- 1
- Na, i aua ra, i te mea kahore he kingi o Iharaira, na, ko tetahi tangata, he Riwaiti, e noho noa iho ana i te taha o Maunga Eperaima; na, ka tango ia i tetahi wahine iti māna i roto i Pete-rehema-hura.
- 2
- Na, kua puremu tana wahine iti, a mawehe atu ana i a ia ki te whare o tona pāpā, ki Pete-rehema-hura, a e wha nga tino marama ona ki reira.
- 3
- Na, ka whakatika tona tahu, a haere ana ki te whai i a ia, ki te whakamarie i a ia, ki te whakahoki i a ia; ko tana tangata hoki tona hoa haere, me nga kaihe e rua: na, ka kawea ia e te wahine ki te whare o tona pāpā, a te kitenga o te pāpā o te kotiro i a ia, koa tonu, no te mea ka tupono mai ki a ia.
- 4
- Na, ka pupuri tona hungawai te pāpā o te kotiro i a ia; a e toru nga ra i noho ai ia ki a ia; kai ana, inu ana raua, a noho ana i reira.
- 5
- A i te wha o nga ra ka maranga wawe ratou i te ata, a whakatika ana ki te haere: na, ka mea te pāpā o te kotiro ki tana hunaonga, Kia ora tou ngakau i tetahi wahi taro, a, muri iho ka haere.
- 6
- Na, ka noho, a kai ana, inu tahi ana raua tokorua, na, ko te meatanga mai a te pāpā o te kotiro ki taua tangata, Tena, whakaae mai kia moe ki konei, kia koa hoki tou ngakau.
- 7
- A, te whakatikanga o taua tangata ki te haere, ka tohea ia e tona hungawai, na, ka moe ano hoki ia ki reira.
- 8
- A i te rima o nga ra ka maranga wawe ia ki te haere, a ka mea te pāpā o te kotiro, Kia ora tou ngakau. Na, ka noho ano raua, a tawharara noa te ra, a kai ana raua tokorua.
- 9
- Na, ka whakatika taua tangata ki te haere, a ia, tana wahine, me tana tangata, a ka mea tona hungawai, te pāpā o te kotiro, ki a ia, Nana, kua heke te ra, kua ahiahi, e noho ra; nana, kua tawharara te ra, hei konei moe ai, kia koa hoki tou ngakau; a ka maranga wawe koutou apopo ki ta koutou huarahi, ka haere ki tou kāinga.
- 10
- Heoi kihai taua tangata i pai kia noho; na, whakatika ana, haere ana; a ka tae mai ki te ritenga atu o Iepuhu, ara, o Hiruharama: i a ia ano hoki nga kaihe e rua, whakanoho rawa, i a ia ano hoki tana wahine iti.
- 11
- Ka tata ratou ki Iepuhu, na, kua aua noa atu te ra, a ka mea te tangata ki tona rangatira, Tena, kia peka atu tatou ki tenei pa o nga Iepuhi, ki reira moe ai.
- 12
- Na, ko te meatanga mai a tona rangatira ki a ia, E kore tatou e peka atu ki te pa o te iwi ke, ehara nei i nga tamariki a Iharaira; me haere atu tatou ki Kipea.
- 13
- Katahi ia ka mea ki tana tangata, Haere mai, tatou ka whakatata ki tetahi o enei wahi moe ai, ki Kipea, ki Rama ranei.
- 14
- Na, ka whiti atu ratou, a ka haere, a kua toene te ra i a ratou ka tata ki Kipea, ki tetahi pa o Peniamine.
- 15
- Na, ka peka atu ratou ki reira, ka haere ki Kipea moe ai: a tona taenga atu, ka noho ki te waharoa o te pa; kahore hoki he tangata hei kawe i a ratou ki tona whare moe ai.
- 16
- Na, ko tetahi tangata, he koroheke, e haere mai ana i tana mahi i te māra i te ahiahi, he tangata ano hoki ia no Maunga Eperaima, i Kipea hoki e noho ana; nga tangata ia o te pa, he Peniamini.
- 17
- A, te anganga mai o ona kanohi, ka kite i tetahi tangata, he pahī, i te waharoa o te pa. Na, ko te meatanga mai a taua koroheke, Ko hea koe? i haere mai ano hoki koe i hea?
- 18
- Na, ka mea atu ia ki a ia, I haere mai matou i Pete-rehema-hura, ko te taha matou o Maunga Eperaima; no reira ahau; haere ai ki Pete-rehema-hura; otiia e haere ana tenei ahau ki te whare o Ihowa; heoi kahore he tangata hei tango i a au ki roto ki te whare.
- 19
- Otiia he kakau witi ano tenei, he kai, ma o matou kaihe; he taro ano hoki tenei, he waina maku, ma to pononga wahine, ma te tangata hoki a o pononga: kahore he mate ki te aha ki te aha.
- 20
- Na, ko te meatanga mai a taua koroheke, Tena koe, He ahakoa ra, maku ano te whakaaro ki nga mea katoa e matea e koe. Otiia kaua e moe ki te waharoa.
- 21
- Na, ka kawea ia ki tona whare, ka homai he kai ma nga kaihe, horoia ana e ratou o ratou waewae, kai ana, inu ana.
- 22
- E mea ake ana o ratou ngakau ki te koa, na, ko te karapotinga mai o te whare e nga tangata o te pa, he tamariki na Periara; kei te patuki ki te tatau, ka korero ki te tangata nona te whare, ki taua koroheke ra, ka mea, Whakaputaina mai ki waho tena tangata i haere na ki tou whare, kia mohio ai matou ki a ia.
- 23
- Katahi ka haere atu ki a ratou te tangata nona te whare, a ka mea ki a ratou, Kaua ra, e aku tuakana, kaua e mahia te mea kino; kua tae mai nei hoki tenei tangata ki toku whare; kaua tenei mea poauau e meatia.
- 24
- Na, ko taku tamahine tenei, he wahina, me tana wahine iti hoki, me kawe atu raua e ahau; whakaititia raua e koutou, meatia hoki ki a raua te mea e pai ana ki ta koutou titiro iho: ko tenei tangata ia, kaua tenei mea poauau e meatia ki a ia.
- 25
- A, tē pai nga tangata ki te whakarongo ki a ia, na, ka mau taua tangata ki tana wahine iti, a kawea atu ana ki waho ki a ratou, a ka mohio ratou ki a ia, ka tukino hoki i a ia i taua po tūturu, a tae noa ki te ata, a ka puta te ata, ka tukua mai e ratou.
- 26
- Na, ka haere mai te wahine i te puaotanga o te ata, takoto ana ki te kuwaha o te whare o te tangata kei reira nei tona ariki, a awatea noa.
- 27
- A, te whakatikanga ake o tona ariki i te ata, na, ka wahia e ia nga tatau o te whare, ka puta atu, he mea kia haere ia i tona ara. Na, ko te wahine, ko tana wahine iti, e takoto ana i te kuwaha o te whare me ona ringa i runga i te paepae o te tatau.
- 28
- Na, ko tana meatanga iho ki a ia, Whakatika, kia haere tatou. A tē oho ake, na, ka hapainga ia ki runga ki te kaihe. A turia atu ana e taua tangata, haere atu ana ki tona wahi.
- 29
- A, tona taenga mai ki tona whare, na, ka tikina e ia tetahi maripi, a ka mau ki tana wahine iti, tapahia ana e ia, me ona wheua ano hoki, kia tekau ma rua nga tapahanga, a tonoa ana ki nga wahi katoa o Iharaira.
- 30
- A i mea te hunga katoa i kitea ai, Kahore tenei i mua, kahore ano hoki i kitea he rite mo tenei o te ra iho ano i haere mai ai nga tamariki a Iharaira i te whenua o Ihipa, a taea noatia tenei ra: maharatia iho, whakaaroa, korero.
Address: 
Phone: 
Email: