Job Chapter 29 - Paipera Tapu 1868 | Te Paipera Tapu 1868

Job Chapter 29 - Paipera Tapu 1868

1
I korero tonu ano a Hopa i tana kupu whakarite, i mea,
2
Aue me i rite ki nga marama o mua, ki nga ra i tiaki ai te Atua i a au!
3
I te mea e tiaho mai ana tana rama ki runga ki toku mātenga, a na tana whakamāramatanga ahau i haere ai i te pouritanga;
4
Me i pera ano me ahau i nga ra o toku tamarikitanga, i te mea kei runga ta te Atua whakaaro puku i toku tapenakara!
5
I te mea e noho ana ano a te Kaha-rawa i a au, a, kei tetahi taha oku aku tamariki, kei tetahi taha;
6
I au i horoi i oku takahanga ki te pata, a rere mai ana nga awa hinu ki a au i roto i te kohatu.
7
I toku haerenga atu a puta noa i te pa ki te kuwaha, a whakapai ana i te nohoanga moku i te waharoa!
8
Te kitenga o nga taitamariki i a au, piri ana ratou: whakatika ana nga koroheke, tu ana ki runga.
9
Mutu ake te korero a nga tino tangata, kua kopania te ringa ki o ratou mangai.
10
Ngaro ana te reo o nga rangatira, piri ana o ratou arero ki o ratou ngao.
11
Te rongonga o te taringa, kiia tonutia ahau he hari; te kitenga o te kanohi, whakaae mai ana ki aku mahi.
12
Naku hoki i whakaora te rawa-kore i a ia e karanga ana, te pani, me te tangata ano kahore nei ona kai awhina.
13
I tau ki runga ki a au te manaakitanga a te tangata e tata ana ki te whakangaromanga; koa ana i ahau te ngakau o te pouaru.
14
I kakahuria e ahau te tika, a ko tera hei kakahu moku: hei koroka, hei karauna, taku whakarite whakawa.
15
Hei kanohi ahau ki te matapo, hei waewae ki te kopa.
16
He matua ahau ki nga rawa-kore, a i ata rapua ano e ahau te tikanga o te totohe kihai i matauria e ahau.
17
Wawahia ana e ahau nga kauae o te tangata kino, takiritia mai ana e ahau tana mea pahua i roto i ona niho.
18
Na ko taku meatanga ake, Tera ahau e mate i roto i toku ohanga; ka rite ki te onepu te maha o oku ra.
19
Toku pakiaka tautoro tonu ki nga wai, a i te po tau ana te tomairangi ki runga ki toku peka.
20
Hou tonu toku kororia i kororiatia ai ahau, a hoki ake ana te kaha o toku kopere i toku ringa.
21
I whakarongo mai nga tangata ki a au, i tatari, whakarongo puku ana ratou i a au e whakatakoto whakaaro ana.
22
I muri i aku kupu kihai ratou i whakahoki kupu; maturuturu iho ana aku korero ki runga ki a ratou.
23
I taria mai ahau e ratou ano ko te ua, hamama mai ana o ratou mangai, me te mea ano e tatari ana ratou ki te ua o muri.
24
Ki te mea i kata atu ahau ki a ratou, kihai i whakaponohia e ratou; kihai hoki ratou i whakataka i te māramatanga o toku mate.
25
Naku to ratou ara i whiriwhiri, a noho ana ahau hei rangatira, noho ana ahau anō he kingi i roto i te ope; i rite ahau ki te kai whakamarie o te hunga e tangi ana.