- 1
- I te ra tuatahi o te wiki ka puta mai a Meri Makarini ki te urupa i te atatu, i te mea e pouri ana ano, a ka kite i te kohatu kua tangohia atu i te urupa.
- 2
- Na, ka oma ia, ka haere ki a Haimona Pita, raua ko tera akonga i aroha ai a Ihu, a ka mea ki a raua, Kua tangaohia e ratou te Ariki i te urupa, a e kore matou e mohio ki te wahi i waiho ai ia e ratou.
- 3
- Na, ka puta atu a Pita, me taua akonga, ka haere ki te urupa.
- 4
- A oma ngatahi ana raua: otiia i horo tera akonga i a Pita, a ko ia kua tae wawe ki te urupa.
- 5
- Na, piko iho ana ia, ka kite i nga takai rinena e takoto ana; heoi kihai i tapoko atu ki roto.
- 6
- Na, ka haere mai ano hoki a Haimona Pita, i muri i a ia, a, tona tomokanga ki te urupa, ka kite i nga takai rinena e takoto ana,
- 7
- Me te tauera i takaia ai tona mātenga, kihai i takoto tahi me nga takai rinena, he mea whakakopa ia ki tetahi wahi i tahaki ano.
- 8
- Katahi ka tomo atu tera akonga, i tae wawe mai nei ki te urupa, kite ana, whakapono ana.
- 9
- Kiano hoki ratou i mohio noa ki te Karaipiture, Kua takoto te tikanga kia ara ake ia i te hunga mate.
- 10
- Na, hoki atu ana ano nga akonga ki te kāinga.
- 11
- Ko Meri ia tu tonu i waho o te urupa tangi ai: a i a ia e tangi ana, ka piko iho ki te urupa.
- 12
- Ka kite i nga anahera tokorua, he ma nga kakahu, e noho ana, ko tetahi ki te mātenga, ko tetahi ki nga waewae, i te wahi i takoto ai te tinana o Ihu.
- 13
- A ka mea mai raua ki a ia, E tai, he aha tau e tangi? Ka mea ia ki a raua, Kua tangohia e ratou toku Ariki, a e kore ahau e mātau ki te wahi i whakatakotoria ai ia.
- 14
- A ka penei atu ana korero, ka tahuri atu whakamuri, ka kite i a Ihu e tu ana, otiia kihai i mohio ko Ihu ia.
- 15
- Ka mea mai a Ihu ki a ia, E tai, he aha tau e tangi? ko wai tau e rapu? Hua noa ia ko te kai ngaki kāri, na, ko tana meatanga ki a ia, E mara, ki te mea kua mauria atu ia e koe, korerotia mai ki a au te wahi i whakatakotoria ai ia, a maku ia e tango atu.
- 16
- Ka mea a Ihu ki a ia, E Meri. Ka tahuri atu tera, ka mea ki a ia, E Raponi; (ko te tikanga tenei, E te kai whakaako.)
- 17
- Ka mea a Ihu ki a ia, Kei pa mai koe ki a au; kiano hoki ahau i kake noa ki toku Matua: engari haere ki oku teina, ka mea ki a ratou, ka kake ahau ki toku Matua, ki to koutou Matua; ki toku Atua, ki to koutou Atua.
- 18
- Haere ana a Meri Makarini, korero atu ana ki nga akonga, kua kite ia i te Ariki, a kua korerotia mai e ia enei mea ki a ia.
- 19
- A i taua ra tuatahi ano o te wiki i te ahiahi, i nga tatau e kati ana o te wahi i huihui ai nga akonga i te wehi i nga Hurai, ka haere mai a Ihu, ka tu i waenganui, a ka mea ki a ratou, Kia tau te rangimarie ki a koutou.
- 20
- A ka puaki tenei kupu āna, ka whakakitea atu e ia ona ringaringa me tona kaokao ki a ratou. Na, hari tonu nga akonga, i to ratou kitenga i te Ariki.
- 21
- Ka mea ano a Ihu ki a ratou, Kia tau te rangimarie ki a koutou: i tonoa mai ahau e te Matua, a ka tonoa ano hoki koutou e ahau.
- 22
- Ka korerotia tenei, ka whakaha mai ia, a ka mea ki a ratou, Kia riro atu te Wairua Tapu i a koutou:
- 23
- Ki te whakarerea noatia atu e koutou nga hara o etahi tangata, ka whakarerea o ratou; a ki te whakamaua o etahi e koutou, ka mau ano.
- 24
- Ko Tamati ia ko tetahi o te tekau ma rua, tetahi o ona ingoa ko Ririmu, kahore ia i a ratou i te taenga mai o Ihu.
- 25
- A, te meatanga a ara akonga ki a ia, Kua kite matou i te Ariki; ka mea ia ki a ratou, Ki te kahore ahau e kite i te ngaunga a nga whao i ona ringaringa, e kuhu i taku matihao ki te ngaunga a nga whao, e kuhu hoki i taku ringaringa ki tana kaokao, e kore e whakaponohia e ahau.
- 26
- A ka pahemo ana nga ra e waru, na, kei roto ano ana akonga, ratou ko Tamati: ka haere mai a Ihu i te mea e kati ana nga tatau, ka tu i waenganui, ka mea, Kia tau te rangimarie ki a koutou.
- 27
- Katahi ia ka mea ki a Tamati, Torona mai to matihao, kia kite hoki koe i oku ringaringa; torona mai hoki to ringa, ka kuhu ki toku kaokao: aua e whakateka, engari me whakapono.
- 28
- Na, ka whakahokia mai e Tamati, ka mea ki a ia, E toku Ariki, e toku Atua.
- 29
- Ka mea a Ihu ki a ia, No te kitenga i a au, i whakapono ai koe, e Tamati: ka koa te hunga kahore i kite, a kua whakapono.
- 30
- A he maha atu ano hoki ara tohu i oti i a Ihu, i te aroaro o ana akonga, kahore nei i tuhituhia ki tenei pukapuka:
- 31
- Otiia kua tuhituhia enei, kia whakapono ai koutou ko Ihu te Karaiti, ko te Tama a te Atua; kia whiwhi ai hoki ki te oranga i runga i tona ingoa, ina whakapono koutou.
Address: 
Phone: 
Email: