- 1
- Na, i Maunga Eperaima tetahi tangata, ko Mika tona ingoa.
- 2
- Na, ko tana meatanga ki tona whaea, Ko nga hiriwa kotahi tekau ma tahi rau i tangohia ra i a koe, te mea i kanga ra koe, i korero ai hoki ki oku taringa, nana, i a au taua hiriwa; naku i tango. Katahi ka mea mai tona whaea, Ma Ihowa koe e manaaki, e taku tamaiti.
- 3
- Na, ka whakahokia e ia nga hiriwa kotahi tekau ma tahi rau ki tona whaea, a ka mea mai tona whaea, I whakatapua rawatia tenei hiriwa ma Ihowa, he mea na toku ringa ma taku tamaiti, kia hangā ai he whakapakoko, he mea whaowhao, he mea whakarewa. Na, me whakahoki atu e ahau ki a koe aianei.
- 4
- Otiia i whakahokia ano e ia te hiriwa ki tona whaea; na, ka tango tona whaea i etahi hiriwa e rua rau, a hoatu ana ki te kai whakarewa, a nāna i hanga te whakapakoko whaowhao me te mea whakarewa; na, ka takoto aua mea ki te whare o Mika.
- 5
- Na, he whare atua to taua tangata to Mika, a i hangā ano he epora e ia, me etahi terapimi, i whakatohungatia ano hoki tetahi o ana tama, a meinga ana hei tohunga māna.
- 6
- I aua ra kahore o Iharaira kingi; ko ta ratou i mea ai ko nga mea i tika ki te titiro iho a tenei, a tenei.
- 7
- Na, ko tetahi taitamariki o Pete-rehema-hura o te hapu o Hura, he Riwaiti, i reira ano hoki ia e noho ana.
- 8
- Na, ka haere atu taua tangata i te pai i Pete-rehema-hura, noho ai ki tana wahi e kite ai, a i a ia e haere ana, ka tae mai ki Maunga Eperaima, ki te whare o Mika.
- 9
- Na, ko te meatanga mai a Mika ki a ia, I haere mai koe i hea? a ka mea atu ia ki a ia, He Riwaiti ahau no Pete-rehema-hura, a e haere ana ahau kia noho ki taku wahi e kite ai.
- 10
- Katahi ka mea mai a Mika ki a ia, E noho ki a au, a hei matua koe moku, hei tohunga hoki, a kia kotahi tekau nga hekere hiriwa e hoatu e ahau ki a koe i te tau kotahi, kia kotahi ano hoki te whakaritenga kakahu, me te kai ano māu. Na, ka riro mai te Riwaiti.
- 11
- A pai tonu te Riwaiti kia noho ki taua tangata; a ka meinga taua taitamariki e ia kia rite ki tetahi o ana tama.
- 12
- Na, whakatohungatia ana e Mika taua Riwaiti, a ka waiho taua taitamariki hei tohunga māna, a noho ana i roto i te whare o Mika.
- 13
- Na, ko te meatanga a Mika, Katahi ahau ka mohio ka atawhaitia ahau e Ihowa, ina hoki ka riro mai nei te Riwaiti hei tohunga maku.
Address: 
Phone: 
Email: