- 1
- I muri i tenei ka puaki te mangai o Hopa, a ka kangā e ia tona ra.
- 2
- I oho mai hoki a Hopa, i mea,
- 3
- Kia ngaro te ra i whanau ai ahau, te po i korerotia ai, He tamāroa kei roto i te kopu.
- 4
- Waiho taua ra mo te pouri; kaua e tirohia mai i runga e te Atua; kaua hoki e whitingia mai e te māramatanga.
- 5
- Kia poke i te pouri, i te atarangi o te mate; kia taungia iho e te kapua; kia whakawehia ano hoki e te mangu o te rangi.
- 6
- Taua po, kia mau pu i te pouri; kei honoa ki nga ra o te tau; kei huihuia atu ina taua nga marama.
- 7
- Nana, kia mokemoke taua po, kaua te reo koa e uru ki roto.
- 8
- Kia kangā hoki e te hunga kanga rangi, e te hunga mohio ki te whakaara Rewiatana.
- 9
- Kia pouri nga whetu o tona kakarauritanga; kia tatari ki te māramatanga, a kahore noa iho; kei kite hoki i te takiritanga ata.
- 10
- Mona kihai i tutaki i nga tatau o te kopu o toku whaea, kihai i huna i te mauiui kei kitea e ahau.
- 11
- He aha ahau tē mate ai i te kopu? tē hemo ai i te putanga mai ano i te puku.
- 12
- He aha i rite wawe ai nga turi moku, me nga u ano hei ngote maku.
- 13
- Me i pena, kua ata takoto ahau, tē ai he whakaohooho, moe ana ahau: katahi au ka whai okiokinga,
- 14
- I roto i nga kingi, i nga kai whakatakoto whakaaro o te whenua i hanga nei i nga wahi mokemoke mo ratou,
- 15
- I roto ranei i nga rangatira whai koura, o ratou nei whare ki tonu i te hiriwa:
- 16
- Kua kahore noa iho ranei, kua pera me te mate-roto e ngaro nei, me nga kohungahunga kahore nei e kite i te māramatanga.
- 17
- Mutu ake i reira te whakararuraru a te hunga kino; okioki ana i reira te hunga kua mauiui nga uaua.
- 18
- Ata noho ana nga herehere i reira, tē rongo i te reo o te kai tukino.
- 19
- Te iti, te rahi, kei reira; kahore hoki o te pononga rangatira.
- 20
- He aha te māramatanga i homai ai ki te tangata he nui nei tona mate? te ora ki te tangata kua kawa te wairua?
- 21
- E tumanako tonu nei ki te mate, heoi kahore noa iho; nui atu ta ratou i ta te keri i nga taonga huna.
- 22
- Hari whakaharahara ana ratou, koa ana, ina kitea te urupa.
- 23
- He aha ano te māramatanga i homai ai ki te tangata kua hunā nei tona ara, kua oti nei te tutakitaki mai e te Atua?
- 24
- Kiano hoki ahau i kai, kua tae mai taku aue: ano he wai oku hamamatanga e ringitia ana.
- 25
- No te mea kua tae mai ki a au te mea whakawehi i wehi ai ahau; taku i pa wera ai kua pa mai ki a au.
- 26
- Kahore oku humarie, kahore oku ata noho, ehara i te mea e okioki ana; na, kua puta mai te raruraru.
Address: 
Phone: 
Email: