- 1
- Na konei ano hoki, wiri ana toku ngakau, maunu atu ana i tona wahi.
- 2
- Ata whakarangona atu tona reo e papā ana, te pakutanga e puta mai ana i tona mangai.
- 3
- E whakatikaia atu ana e ia ki nga wahi katoa i raro i te rangi, tona uira ano hoki ki nga pito o te whenua.
- 4
- I muri i taua mea ka hamama te reo, papā ana te whatitiri, nui whakaharahara tona reo; e kore hoki ia e pupuri roa i era, ka rangona hoki tona reo.
- 5
- To te Atua whatitiri he reo whakamiharo: nui atu ana mahi, e kore hoki e mohiotia.
- 6
- E ki atu ana hoki ia ki te hukarere, Hei runga koe i te whenua; ki te ua punehunehu ano hoki, raua ko te ua ta o tona kaha.
- 7
- Hiritia ake e ia nga ringaringa o nga tangata katoa; kia mohio ai nga tangata katoa ki tana mahi.
- 8
- Me nga kirehe ano hoki, haere ana ratou ki nga piringa, noho ana i o ratou nohoanga.
- 9
- No te tonga te putanga mai o te tupuhi; no te hauraro te matao.
- 10
- Na te manawa o te Atua i homai te huka; a kuiti iho nga wai whanui.
- 11
- E whakamakuku ana ano ia i te kapua, a pangoro noa, pakarukaru ana te kapua i tona māramatanga.
- 12
- E whakakopikopikoa ana ano, a tawhio noa, he mea hoki na ana whakaaro: hei mea i nga mea katoa e whakahaua atu ana e ia ki runga ki te mata o te ao, ara, o te whenua.
- 13
- E meinga ana e ia kia kitea mai hei whiu, hei mea ranei mo tona whenua, hei atawhaitanga ranei.
- 14
- Kia whai taringa mai ki tenei, e Hopa: tu marie, ka whakaaro ki nga mea whakamiharo a te Atua.
- 15
- E mohio ana ranei koe ki ta te Atua meatanga i enei mea, ki tana meatanga kia puta te māramatanga o tona kapua?
- 16
- E mohio ana ranei koe ki nga paunatanga o nga kapua, ki nga mahi whakamiharo a te mea kua tino nui tona matauranga?
- 17
- Ki ou kakahu nei ka mahana ina whakamarietia e ia te whenua ki te tonga?
- 18
- Ko tona hoa ranei koe ki te whakatakoto i te rangi hei papa tupu ano he whakaata whakarewa?
- 19
- Whakaaturia mai ki a matou ta matou e korero ai ki a ia; e kore e tika ta matou whakatakoto o te korero i te pouri.
- 20
- E korerotia ranei ki a ia kei te korero tenei ahau? Ki te korero te tangata, ina ka horomia.
- 21
- Na, inaianei e kore nga tangata e titiro atu ki te māramatanga e wheriko mai nei i te rangi, i te mea ka tika atu te hau hei whakawatea.
- 22
- Ano he koura te haerenga mai i te nota. Kei te Atua te kororia whakawehi.
- 23
- Te Kaha-rawa, e kore ia e taea te whakataki atu e tatou: hira rawa tona kaha, tana whakarite whakawa, nui atu te tika: e kore ia e tukino.
- 24
- Na, kia wehi nga tangata i a ia; e kore ia e whai whakaaro ki nga ngakau mohio katoa.
Address: 
Phone: 
Email: