- 1
- He teka ranei kua takoto te wa mo te tangata i runga i te whenua, a e rite ana ona ra ki nga ra o te kai mahi?
- 2
- E hiahia ana te pononga ki te atarangi, te kai mahi ano hoki, tumanako tonu ki te utu mo tana mahi.
- 3
- Me au hoki, te wahi moku ko nga marama horihori, he mauiui nga po kua oti nei te whakarite moku.
- 4
- Ka takoto ahau, ka mea ahau, A hea ahau ara ai, a hea te po pahemo atu ai? heoi he tahurihuri kau taku, a ao noa.
- 5
- Te kakahu mo oku kikokiko, he kutukutu he pokuru oneone. Toku kiri, ngatata kau, whakarihariha kau.
- 6
- Oku ra, nui atu te tere i te rakau a te kai whatu; pau ake, tē ai he tumanakohanga atu.
- 7
- Kia mahara he hau oku ra; heoi ano kitenga o toku kanohi i te pai.
- 8
- Te kanohi e kite ana i a au, heoi ano ana tirohanga mai ki a au. Kei runga i a au ou kanohi, a moti iho ahau.
- 9
- Memeha atu te kapua, ngaro atu: he pera ano te tangata e haere ana ki te urupa; e kore e haere ake.
- 10
- E kore ia e hoki mai ano ki tona whare, e kore ano hoki tona wahi e mahara ki a ia i muri.
- 11
- Na, e kore e kaiponuhia e ahau toku mangai; ka korero ahau i toku wairua e mamae nei, ka tangi i te kawa o toku ngakau.
- 12
- He moana ranei ahau, he tohora, i mea ai koe i te kai tirotiro moku?
- 13
- Ki te mea ahau, Kei toku moenga ahau te marie ai, ma toku takotoranga e whakamāma toku tangihanga.
- 14
- Na, ka whakawehia ahau e koe ki nga moe, ka meinga kia ihiihi ki nga mea e puta mai ana.
- 15
- A, ki ta toku wairua he pai te tarona; pai ake te mate moku i te ora.
- 16
- Whakarihariha ana ahau; kaua ahau e ora tonu. Waiho noa iho ahau, he mea teka noa oku ra.
- 17
- He aha te tangata, i whakanuia ai ia e koe? i anga mai ai tou ngakau ki a ia?
- 18
- I tirotiro ai koe i a ia i tenei ata, i tenei ata, i honohono ai to whakamatautau i a ia?
- 19
- Kia pehea ake te roa ou kahore nei e tahuri atu i a au, oku kahore nei e waiho noa iho e koe, kia horomia ai toku huwhare?
- 20
- Kua hara ahau; kia aha atu ahau ki a koe, e te kai tiaki o nga tangata? He aha ahau i waiho ai e koe hei patunga mau? a taimaha iho ahau ki a au ano.
- 21
- He aha koe tē whakarere noa ai i toku he, tē whakapahemo ai i toku kino? akuanei hoki ahau moe ai ki te puehu, a ka rapu koe i a au i te ata, heoi kahore noa iho ahau.
Address: 
Phone: 
Email: