Joshua Chapter 7 - Paipera Tapu 1868 | Te Paipera Tapu 1868

Joshua Chapter 7 - Paipera Tapu 1868

1
Otiia i taka nga tamariki a Iharaira ki te kino i te mea kua oti te kanga: he tangohanga hoki na Akana na te tama a Karami, ko ia nei te tama a Taperi, a he tama tera na Tera, o te iwi o Hura, i tetahi wahi o te mea kua oti te kanga; a mura iho te riri o Ihowa ki nga tamariki o Iharaira.
2
Na, ka tono atu a Hohua i etahi tangata i Heriko ki Hai, ki te taha o Pete-awene, ki te taha ki te rawhiti o Pete-ere, ka korero hoki ki a ratou, ka mea, Haere ki runga ki te titiro i te whenua. Na, ka haere aua tangata, ka titiro i Hai.
3
A, to ratou hokinga mai ki a Hohua, na, ka mea ki a ia, Kaua e haere katoa te iwi ki runga, kia rua mano o nga tangata, kia toru ranei nga mano, e haere ki runga ki te patu i Hai, kei whakangenge kau atu hoki i te iwi katoa ki reira; he tokoouou hoki ratou.
4
Na, haere ana ki reira etahi tangata o te iwi, ki te whakaaro iho e toru nga mano: a rere ana ratou i te aroaro o nga tangata o Hai.
5
A tukitukia iho o ratou e nga tangata o Hai e toru tekau ma ono tangata; i whaia hoki ratou e ratou i mua mai o te kuwaha, a, tae noa ki Heparimi, na patupatua ana ratou i Morara, a ngohe kau te ngakau o te iwi, koia ano kei te wai.
6
Na, hahae ana a Hohua i ona kakahu, hinga tapapa iho ana ki te whenua, ki mua o te aaka a Ihowa, a, ahiahi noa, a ia me nga kaumatua o Iharaira, a opehia ana e ratou he puehu ki o ratou upoko.
7
Na ko te meatanga ake a Hohua, Aue, e te Ariki e Ihowa, na te aha koe i anga ai ki te whakawhiti i tenei iwi i Horano, i hoatu ai i a matou ki te ringaringa o nga Amori, kia hunā ai matou? Aue, me i aro matou ki te noho ki tera taha o Horano!
8
Aue, e te Ariki, me pehea he kupu maku i nga tuara o Iharaira ka hurihia atu nei ki te aroaro o o ratou hoa riri!
9
Ta te mea, ka rongo nga Kanaani me nga tangata katoa o te whenua, na, ka karapoti mai ratou i a matou, ka huna atu hoki i a matou ingoa i te whenua: a, ka pehea koe ki tou ingoa nui?
10
Na ko te meatanga mai a Ihowa ki a Hohua, Whakatika; he aha tau e takoto tapapa na?
11
Kua hara a Iharaira, kua whakapaheke hoki i taku kawenata i whakarite ai ahau ki a ratou: na ratou hoki i tango tetahi wahi o te mea kua oti te kanga, me te tahae, me te teka ano ratou, a whaowhina atu ana e ratou ki roto ki a ratou mea.
12
No reira nga tamariki a Iharaira tē ahei ai te tu ki te aroaro o o ratou hoa riri, na, hurihia ana e ratou o ratou tuara ki te aroaro o o ratou hoa riri; kua kangā hoki ratou, e kore hoki ahau e anga atu ano ki a koutou, ki te kahore koutou e whakangaro atu i te mea kanga i roto i a koutou.
13
Whakatika, whakatapua te iwi, mea atu, Whakatapua koutou kia tapu ai apopo: ta te mea e penei ana te kupu a Ihowa a te Atua o Iharaira, Kei roto i a koe, e Iharaira, te mea kanga: e kore e ahei i a koe te tu ki te aroaro o o hoa riri, kia motuhia atu ra ano e koutou te mea kanga i roto i a koutou.
14
Mo reira me whakatata mai koutou i te ata, tenei iwi tenei iwi; a ko te iwi e hopu ai a Ihowa me whakatata mai tera hapu tera hapu ona; a ko te hapu e hopu ai a Ihowa me whakatata mai tera nohoanga tera nohoanga; a ko te nohoanga e hopu ai a Ihowa, me whakatata mai ia tangata ia tangata.
15
A ko te tangata e hopukia kei a ia te mea kanga, me tahu ki te ahi, a ia, me ana mea katoa: mona i whakapaheke i te kawenata a Ihowa, i mahi poauau hoki i roto i a Iharaira.
16
Na, ka maranga wawe a Hohua i te ata, a, arahina mai ana e ia a Iharaira, tera iwi tera iwi; na, ka mau ko te iwi o Hura;
17
Na, ka arahina mai e ia te hapu o Hura: a, ka mau te hapu o nga Tarahi: na, ka arahina mai e ia te hapu o nga Tarahi, tenei tangata tenei tangata; a, ka mau ko Taperi:
18
Na, ka arahi mai ia i tona nohoanga, i tenei tangata i tenei tangata; a ka mau ko Akana tama a Karami, ko ia nei te tama a Taperi, a he tama tera na Tera, no te iwi o Hura.
19
Katahi ka mea a Hohua ki a Akana, E taku tamaiti, whakakororiatia a Ihowa te Atua o Iharaira, a whakina mai ki a ia, whakaaturia mai hoki ki a au, i aha koe; kaua e hunā i a au.
20
Na, ka whakahokia mai e Akana ki a Hohua, a, ka mea mai, He pono i hara ahau ki a Ihowa Atua o Iharaira, a tenei taku i mea ai:
21
I taku kitenga i tetahi koroka pai, no Papurona, i roto i nga taonga, me nga hekere hiriwa e rua rau, me tetahi poro koura, e rima tekau hekere tona taimaha, na, ka minamina atu ahau, ka tango i aua mea; a tena ano te huna na i te whenua i waenganui o toku teneti, me te hiriwa hoki i raro iho.
22
Na, ka tono atu a Hohua i etahi tangata, a, to ratou rerenga atu ki te teneti; na ko taua mea e huna ana i roto i tona teneti, me te hiriwa i raro iho.
23
Na, ka tango ratou i aua mea i waenganui o te teneti, a mauria mai ana ki a Hohua, ratou ko nga tamariki katoa o Iharaira, a whakatakotoria ana ki te aroaro o Ihowa.
24
Na ka tango a Hohua, ratou tahi ko Iharaira katoa, i a Akana, tama a Tera, i te hiriwa hoki, me te koroka, me te poro koura, me ana tamariki, me ana tamahine, me ana kau, me ana kaihe, me ana hipi, me tona teneti, me nga mea katoa i a ia, a kawea ana ratou ki Raorao Akoro.
25
Na, ko te meatanga atu a Hohua, Na te aha koe i whakararu ai i a tatou? ka whakararu ano a Ihowa i a koe i tenei ra. Na, akina ana ia e Iharaira katoa ki te kamaka, a tahuna ana ki te ahi i muri iho i ta ratou akinga i a ratou ki te kamaka.
26
A whakapurangatia ana e ratou etahi kohatu ki runga i a ia, he nui te purangatanga, e tu na ano, a, tae noa ki tenei ra. Katahi ka tahuri mai a Ihowa i te muranga o tana riri. No reira i huaina ai te ingoa o tena wahi, ko Raorao Akoro, a, mohoa noa nei.