Joshua Chapter 4 - Paipera Tapu 1868 | Te Paipera Tapu 1868

Joshua Chapter 4 - Paipera Tapu 1868

1
A ka poto katoa te iwi te whiti i Horano, na, ka korero a Ihowa ki a Hohua, ka mea.
2
Tangohia mai i roto i te iwi kia kotahi tekau ma rua nga tangata ma koutou, kia kotahi tangata o roto o tera iwi o tera iwi.
3
Whakahaua atu hoki ratou e koutou, meatia atu, Tangohia atu e koutou i konei, i waenganui o Horano, i te wahi i ata tu ai nga waewae o nga tohunga, kia tekau ma rua nga kohatu, a maua atu e koutou, ka waiho ki te moenga e moe ai koutou i tenei po.
4
Katahi ka karanga atu a Hohua ki nga tangata kotahi tekau ma rua i whakaritea e ia i roto i nga tamariki a Iharaira, kotahi tangata o roto o tenei iwi o tenei iwi.
5
A i mea a Hohua ki a ratou Haere atu i mua i te aaka o Ihowa o to koutou Atua ki waenganui o Horano, ka hapai ake e koutou kia takikotahi te kohatu ma tenei tangata ma tenei tangata, ki runga ki tona pokohiwi, kia rite ki nga iwi o nga tamariki a Iharaira te maha.
6
Kia waiho ai tenei mea hei tohu ki waenganui i a koutou; mo te ui mai a a koutou tamariki a mua, mo te mea mai, Hei aha enei kohatu ma koutou?
7
Katahi koutou ka mea atu ki a ratou, No te motuhanga o nga wai o Horano i mua atu i te aaka o te kawenata a Ihowa; i te whitinga mai o taua mea i Horano i motuhia nga wai o Horano: ko enei kohatu hei whakamahara mo nga tamariki a Iharaira ake nei ake nei.
8
A peratia ana e nga tamariki a Iharaira me ta Hohua i whakahau ai, na, hapainga ake ana e ratou nga kohatu kotahi tekau ma rua i waenganui o Horano, peratia ana me ta Ihowa i korero ai ki a Hohua, he mea whakarite ki nga iwi o nga tamariki a Iharaira te maha, a mauria mai ana e ratou ki to ratou moenga, waiho iho e ratou ki reira.
9
A i whakaturia ano e Hohua etahi kohatu kotahi tekau ma rua ki waenganui o Horano, ki te turanga o nga waewae o nga tohunga i amo i te aaka o te kawenata: a kei reira ano aua kohatu, a, tae noa ki tenei ra.
10
Heoi, tu ana tera nga tohunga amo i te aaka i waenganui o Horano; a, oti noa nga mea katoa i whakahau ai a Ihowa ki a Hohua kia korerotia atu ki te iwi, i rite tonu ki nga mea katoa i whakahau ai a Mohi ki a Hohua: ko te iwi hoki i hohoro te whiti atu.
11
A, ka tapeke katoa te iwi te whiti, na, ka whiti te aaka o Ihowa, me nga tohunga, i te tirohanga mai o te iwi.
12
A i whiti topuni atu ano hoki nga tamariki a Reupena, nga tamariki a Kara, me tetahi taanga a te iwi o Manahe, i te aroaro o nga tamariki a Iharaira, i pera ano me ta Mohi i korero ai ki a ratou.
13
Tata tonu ki te wha tekau nga mano, he hunga tumatohi tonu mo te riri, i haere atu i te aroaro o Ihowa ki nga mānia o Heriko ki te whawhai.
14
No taua ra i whakanui ai a Ihowa i a Hohua i te aroaro o Iharaira katoa; a wehi ana ratou i a ia, i pera me ratou i wehi i a Mohi, i nga ra katoa i ora ai ia.
15
A i korero ano a Ihowa ki a Hohua, i mea,
16
Kiia atu nga tohunga e amo ana i te aaka o te whakaaturanga, kia haere ake i roto i Horano.
17
Na, ka ki atu a Hohua ki nga tohunga, ka mea atu, Haere ake koutou i roto i Horano.
18
A te haerenga ake o nga tohunga i amo i te aaka o te kawenata a Ihowa waenganui o Horano, a, ka mahuta ake nga kapu o nga waewae o nga tohunga ki te wahi maroke, te tino hokinga mai o te wai o Horano ki tona wahi ano, a huri tonu ake ki runga i ona pareparenga, pera ana me to mua.
19
No te tekau o nga ra o te marama tuatahi te iwi i haere ake ai i roto i Horano, a noho ana i Kirikara i te taha ki te rawhiti o Heriko.
20
A ko aua kohatu kotahi tekau ma rua, i tangohia atu e ratou i roto i Horano, na Hohua i whakatu ki Kirikara.
21
A i korero ano ia ki nga tamariki a Iharaira, i mea, E ui a koutou tamariki a mua ki o ratou matua, e mea, He aha enei kohatu?
22
Na me whakaatu ki a koutou tamariki, me ki atu, I whiti maroke mai hoki a Iharaira i tenei Horano.
23
Na Ihowa hoki na to koutou Atua i whakamaroke nga wai o Horano i mua atu i a koutou, a whiti noa koutou, rite tahi ki ta Ihowa ki ta to koutou Atua i mea ai ki te Moana Whero, i whakamaroketia ra e ia i mua atu i a tatou, a whiti noa tatou:
24
Kia mohio ai nga iwi katoa o te whenua ki te ringa o Ihowa, e kaha ana; kia wehi ai koutou i a Ihowa i to koutou Atua i nga ra katoa.