- 1
- I te whenua o Uhu tetahi tangata i mua, ko Hopa tona ingoa; he tangata tapatahi ano ia, he tika, i wehi i te Atua, i mawehe atu i te kino.
- 2
- Na, ana tamariki, tokowhitu nga tama, tokotoru nga tamahine.
- 3
- Ana kararehe hoki, e whitu mano nga hipi, a e toru mano nga kamera, me nga kau, e rima rau nga ioka, me nga kaihe uha e rima rau, he tini noa atu ano nga pononga; nui atu hoki taua tangata i nga tangata katoa o te rawhiti.
- 4
- Na, haere ana ana tama, takā ana e ratou he hakari i o ratou whare, he rangi ano to tenei, he rangi ano to tenei; i tukua ano he karere hei karanga i o ratou tuahine tokotoru kia kai, kia inu tahi ratou.
- 5
- A, ka taka nga ra o ta ratou kai hakari, ka unga tangata mai a Hopa, a whakatapua ana ratou, maranga wawe ana ia i te ata, whakaekea ana e ia nga tahunga tinana, rite tonu ki a ratou katoa te maha; i mea hoki a Hopa, Tera pea kua hara aku tamariki, a kua kanga ki te Atua i roto i o ratou ngakau. Ko ta Hopa mahi tenei i nga ra katoa.
- 6
- Na, i tetahi ano o aua ra ka haere mai nga tama a te Atua, he mea kia tu ai ratou ki to Ihowa aroaro, a haere mai ana ano a Hatana i roto i a ratou.
- 7
- Na, ko te meatanga mai a Ihowa ki a Hatana, I haere mai koe i hea? Ano ra ko Hatana ki a Ihowa, i ki mai, I te kopikopiko, i te haereere i te whenua.
- 8
- Ano ra ko Ihowa ki a Hatana. Kua mahara iho ranei to ngakau ki taku tangata ki a Hopa, kahore he rite mona i te whenua, he tangata ngakau tapatahi, he tika, e wehi ana i te Atua, e mawehe atu ana i te kino?
- 9
- Ano ra ko Hatana ki a Ihowa; i mea ia, He wehi noa ianei to Hopa i te Atua?
- 10
- He teka ianei kua oti ia, tona whare, me ana mea katoa te karapoti e koe ki te taiepa, kua manaakitia e koe te mahi a ona ringa, a kua nui haere ana kararehe i runga i te whenua?
- 11
- Engari torona atu ra tou ringa, pa atu ki ana mea katoa; ina, ka kanga ia i a koe ki tou aroaro,
- 12
- Ano ra ko Ihowa ki a Hatana, Nana, ana mea katoa kei tou ringa, kaua ia tou ringa e totoro atu ki a ia. Na, haere mai ana a Hatana i te aroaro o Ihowa.
- 13
- Na, i tetahi o nga ra i te mea e kai ana ana tama, ana tamahine, e inu waina ana i roto i te whare o to ratou tuakana,
- 14
- Na, ka haere mai tetahi karere ki a Hopa, ka mea, I te parau nga kau, me te kai ano nga kaihe i to ratou taha:
- 15
- Na, ko te kokiritanga mai o nga Hapeana, kahakina atu ana ratou; nga tangata hoki, patua iho e ratou ki te mata o te hoari; a ko ahau anake kua mawhiti mai, toku kotahi nei, hei korero ki a koe.
- 16
- I tenei ano e korero ana, ka puta mai ano tetahi, a ka mea, Kua taka iho he ahi na te Atua i runga i te rangi, a toro ana i roto i nga hipi, i nga tangata, a pau noa, a ko ahau anake kua mawhiti mai, toku kotahi, hei korero ki a koe.
- 17
- I tenei ano e korero ana, ka tae mai ano tetahi, ka mea, Wehea ake e nga Karari e toru nga matua, huaki mai ana ki nga kamera, kahakina atu ana e ratou; ko nga tangata patua iho e ratou ki te mata o te hoari, a ko ahau anake kua mawhiti mai, toku kotahi, hei korero ki a koe.
- 18
- I tenei ano e korero ana, ka tae mai ano tetahi, ka mea. O tama, o tamahine, i te kai, i te inu waina, i roto i te whare o to ratou tuakana;
- 19
- Na, ko te putanga mai o tetahi hau nui i te koraha, pa pu ki nga koki e wha o te whare, hinga ana ki runga ki nga taitamariki; mate ake ratou; a ko ahau anake kua mawhiti mai, toku kotahi, hei korero ki a koe.
- 20
- Heoi, whakatika ana a Hopa. Haea ana e ia tona koroka. Heua ana tona mahunga. Takoto ana ki runga ki te whenua; koropiko ana.
- 21
- Na, ko tana meatanga ake, I puta tahanga mai ahau i roto i te kopu o toku whaea, a ka hoki tahanga ano ki reira. Na Ihowa i homai: na Ihowa i tango. Kia whakapaingia te ingoa o Ihowa.
- 22
- I tenei katoa kihai a Hopa i hara, kihai ano hoki i whakakuare ki ta te Atua.
Address: 
Phone: 
Email: