- 1
- Ano ra ko Topara Nomaati; i mea ia,
- 2
- Na kona oku whakaaro i whakahoki kupu ake ai i roto i ahau; na reira ano ahau i hohoro ai.
- 3
- I rongo ahau i te whakatupehupehu, i te whakahe ki a au, a na te wairua o toku ngakau mahara taku kupu hei whakahokinga atu.
- 4
- Kahore ranei koe i mohio ki tenei i mea noa atu, i te wa ra ano i whakanohoia ai te tangata ki runga ki te whenua;
- 5
- He poto te whakamanamananga o te hunga kino; nonaianei kau nei te hari o te ngutu kau?
- 6
- Ahakoa kake noa ia, eke noa ki nga rangi, a pa atu tona mahunga ki nga kapua;
- 7
- Ka memeha atu ano ia a ake ake, ka pera ano me tona paru: te hunga i kite i a ia, ka mea, Kei hea ia?
- 8
- Ka rere atu ia ano he moe, e kore ano hoki e kitea: ka aia atu, ano he rekanga kanohi o te po.
- 9
- Te kanohi i kite i a ia e kore ano hoki e kite, heoi ano tirohanga mai a tona wahi ki a ia.
- 10
- E whakamanawareka ana tamariki i nga rawa-kore, ma ona ringa ano e whakahoki mai o ratou rawa.
- 11
- Ka ki ona wheua i te he o tona tamarikitanga; ka takoto tahi ano taua he ki a ia i roto i te puehu.
- 12
- Ahakoa i reka te kino i roto i tona mangai, a i hunā ano e ia i raro i tona arero;
- 13
- Ahakoa manawapatia noatia e ia, kahore e mahue i a ia, heoi pupuri tonu ia i roto i tona mangai,
- 14
- Ka puta ke tana kai i roto i ona whekau, hei au ahipi i roto i a ia.
- 15
- I horomia e ia nga taonga, ka ruakina mai ano e ia; ma te Atua e akiri mai i roto i tona kopu.
- 16
- Ka ngotea e ia te huwhare whakamate o nga ahipi; ka mate ano ia i te arero o te waipera.
- 17
- E kore ia e kite i nga manga wai, i nga waipuke, i nga awa honi, i nga awa pata.
- 18
- Tana i mahi ai ka whakahokia mai e ia, e kore ano hoki e horomia e ia; ka rite ki ona taonga te utu ka homai e ia; e kore ano ia e koa ki reira.
- 19
- Mona i tukino i nga rawa-kore, whakarerea iho; tangohia ana e ia he whare kihai i hangā e ia.
- 20
- E kore ia e kite i te tatutanga i roto i tona kopu, e kore ano hoki etahi o nga mea i hiahiatia e ia e mau ki a ia.
- 21
- Kahore he toenga o tana kai, no reira e kore tetahi mea pai ona e mau.
- 22
- Tino maha noa ana mea, ka rawa-kore ano ia; ka tae mai ki a ia nga ringa katoa o te hunga ngakau he.
- 23
- I a ia e whakaki ana i tona kopu, ka ungā mai e te Atua te mura o tana riri ki runga ki a ia, ka whakauaina iho ki a ia, i a ia ano e kai ana.
- 24
- Ka rere atu ia i te patu rino, ka tu i te kopere parahi, puta pu.
- 25
- E unuhia ana, kua puta mai i roto i te tinana, ina, puta mai ana te mea wheriko i roto i tona au: kua tau nga wehi ki a ia.
- 26
- Nga pouritanga katoa, huna rawa ki roto ki ona wahi ngaro; ka kainga ia e te ahi kihai i puhia, a ka he te morehu o tona tapenakara.
- 27
- Ka whakakitea mai tona he e nga rangi; ka whakatika mai ano te whenua ki a ia.
- 28
- Nga hua o tona whare ka riro: ka rere, ano he wai, ona mea i te ra e riri ai ia.
- 29
- Ko ta te Atua wahi tenei ma te tangata kino, ko te taonga tupu i kiia e te Atua mona.
Address: 
Phone: 
Email: