- 1
- Te kupu i puta mai ki a Heremaia, he mea na Ihowa, i muri i ta Neputara-arana rangatira o nga kai tiaki tukunga i a ia kia haere i Rama, i tana tikinga atu ra i a ia, i te mea kei te here ia, mea rawa ki nga mekameka, i roto i nga whakarau katoa o Hiruharama raua ko Hura, i whakaraua atu nei ki Papurona.
- 2
- Na, ka mau te rangatira o nga kai tiaki ki a Heremaia, a ka mea ki a ia, Na Ihowa na tou Atua tenei kino i korero mo tenei wahi.
- 3
- Na, kua takina mai nei e Ihowa, kua oti i a ia tana i korero ai; mo koutou i hara ki a Ihowa, a kihai i whakarongo ki tona reo. No reira tenei mea i pa atu ai ki a koutou.
- 4
- Na, ka wetekina atu nei koe e ahau i tenei ra, ara, nga mekameka i ou ringa. Ki te mea e pai ana ki tau titiro iho kia haere tahi taua ki Papurona, haere mai; a ka mau tonu taku tirotiro i a koe: na, ki te mea e kino ana ki tau titiro kia haere tahi taua ki Papurona, kauaka: tirohia iho, kei to aroaro te whenua katoa: na, te wahi e pai ana, e tika ana ki tau titiro hei haerenga atu mau, haere ki reira.
- 5
- Kiano ia i hoki noa, ka mea tera, Hoki atu ano ki a Keraria tama a Ahikama tama a Hapana, kua meinga hoki ia e te kingi o Papurona hei kawana mo nga pa o Hura, me noho hoki ki a ia i roto i te iwi; mau ranei e haere ki te wahi e tika ana ki tau titiro kia haere atu. Na, ka hoatu he o mona e te rangatira o nga kai tiaki, me tetahi hakari ano hoki, a tukua ana ia kia haere.
- 6
- Katahi a Heremaia ka haere atu ki a Keraria tama a Ahikama ki Mitipa; noho ana ki a ia i roto i te iwi i mahue ki te whenua.
- 7
- A, te rongonga o nga rangatira katoa o nga ope i nga parae, ratou ko a ratou tangata, kua oti a Kararia tama a Ahikama te mea hei kawana mo te whenua e te kingi o Papurona, i a ia ano nga tikanga mo nga tane, mo nga wahine, mo nga tamariki, mo nga rawa-kore o te whenua, mo te hunga kihai i whakaraua atu ki Papurona;
- 8
- Na, ka haere mai ratou ki a Keraria ki Mitipa, ara, a Ihimaera tama a Netania, ratou ko nga tama a Karea, ko Hohanana, ko Honatana, ko Heraia tama a Tanahumete, ko nga tama a Epai Netopati, ko Hetania tama a tetahi Maakati, enei, me a ratou tangata.
- 9
- A ka oati a Keraria tama a Ahikama, tama a Hapana, ki a ratou ko a ratou tangata, ka mea, Kaua e wehi ki te mahi ki nga Karari. E noho ki te whenua, e mahi ki te kingi o Papurona, a ka whai pai koutou.
- 10
- Ko au hoki, nana, he noho taku nei ki Mitipa, he mahi ki nga Karari e haere mai ana ki a tatou: ko koutou ia, kohikohia nga waina me nga hua raumati, me te hinu, whaowhina ki roto ki ā koutou oko, e noho ano hoki ki a koutou pa i riro ra i a koutou.
- 11
- Te rongonga ano hoki o nga Hurai katoa i Moapa, i roto ano hoki i nga tamariki a Amono, i Eroma, era atu ano i nga whenua katoa, kua whakatoea etahi o Hura e te kingi o Papurona, a kua meinga ano e ia a Keraria tama a Ahikama tama a Hapana, hei kawana mo ratou;
- 12
- Na, ka hoki mai nga Hurai katoa i nga wahi katoa i peia atu ai ratou, a haere mai ana ki te whenua o Hura ki a Keraria ki Mitipa, a kohikohia ana e ratou nga waina me nga hua raumati, tona nui na.
- 13
- I haere mai ano hoki a Hohanana tama a Karea, ratou ko nga rangatira katoa o nga ope i nga parae ki a Keraria ki Mitipa,
- 14
- I mea ki a ia, E mohio ana ranei koe kua ungā mai a Ihimaera tama a Netania e Paarihi kingi o nga tamariki a Amono ki te whakamate i a koe? Heoi kihai a Keraria tama a Ahikama i whakapono ki ta ratou.
- 15
- I korero puku mai ano a Hohanana tama a Karea ki a Keraria ki Mitipa, i mea, Ka haere au, ne? ki te patu i a Ihimaera tama a Netania, e kore ano e mohiotia e tetahi tangata. Kia patua koe hei aha? pena ka marara noa iho nga Hurai katoa kua huihui mai nei ki a koe, moti iho nga morehu o Hura.
- 16
- Ano ra ko Keraria tama a Ahikama ki a Hohanana tama a Karea, Kaua tenei mea e meatia e koe; he teka hoki to korero mo Ihimaera.
Address: 
Phone: 
Email: