Job Chapter 23 - Paipera Tapu 1868 | Te Paipera Tapu 1868

Job Chapter 23 - Paipera Tapu 1868

1
Ano ra ko Hopa; i mea ia,
2
I tenei rangi nei ano e ngau kino ana taku tangi, toku patunga, nui noa atu i toku auetanga te taimaha.
3
Aue, me i mohio ahau ki te wahi e kite ai ahau i a ia! ka tae atu ahau ki tona nohoanga.
4
Ka ata whakatakotoria e ahau aku korero ki tona aroaro, ka whakakiia toku mangai ki nga kupu tautohetohe.
5
Ka mohio ahau ki nga kupu e whakahokia mai e ia ki a au, ka whakaaroa tana e mea mai ai ki a au.
6
E whakaputaina mai ranei tona kaha nui ina tautohetohe ki a au? Kahore, engari ka whai whakaaro mai ia ki a au.
7
Ko reira te tangata tika tautohetohe ai ki a ia; a ora tonu ake ahau i toku kai whakarite whakawa.
8
Nana, haere ana ahau ki mua, a kahore nei ia; ki muri, heoi kahore ahau e mohio ki a ia.
9
Ki maui, ki te wahi e mahi ai ia, heoi kahore ahau e kite i a ia; e huna ana ia i a ia ano i te taha ki matau, tē kite ahau i a ia.
10
E mohio ana hoki ia ki te ara e anga atu ai ahau: ka oti ahau te titiro iho e ia, ano he koura ahau i toku putanga mai.
11
Mau pu ona takahanga i toku waewae, u pu ahau ki tona ara, kihai hoki i peka atu.
12
Kihai hoki i mahue i a au te whakahau a ona ngutu: nga kupu a tona mangai, rongoa rawa ki a au, nui atu i taku wahi ake.
13
Ko ia, kotahi tonu tana whakaaro, ma wai hoki tana e whakahoki? ko ta tona ngakau hoki i hiahia ake ai e meatia ana e ia.
14
E whakaotia ana hoki e ia nga mea i whakaritea moku, he maha ano hoki ana mahi pera.
15
Koia ahau i ohorore ai i tona aroaro: ka whakaaroaro ahau, ka wehi ahau i a ia.
16
Ngohe noa nei hoki toku ngakau i te Atua, ohorere ana ahau i a te Kaha-rawa.
17
Kihai nei hoki ia i whakangaro i a au i mua o te pouri, kihai nei i hipokina e ia te pouri i toku aroaro.