- 1
- A i korero ano a Ihowa ki a Mohi, i mea,
- 2
- Korero atu ki nga tamariki a Iharaira, mea atu ki a ratou, Ko nga hakari a Ihowa e karangatia e koutou hei huihuinga tapu, ko enei aku hakari.
- 3
- E ono nga ra e mahia ai te mahi; ko te whitu ia o nga ra he hapati okiokinga, he huihuinga tapu: kaua tetahi mahi e mahia i reira, he hapati tena no Ihowa, puta noa i o koutou nohoanga.
- 4
- Ko nga hakari enei a Ihowa, nga huihuinga tapu hoki e karangatia e koutou i nga wa e rite ai.
- 5
- Kei te marama tuatahi, kei te tahi tekau ma wha o te marama, i te ahiahi, te kapenga a Ihowa.
- 6
- A i te tekau ma rima o nga ra o taua marama ano ko te hakari taro rewena-kore a Ihowa: e whitu nga ra e kai ai koutou i te taro rewena-kore.
- 7
- Hei te ra tuatahi he huihuinga tapu ma koutou; kaua tetahi mahi a te kai mahi e mahia e koutou i reira.
- 8
- Engari kia whitu nga ra e whakahere ai koutou i te whakahere ahi ma Ihowa; a i te whitu o nga ra he huihuinga tapu kaua e mahia tetahi mahi a te kai mahi e koutou i reira.
- 9
- A i korero ano a Ihowa ki a Mohi, i mea,
- 10
- Korero atu ki nga tamariki a Iharaira, mea atu hoki ki a ratou. E tae koutou ki te whenua e hoatu ana e ahau ki a koutou, a ka kotia ona hua, me kawe mai e koutou tetahi paihere o nga hua mataati o ta koutou kotinga ki te tohunga:
- 11
- A mana e poipoi te paihere ki te aroaro o Ihowa, kia manakohia ai koutou: me poipoi e te tohunga i te aonga ake o te hapati.
- 12
- Me whakahere ano hoki e koutou i te rangi e poipoia ai e koutou te paihere, he reme toa, ki te mea koha-kore, ki te tau-tahi, hei tahunga tinana ki a Ihowa.
- 13
- Kia rua ano hoki nga wahi whakatekau o te paraoa, mo te whakahere toto-kore o taua mea, ki te mea i konatunatua ki te hinu, hei whakahere ahi ma Ihowa, hei kakara reka: me waina hoki te ringihanga o taua mea, ko te wahi whakawha o te hine.
- 14
- Kaua ano hoki koutou e kai i te taro, i te witi pahuhu, i nga puku hou ranei, kia taea ra ano te tino ra e kawea ai e koutou te whakahere ki to koutou Atua: hei tikanga pumau tenei, puta noa i o koutou whakatupuranga, i o koutou nohoanga katoa.
- 15
- Me tatau ano hoki e koutou i te aonga ake o te hapati, i te ra i kawea mai ai e koutou te paihere mo te whakahere poipoi; kia tino rite nga hapati e whitu:
- 16
- Kia tae ra ano ki te aonga ake o te whitu o nga hapati ta koutou tatau i nga ra e rima tekau; ka whakahere ai koutou i te whakahere toto-kore, i te mea hou, ki a Ihowa.
- 17
- Me kawe mai e koutou i roto i o koutou nohoanga, kia rua nga taro poipoi e rua nei o raua whakatekau: he mea paraoa; he mea i tunua rewenatia; ko nga tuapora ena ma Ihowa.
- 18
- Me whakahere tahi ano e koutou me te taro kia whitu nga reme, hei te mea koha-kore, hei te tau-tahi, me tetahi puru kuao, me nga hipi toa e rua: hei tahunga tinana ena mea ki a Ihowa, me te whakahere toto-kore hoki o aua mea, me nga ringihanga, hei whakahere ahi, hei kakara reka ki a Ihowa.
- 19
- Katahi ka whakaherea e koutou tetahi kuao koati hei whakahere hara, kia rua ano hoki nga reme, hei te tau-tahi, hei patunga whakamarietanga.
- 20
- A me poipoi ngatahi aua mea e te tohunga me te taro o nga tuapora, hei whakahere poipoi, ki te aroaro o Ihowa, me tapiri atu ki nga reme e rua: ka tapu ena mea ki a Ihowa ma te tohunga.
- 21
- A me karanga nui e koutou i taua rangi ano, kia waiho hei huihuinga tapu ma koutou: kaua e mahia e koutou tetahi mahi a te kai mahi i reira: hei tikanga pumau tonu tenei puta noa i o koutou nohoanga, i o koutou whakatupuranga.
- 22
- A ka kotia e koutou nga hua o to koutou whenua, kaua e tino whakapotoa nga kokonga o to mara ina kotia e koe, kaua ano hoki e hamua nga toenga o o hua: me waiho ma te rawa-kore raua ko te manene: ko Ihowa ahau ko to koutou Atua.
- 23
- A i korero ano a Ihowa ki a Mohi, i mea,
- 24
- Korero atu ki nga tamariki a Iharaira, mea atu, Hei te whitu o nga marama, hei te tuatahi o te marama, he hapati ma koutou, he whakamaharatanga, he whakatangihanga tetere, he huihuinga tapu.
- 25
- Kaua e mahia tetahi mahi a te kai mahi i reira; engari me whakahere he whakahere ahi ma Ihowa.
- 26
- A i korero ano a Ihowa ki a Mohi, i mea,
- 27
- Ko te tekau ano hoki o tenei marama, o te whitu, hei ra whakamarietanga; hei huihuinga tapu tena ra ma koutou; me whakapouri hoki e koutou o koutou wairua, me whakahere ano hoki he whakahere ahi ki a Ihowa.
- 28
- Kaua ano hoki e mahia e koutou he mahi i taua rangi; he ra whakamarietanga hoki tena, e meinga ai he whakamarietanga mo koutou ki te aroaro o Ihowa o to koutou Atua.
- 29
- Na, te wairua e kore e whakapouritia i taua ra, ka hatepea atu ia e ahau i roto i tona iwi.
- 30
- Ki te mahia ano hoki e tetahi wairua tetahi mahi i taua ra, ka whakangaromia atu ano e ahau taua wairua i roto i tona iwi.
- 31
- Kei mahia e koutou tetahi mahi i reira: hei tikanga pumau tonu iho tenei, puta noa i o koutou whakatupuranga, i o koutou nohoanga katoa.
- 32
- Me waiho taua ra hei hapati okiokinga mo koutou, me whakapouri hoki o koutou wairua: me whakahapati ta koutou hapati i te iwa o te marama i te ahiahi; i te ahiahi, a, tae noa ki tetahi ahiahi.
- 33
- A i korero ano a Ihowa ki a Mohi, i mea,
- 34
- Korero atu ki nga tamariki a Iharaira, mea atu, Ko te tahi tekau ma rima o nga ra o tenei marama, o te whitu, te hakari whare wharau ki a Ihowa, kia whitu nga ra.
- 35
- Ko a te ra tuatahi he huihuinga tapu: kaua e mahia tetahi mahi a te kai mahi i reira.
- 36
- E whitu nga ra e whakahere ai koutou i te whakahere ahi ki a Ihowa: ko te ra waru hei huihuinga tapu ma koutou; a ka whakaherea he whakahere ahi ki a Ihowa: he huihuinga nui tena, kaua e mahia tetahi mahi a te kai mahi i reira.
- 37
- Ko nga hakari enei a Ihowa e karangatia e koutou hei huihuinga tapu, hei whakaherenga mo te whakahere ahi ki a Ihowa, mo te tahunga tinana, mo te whakahere toto-kore, mo te patunga tapu, mo nga ringihanga, tenei mea i tona rangi tenei mea i tona rangi:
- 38
- Hāunga nga hapati a Ihowa, hāunga ano a koutou mea homai noa, hāunga ano a koutou ki taurangi katoa, hāunga ano hoki a koutou whakahere tuku noa katoa e homai ana e koutou ki a Ihowa.
- 39
- I te tekau ma rima hoki o nga ra o te whitu o nga marama, ina poto i a koutou te kohikohinga hua o te whenua, me whakarite e koutou he hakari ki a Ihowa, kia whitu nga ra: ko te ra tuatahi hei hapati, ko te ra tuawaru hoki hei hapati.
- 40
- Na, ka mau koutou i te ra tuatahi ki nga peka rakau papai, ki nga peka nikau, ki nga peka hoki o nga rakau e maha ana nga rau, ki nga wirou o te awa; a ka koa koutou ki te aroaro o Ihowa o to koutou Atua, kia whitu nga ra.
- 41
- Kia whitu hoki nga ra o te tau e whakarite ai koutou i te hakari ki a Ihowa. Hei tikanga pumau tenei, puta noa i o koutou whakatupuranga: ko a te whitu o nga marama whakaritea ai e koutou.
- 42
- Kia whitu nga ra e noho ai koutou i roto i nga wharau; ko nga tangata whenua katoa o Iharaira me noho i roto i nga wharau:
- 43
- Kia mohio ai o koutou whakatupuranga i meinga e ahau nga tamariki a Iharaira kia noho i roto i nga wharau, i taku whakaputanga mai i a ratou i te whenua o Ihipa: ko Ihowa ahau ko to koutou Atua.
- 44
- Na, ka korerotia atu e Mohi nga hakari a Ihowa ki nga tamariki a Iharaira.
Address: 
Phone: 
Email: