Leviticus Chapter 12 - Paipera Tapu 1868 | Te Paipera Tapu 1868

Leviticus Chapter 12 - Paipera Tapu 1868

1
A i korero mai ano a Ihowa ki a Mohi, i mea,
2
Korero atu ki nga tamariki a Iharaira, mea atu, Ki te hapu tetahi wahine, a ka whanau he tane: na, kia whitu nga ra e poke ai ia; kia rite tona pokenga ki nga ra e whakamotuhaketia ai ina paheke.
3
A i te waru o nga ra ka kotia te kiri matamata o te tamaiti.
4
A me noho te wahine ki te toto o tona purenga, kia toru tekau ma toru nga ra: kaua ia e pa atu ki tetahi mea tapu, e haere mai ranei ki te wahi tapu, kia taka ra ano nga ra mo tona purenga.
5
Ki te mea ia i whanau he kotiro, kia rua nga wiki e poke ai ia, kia rite ki to tona whakamotuhaketanga: a kia ono tekau ma ono nga ra e noho ai ia ki te toto o tona purenga.
6
A ka rite nga ra mo tona purenga mo te tamaiti, mo te kotiro ranei, me kawe mai e ia he reme, ki te tau-tahi, hei tahunga tinana, me te pi kukupa, me te kukupa ranei, hei whakahere hara ki te whatitoka o te tapenakara o te whakaminenga, ki te tohunga:
7
A mana e whakahere ki te aroaro o Ihowa, a ka meinga he whakamarietanga mona; a ka kore ona poke i te rerenga o ona toto. Ko te ture tenei mo te wahine kua whanau nei tana tamaiti, tana kotiro ranei.
8
A ki te kahore e taea e ia te kawe mai tetahi reme, me kawe mai nga kukupa e rua, nga pi kukupa ranei e rua; ko tetahi hei tahunga tinana, ko tetahi hoki hei whakahere hara: a ma te tohunga e mea he whakamarietanga mona, a ka kore ona poke.