- 1
- Te kupu i korerotia e Ihowa mo Papurona, mo te whenua o nga Karari, he mea whakapuaki na Heremaia poropiti.
- 2
- Kauwhautia atu i roto i nga tauiwi, korerotia, whakaarahia ano te kara, korerotia, kaua e hunā, mea atu, Kua horo a Papurona, kua whakama a Pere, a Meroraka mongamonga noa, kua whakama ona whakapakoko, kua mongamonga noa ona whakaahua.
- 3
- No te mea kei te haere mai he iwi ki a ia i te nota, mana e mea tona whenua hei ururua, e kore ano tetahi e noho ki reira; te tangata, te kararehe, ka heke atu ratou, ka haere.
- 4
- I aua ra, i taua wa ano hoki, e ai ta Ihowa, ka haere mai nga tamariki a Iharaira ratou tahi ano ko nga tamariki a Hura, he haere tangi ta ratou: ka haere ratou, ka rapu i a Ihowa i to ratou Atua.
- 5
- Ka uia e ratou te huarahi ki Hiona, me te anga ano o ratou kanohi ki reira, ka mea ratou, Haere mai tatou, kia honoa hoki tatou ki a Ihowa, i runga i te kawenata e mau tonu ana, e kore e warewaretia.
- 6
- He hipi ngaro toku iwi, na o ratou hepara ratou i kotiti ke ai, na ratou ano ratou i tahuri ke ai i runga i nga maunga, haere atu ana ratou i te maunga ki te pukepuke, kua wareware ratou ki to ratou takotoranga.
- 7
- E kainga ana ratou e te hunga katoa e kite ana i a ratou, a e ki ana o ratou hoa riri, Kahore o tatou he, kua hara nei hoki ratou ki a Ihowa, ki te nohoanga o te tika, ki a Ihowa, ki ta o ratou mātua i tumanako atu ai.
- 8
- Haere atu i roto i Papurona, heke atu i te whenua o nga Karari, kia rite ano hoki ki nga koati toa i mua i te kahui.
- 9
- No te mea tenei ka whakaarahia e ahau, ka whakaekea atu hoki ki Papurona he huihuinga no nga iwi nui no te whenua ki te nota: ka takoto ano o ratou mātua hei whawhai ki a ia, ka horo ia i reira; a ratou pere ka rite ki ā te marohirohi mohio; e kore tetahi e hoki kau mai.
- 10
- A ka pahuatia a Karari; ka tatu te ngakau o te hunga katoa e pahua ana i a ia, e ai ta Ihowa.
- 11
- Mo koutou ra i koa, mo koutou i whakamanamana, e nga kai pahua o toku kāinga tupu, mo koutou kua tetere, kua pera me te kuao kau i te tarutaru, a me te mea he puru koutou e hamama ana.
- 12
- Ka nui te whakama o to koutou whaea, matangerengere ana te wahine i whanau ai koutou: nana, hei koraha, hei wahi wai-kore, hei ururua to muri rawa o nga iwi.
- 13
- He riri no Ihowa i kore ai e nohoia, engari hei ururua katoa a reira: te tangata e tika ana na Papurona ka miharo, ka ki mai ki ona whiunga katoa.
- 14
- Kia takoto o koutou matua hei tatau ki Papurona, ki tetahi taha, ki tetahi taha, e nga kai whakapiko kopere katoa, kopere atu ki a ia, kaua nga pere e kaiponuhia: kua hara hoki ia ki a Ihowa.
- 15
- Hamama ki a ia i tetahi taha, i tetahi taha: e tukua mai ana e ia tona ringaringa: kua hinga ona turanga, kua oti ona taiepa te wahi iho, he rapunga utu hoki na Ihowa. Rapua he utu i a ia. Ta koutou e mea ai ki a ia kia rite ki tana i mea ai.
- 16
- Hatepea atu te kai rui i roto i Papurona, te kai rahurahu ano hoki o te toronaihi i te wa e kotia ai te witi. Ka wehi ratou i te hoari tukino, a ka tahuri atu ki tona iwi, ki tona iwi, ka rere atu ratou ki tona whenua, ki tona whenua.
- 17
- He hipi a Iharaira kua marara noa atu, he mea ā atu ia na nga raiona, i te tuatahi na te kingi o Ahiria ia i kai, i te whakamutunga na tenei Nepukararetara kingi o Papurona ona wheua i wahi.
- 18
- Mo reira ko te kupu tenei a Ihowa o nga mano, Atua o Iharaira; Nana, ka whiua e ahau te kingi o Papurona me tona whenua, ka pera ano me taku whiunga i te kingi o Ahiria.
- 19
- Ka whakahokia mai ano hoki a Iharaira e ahau ki tona kāinga, a ka kai ki runga ki Karamere, ki Pahana, ka makona ano hoki tona wairua ki runga ki Maunga Eperaima, ki Kireara.
- 20
- I aua rangi ano i taua wa ano hoki, e ai ta Ihowa, ka rapua te he o Iharaira, a ka kahore noa iho; nga hara ano hoki o Hura, a e kore e kitea; no te mea ka murua e ahau te kino o te hunga ka whakatoea nei e ahau.
- 21
- Haere atu ki te whenua o te hunga whakakeke, ki reira tatau ai, ki nga tangata ano hoki o te whiunga; whakamotitia, whakangaromia rawatia, whaia ratou, e ai ta Ihowa, mahia ano hoki nga mea katoa i whakahaua e ahau ki a koe.
- 22
- He ngangau whawhai kei te whenua, he wawahanga nui.
- 23
- Taukiri, e! kua poutoa, kua wawahia te hama o te ao katoa! taukiri e! kua waiho a Papurona hei ururua i roto i nga tauiwi!
- 24
- I whakatakotoria atu e ahau te mahanga mou, a mau tonu atu koe, e Papurona, kihai ano hoki koe i mohio; i kitea atu koe, i hopukia atu ano hoki; mou i whakapatari pakanga ki a Ihowa.
- 25
- Kua puare i a Ihowa tona whare taonga, whakaputaina mai ana e ia nga patu a tana riri: ko te mahi hoki tenei a te Ariki a Ihowa o nga mano, i te whenua o nga Karari.
- 26
- Haere mai ki a ia i te pito rawa, whakapuaretia ona toa: opehia ake hei puranga, whakangaromia rawatia; kei mahue tetahi wahi ona.
- 27
- Patua ana puru katoa; kia haere ratou ki raro ki te patunga. Aue te mate mo ratou! kua tae mai nei hoki to ratou ra, te wa e whiua ai ratou.
- 28
- He reo no te hunga e rere mai ana, kua mawhiti mai i te whenua o Papurona, e korerotia ana e ratou ki Hiona te rapu utu a Ihowa a to tatou Atua, te rapunga utu mo tona temepara.
- 29
- Karangarangatia nga kai kopere ki Papurona; e te hunga katoa e whakapiko ana i te kopere, whakapaea tena pa, a karapoi noa; kei mawhiti atu tetahi; utua tana mahi; kia rite ki nga mea katoa i mea ai ia, ta koutou e mea ai ki a ia, mona i whakapehapeha ki a Ihowa, ki te Mea Tapu o Iharaira.
- 30
- Mo reira ka hinga ana taitamariki i ona waharoa; ana tangata whawhai ano hoki ka moti pu i taua rangi, e ai ta Ihowa.
- 31
- Nana, hei hoa riri ahau mou, e te mea whakakake, e ai ta te Ariki ta Ihowa o nga mano; kua tae mai nei hoki tou rangi, te wa e whiua ai koe.
- 32
- A ka tūtuki nga waewae o te mea whakapehapeha, ka hinga, kahore he kai whakaara mona, ka ngiha ano i a au te ahi i roto i ona pa, a ka pau nga mea katoa i tetahi taha ona, i tetahi taha.
- 33
- Ko te kupu tenei a Ihowa o nga mano, I tukinotia nga tamariki o Iharaira, ratou tahi ano ko nga tamariki a Hura, puritia iho ratou e o ratou kai whakarau, kihai i pai ki te tuku atu i a ratou.
- 34
- He kaha to ratou kai hoko; ko Ihowa o nga mano tona ingoa: ka tohea rawatia e ia ta ratou tohe, a ka ata takoto te whenua, ka oho ano hoki i a ia nga tangata o Papurona.
- 35
- Kei runga i nga Karari te hoari, e ai ta Ihowa, kei runga ano i nga tangata o Papurona, kei runga i ona rangatira, kei runga ano i ona mea whakaaro nui.
- 36
- Kei runga te hoari i te hunga korero teka, a ka wairangi noa iho ratou: kei runga te hoari i ana marohirohi, a ka pawera ratou.
- 37
- Kei runga te hoari i o ratou hoiho, kei runga i o ratou hariata, kei runga ano hoki i nga whakauru katoa i roto i a ia, a ka rite ratou ki nga wahine; kei runga te hoari i ona taonga, a ka pahuatia.
- 38
- He mimiti kei runga i ona wai, a ka maroke: no te mea ko te whenua ia o nga whakapakoko, a e haurangi ana ratou ki ā ratou atua whakawehi.
- 39
- Mo reira ka noho tahi nga mohoao o te koraha ki o nga motu, ka noho ano nga tamahine a te ruru ki reira: e kore ano a reira e nohoia, a, ake, ake, ake, kahore hoki he kāinga ki reira, a, tera whakatupuranga, tera whakatupuranga.
- 40
- Ka rite ki ta te Atua hurihanga i Horoma raua ko Komora, i nga pa ano i tata ki reira, e ai ta Ihowa; e kore te tangata e noho ki reira, e kore ano te tama a te tangata e whai kāinga ki reira.
- 41
- Nana, kei te haere mai he iwi i te nota, he iwi nui ano hoki; he tokomaha ano nga kingi e maranga i nga taha o te whenua.
- 42
- He kopere, he tao, ta ratou e pupuri ai, he nanakia ratou, e kore e tohu tangata; to ratou reo, ano ko te moana e haruru ana, i runga i nga hoiho e noho ana, whakararangi rawa, ano he tangata e mea ana ki te whawhai, hei tatau ki a koe, e te tamahine a Papurona.
- 43
- Te rongonga o te kingi o Papurona i to ratou rongo, ngoi-kore noa iho ona ringa; mau pu ia i te pawera, i te mamae, me te mea ko tetahi wahine e whanau ana.
- 44
- Nana, ka rite ia ki te raiona e haere ake ana i te ngawhatanga o Horano ki te nohoanga o te tangata kaha; na, kitea rawatia ake ka meinga ratou e ahau kia rere atu i reira: a ko wai te mea i whiriwhiria e whakaritea e ahau hei rangatira mona? ko wai e rite ana ki a au? ko wai hoki hei whakawa i a au? ko wai ano te hepara e tu ki toku aroaro?
- 45
- Na, whakarongo ki te tikanga a Ihowa i whakatakotoria nei e ia mo Papurona, ki ana whakaaro ano hoki i whakaaroa e ia mo te whenua o nga Karari, He pono ka toia mai ratou e nga mea iti o te kahui: he pono ka huihuia atu e ia te whakangaromanga o ratou, o to ratou kāinga.
- 46
- Ngateri ana te whenua i te haruru o to Papurona horonga, e rangona ana te hamamatanga i roto i nga iwi.
Address: 
Phone: 
Email: