Ko te Nui ki te whakaaro, ko te Kaha ki te mahi; e tirotiro ana hoki o kanohi ki nga huarahi katoa o nga tamariki a te tangata, he mea kia rite ai ki tana ara ake, ki nga hua o ana mahi, nga mea ka hoatu ki tenei tangata, ki tenei tangata:
- 20
- Nau i homai nga tohu me nga mea whakamiharo ki te whenua o Ihipa, a taea noatia tenei ra, ki roto ano hoki ki a Iharaira, ki era atu tangata; a meinga ana e koe he ingoa mou me tenei inaianei.
- 21
- A, kawea mai ana e koe to iwi a Iharaira i te whenua o Ihipa i runga i nga tohu, i nga mea whakamiharo, i te ringa kaha ano hoki, i te tākakau kua oti te whakamaro, i te wehi nui;
- 22
- A, homai ana e koe ki a ratou tenei whenua i oati ai koe ki o ratou mātua ka hoatu ki a ratou, he whenua e rerengia ana e te waiu, e te honi.
- 23
- Na, haere mai ana ratou, a riro ana a konei i a ratou; heoi kihai ratou i whakarongo ki tou reo, kihai hoki i haere i runga i tou ture: nga mea katoa i whakahaua e koe ki a ratou kia mahia kihai i mahia, na, meinga ana e koe tenei kino katoa kia pa ki a ratou.
- 24
- Nana, kua tae mai ki te pa nga puke e horo ai, a kua hoatu ano e koe te pa ki te ringaringa o nga Karari e whawhai nei ki konei, he meatanga na te hoari, na te hemo-kai, na te mate uruta. Na, tau i korero ra, kua rite; nana, kua kite ano hoki koe.
- 25
- Heoi kua mea mai na koe, e te Ariki, e Ihowa, ki a au, Hokona te mara mau ki te hiriwa, whakaritea ano hoki nga kai titiro; i te mea, kua hoatu nei te pa ki te ringaringa o nga Karari.
- 26
- Na, ko te putanga mai o te kupu a Ihowa ki a Heremaia; i ki ia,
- 27
- Nana, ko ahau a Ihowa, ko te Atua o nga kikokiko katoa: tera ranei tetahi mea e pakeke ki a au?
- 28
- No reira, ko te kupu tenei a Ihowa, Nana, ka hoatu e ahau tenei pa ki te ringaringa o nga Karari, ki te ringaringa ano o Nepukararetara kingi o Papurona, a ka horo i a ia:
- 29
- A ka haere mai nga Karari e whawhai nei ki tenei pa, ka tungia hoki e ratou tenei pa ki te ahi, ka wera ano i a ratou, me nga whare ano i tahu whakakakara ai ratou i runga i nga tuanui ki a Paara, i ringitia ai hoki nga ringihanga ki nga atua ke, hei whakapataritari i a au.
- 30
- Ta nga tamariki a Iharaira hoki ratou ko nga tamariki a Hura he mahi kau i te kino ki taku titiro, no to ratou tamarikitanga ake ano: he whakapataritari kau ano ta nga tamariki a Iharaira i a au ki te mahi hoki a o ratou ringaringa, e ai ta Ihowa.
- 31
- I runga hoki i taku riri, i runga i taku weriweri tenei pa hei whakaoho i a au, no te rangi ano i hangā ai, a tae noa mai ki tenei ra, kia nekehia atu ra ano i toku aroaro.
- 32
- Mo te kino katoa o nga tamariki a Iharaira, ratou ko nga tamariki a Hura, i mahia nei e ratou hei whakapataritari i a au, e ratou ko o ratou kingi, ko o ratou rangatira, ko o ratou tohunga, ko o ratou poropiti, ko nga tangata o Hura, ko te hunga ano e noho ana i Hiruharama.
- 33
- Hurihia ake ano hoki e ratou te kohamo, kahore te kanohi ki a au; taku ano he whakaako i a ratou moata tonu taku maranga ki te whakaako i a ratou, a kihai ano ratou i whakarongo, i manako mai ki te ako.
- 34
- Heoi whakaturia ana e ratou a ratou mea whakarihariha ki te whare i karangatia nei toku ingoa ki reira, whakapokea iho e ratou.
- 35
- A hangā ana e ratou nga wahi tiketike o Paara, era i te raorao o te tama a Hinomo, hei wahi e meinga ai e ratou a ratou tamariki, a ratou tamahine, kia tika i roto i te ahi ki a Moreke, he mea kihai i whakahaua atu e ahau; kihai ano i puta ake i roto i toku ngakau kia mahia tenei mea whakarihariha, hei mea e hara ai a Hura.
- 36
- Mo reira ko te kupu tenei inaianei a Ihowa Atua o Iharaira mo tenei pa e ki na koutou, Ka tukua atu ki te ringaringa o te kingi o Papurona, mea rawa ki te hoari, ki te hemo-kai, ki te mate uruta;
- 37
- Nana, ka kohikohia ratou e ahau i nga whenua katoa i peia atu nei ratou e ahau ki reira, i a au e riri ana, e weriweri ana, i te aritarita e nui ana; ka whakahokia mai ano ratou e ahau ki tenei wahi, a ka meinga ratou kia noho humarie.
- 38
- A ko ratou hei iwi ki a au, ko au hoki hei Atua mo ratou.
- 39
- Ka hoatu ano hoki e ahau he ngakau kotahi ki a ratou, he ara kotahi, kia wehi ai ratou i a au i nga ra katoa; hei pai mo ratou, mo a ratou tamariki ano hoki i muri i a ratou.
- 40
- Ka whakaritea ano e ahau he kawenata mau tonu ki a ratou, he mea e kore e whakatahuritia atu e ahau i a ratou, ara, kia mahia he pai ki a ratou; ka hoatu ano hoki e ahau toku wehi ki roto ki o ratou ngakau, kei whakarere ratou i a au.
- 41
- Ka koa ano hoki ahau i taku meatanga i te pai ki a ratou, ka whakapaua ano toku ngakau, ka whakapaua toku wairua ki te whakato i a ratou ki tenei whenua i runga i te pono.
- 42
- No te mea ko te kupu tenei a Ihowa, Na, i mua i kawea mai e ahau tenei kino nui katoa ki runga ki tenei iwi, waihoki ka kawea mai e ahau ki runga ki a ratou te pai katoa i korerotia e ahau mo ratou.
- 43
- Ka hokohokona ano hoki he mara ki tenei whenua e ki na koutou, Ka ururuatia, tē ai he tangata, he kararehe; ka hoatu ki te ringaringa o nga Karari.
- 44
- Ka hokona nga mara ki te moni, ka tuhituhia ano hoki he pukapuka, ka hiritia, ka whakaritea nga kai titiro ki te whenua o Peniamine, ki nga taha o Hiruharama, ki nga pa ano hoki o Hura, ki nga pa o nga maunga, ki nga pa o nga raorao, ki nga pa o te taha ki te tonga; ka whakatahuritia atu hoki e ahau to ratou whakaraunga, e ai ta Ihowa.
Address: 
Phone: 
Email: