Judges Chapter 15 - Paipera Tapu 1868 | Te Paipera Tapu 1868

Judges Chapter 15 - Paipera Tapu 1868

1
A roa iho na, ka haere a Hamahona, me tetahi kuao koati, i te wa o te kotinga witi, kia kite i tana wahine, a ka mea, Ka haere ahau ki taku wahine ki roto ki te whare moenga. Otiia kihai ia i tukua e te papa o te wahine kia haere ki roto.
2
I mea hoki tona papa, I tino mea ahau e kino rawa ana koe ki a ia; na, hoatu ana ia e ahau ma tou hoa: kahore ianei tona teina e pai atu i a ia? Tena kia riro tenei i a koe hei utu mo tera.
3
Na, ka korerotia ta ratou mahi e Hamahona, Engari ahau ka iti iho taku hara i to nga Pirihitini, ina he taku mahi ki a ratou.
4
Na, haere ana a Hamahona, a hopukia ana e ia e toru nga rau o nga pokiha; katahi ka tikina etahi rama e ia, a whakaangahia mai ana nga hiawero ki a raua whakahiawero, a whakanohoia iho tetahi rama ki waenganui o nga hiawero e rua.
5
Na, ka tahuna e ia nga rama kia ka, a tukua atu ana ki te witi a nga Pirihitini, wera ake nga puranga witi, me nga mea ano hoki e tu ana; me nga mara waina, oriwa.
6
A, te kianga mai a nga Pirihitini, Na wai tenei mahi? na, ka korerotia, Na, Hamahona hunaonga a te Timini; mona i tango i tana wahine, a hoatu ana ki tona hoa. Katahi ka haere mai nga Pirihitini, a tahuna ake e ratou te wahine raua ko tona papa ki te ahi.
7
Na, ko te meatanga mai a Hamahona ki a ratou, Ahakoa kua meatia tenei e koutou, ka rapu utu ano ahau i a koutou, a, muri iho ka mutu taku.
8
Na, tukitukia ana ratou e ia, te waewae, te huha, he nui te patunga, a haere ana, noho ana i te tihi o te kohatu i Etama.
9
Na, ko te haerenga mai o nga Pirihitini, a noho ana i Hura, tohatoha noa atu ana ratou i Rehi.
10
Na, ka mea atu nga tangata o Hura, He aha koutou i haere mai ai ki a matou? Na, ko ta ratou meatanga mai, He here i a Hamahona i haere mai ai matou, kia meatia ki a ia tana i mea mai ai ki a matou.
11
Katahi ka haere etahi tangata o Hura, e toru nga mano, ki te tihi o te kohatu i Etama, a ka mea ki a Hamahona, Kahore ianei koe e mohio, he rangatira no tatou nga Pirihitini? he mahi aha tenei au ki a matou? Na, ko tana meatanga atu ki a ratou, Rite tonu ki ta ratou i mea mai ai ki a au, taku i mea ai ki a ratou.
12
Na, ka mea ano ratou ki a ia, He here i a koe i haere mai ai matou, kia hoatu koe ki te ringa o nga Pirihitini. Katahi a Hamahona ka mea ki a ratou, Oati mai ki a au e kore koutou e rere ki runga ki a au.
13
Na, ka korero mai ratou ki a ia, ka mea, Kahore; erangi me ata here koe e matou, a ka hoatu koe ki o ratou ringa: ko te whakamate ia, e kore matou e whakamate i a koe. Na, ka herea ia e ratou ki nga taura hou e rua, a kawea atu ana i te kamaka.
14
Tona taenga mai ki Rehi, na, ka hamama nga Pirihitini i te tutakitanga ki a ia;—te tino putanga mai o te Wairua o Ihowa ki runga ki a ia: na, rite tonu nga taura i ona ringa ki te muka kua wera i te ahi; harotu noa iho nga here o ona ringa.
15
Na, ka pono atu ia ki tetahi kauae kaihe, he mea hou, a torona atu ana tona ringa, tangohia ake ana; na, kotahi mano tangata i patua e ia ki taua mea.
16
Na, ko te meatanga a Hamahona, He kauae kaihe taku, puranga atu puranga atu, he kauae kaihe taku, patua iho e ahau kotahi mano tangata.
17
A, te mutunga o tana korero, na, makā atu ana e ia te kauae i tona ringa, a huaina iho te ingoa o tena wahi, Ko Ramata-Rehi.
18
Na, nui whakaharahara tona mate-wai, a ka karanga atu ia ki a Ihowa, ka mea, Nau i homai tenei whakaoranga nui ki te ringa o tou pononga, a ka mate nei ahau i te mate-wai, ka hinga hoki i te ringa o te hunga kokoti-kore?
19
Na, ka wahia e te Atua he rua i Rehi, a ka puta mai he wai i reira. Katahi ia ka inu, a hoki mai ana tona wairua, na, kua ora ia. No reira i karangatia ai to reira ingoa, Ko Ene-hakore: kei Rehi na ano a tae noa iho ki tenei ra.
20
Na, e rua tekau nga tau i whakarite whakawa ai ia mo Iharaira i nga ra o nga Pirihitini.