- 1
- Na, ka mau a Natapa raua ko Apihu, nga tama a Arona, ki a raua tahu-kakara, a makā ana e raua he ahi ki roto, a makā iho e raua he whakakakara ki runga, na, whakaherea mai ana e raua he ahi ke ki te aroaro o Ihowa, he mea kihai i whakahaua mai e ia ki a raua.
- 2
- Na, ko te putanga atu o te ahi i te aroaro o Ihowa, a pau ake raua, a mate iho raua ki te aroaro o Ihowa.
- 3
- Katahi ka mea mai a Mohi ki a Arona, Ko te mea tenei i korero ra a Ihowa, i mea ra, Me whakatapu ahau e te hunga katoa e whakatata mai ana ki a au, me whakakororia ano hoki ahau ki te aroaro o te iwi katoa. A whakarongo puku ana a Arona.
- 4
- Na, ka karangatia e Mohi a Mihaera raua ko Eritapana, nga tama a Utiere matua keke o Arona, a ka mea ki a raua, Haere mai, maua atu o korua tuakana i mua i te wahi tapu, ki waho o te puni.
- 5
- Na, ka haere atu raua, a kawea ana raua me te mau ano o raua koti ki waho o te puni; i pera ano raua me ta Mohi i ki ai.
- 6
- Na, ka mea a Mohi ki a Arona, ratou ko ana tama ko Ereatara, ko Itamara, Kaua e whakarerea te taupoki o o koutou mātenga, kaua ano hoki e haea o koutou kakahu; kei mate koutou, kei riria hoki te iwi katoa: engari kia tangihia e o koutou teina, e te whare katoa o Iharaira, te tahunga i tahuna nei e Ihowa.
- 7
- Kaua ano hoki e haere atu i roto i te whatitoka o te tapenakara o te whakaminenga, kei mate koutou: kei runga hoki i a koutou te hinu whakawahi a Ihowa. Na, ka meatia e ratou ta Mohi i korero ai.
- 8
- Na, ka korero a Ihowa ki a Arona, ka mea,
- 9
- Kaua e inumia he waina, tetahi wai whakahaurangi ranei, e koutou tahi ko o tama, ina haere koutou ki roto ki te tapenakara o te whakaminenga, kei mate koutou: hei tikanga pumau tenei, tuku iho ki o koutou whakatupuranga:
- 10
- Ki taea ai hoki e koutou te wehe te tapu, te noa, te poke, te poke-kore;
- 11
- Te whakaako hoki i nga tamariki a Iharaira ki nga tikanga katoa i korerotia atu nei e Ihowa ki a ratou, i whakapuakina atu hoki e Mohi.
- 12
- A i korero ano a Mohi ki a Arona, ratou ko ana tama i ora, ko Ereatara, ko Itamara, Tikina te whakahere toto-kore e toe ana o nga whakahere ahi a Ihowa, ka kai rewena-kore ai ki te taha o te aata: he tino tapu hoki:
- 13
- Me kai hoki ki roto ki te wahi tapu, mau nei hoki, ma o tama, tena wahi o nga whakahere ahi a Ihowa: ko te mea hoki tena i whakahaua mai ai ahau,
- 14
- A ko te uma poipoi, me te peke hapahapai, me kai e koutou ki te wahi poke-kore, e koutou tahi ko o tama, ko o tamahine: i whakaritea hoki ena hei wahi mau, hei wahi hoki ma o tama, he mea homai no roto i nga patunga o nga whakamarietanga a nga tamariki a Iharaira.
- 15
- Me kawe tahi mai e ratou te peke hapahapai raua ko te uma poipoi, me nga whakahere ahi, ara nga mea ngako, a ka poipoia hei whakahere poipoi ki te aroaro o Ihowa; a ka waiho ma koutou tahi ko au tama; a hei tikanga pumau tonu iho tenei; ko ta Ihowa hoki i whakahau ai.
- 16
- Na, ka ata rapu a Mohi i te koati o te whakahere hara, a kua tahuna: na, ka riri ia ki a Ereatara raua ko Itamara, ki nga tama a Arona i ora, a ka mea,
- 17
- He aha tē kainga ai e koutou te whakahere hara ki te wahi tapu; he tino tapu nei hoki, kua homai ano ma koutou, ma koutou nei hoki e waha te kino o te whakaminenga, e mea whakamarietanga ano hoki mo ratou ki te aroaro o Ihowa?
- 18
- Titiro hoki, kahore ano ona toto i kawea ki roto ki te wahi tapu: ko te tikanga kia kainga tena e koutou ki te wahi tapu, ko taku hoki i whakahau ai.
- 19
- Na, ko te meatanga atu a Arona ki a Mohi, Nana, nonaianei i whakaherea ai e ratou to ratou whakahere hara, me ta ratou tahunga tinana, ki te aroaro o Ihowa; a kua pa mai ano enei mea ki a au: a, me i kainga te whakahere hara e ahau inaianei, tera ranei e manakohia mai e Ihowa?
- 20
- A ka rongo a Mohi, na, ka whakaae mai.
Address: 
Phone: 
Email: